Harei ini, tame Bilan Ngak bruk khik brei salamat, hacih sa-at labik ngak bruk thun 2025 ngan haong angan kadha: “Patagok bruk taong yaom, duah thau ka bruk kan kandah saong peih ngak dom jalan ngak khik kajap karo hacih sa-at di labik ngak bruk”. Thun ini, bruk ta-eng pasang iek kan kandah ka bruk karo salamat, hacih sa-at ngak bruk brei hu jhul khang saong peih ngak tani tanat jang. Dalam bilan ngak bruk, gah pato tacei brei peih rilo bruk praong meng pakat trung uong tal bhum palei, yau ye bruk ngak tui Sarak 31 di Mban Bi thu ka bruk pakhang tacei ba jalan ngak bruk di Ndang ngan haong bruk karo salamat, hacih sa-at ngak bruk; peih bruk ndom meyai di hoi dong pakat negar saong pakat tinh…

Tinh Hau Giang birau padang ngak hu blaoh saong ba Sang mac Điện sinh khoi tame ngak bruk, hu padang ngak di phuong Thuan An, ban sit Long Mỹ. Sang mac hu pandar kong nghe tua bin pataom yawa thak  yau dahlau diah, ralo cuh meng kam, khik hu carbon siam ka alam langik labik daok, hu pajeng ba tapa dom tapen kapal gilai pajeng pandap piah cuh trak tal 300 tan tame hu. Ini lac sang mac dien khoi hu cuh meng kam akaok meti di Viet Nam. Yaok  thun sang mac brei pabak ndien jaik 130 trieu kWh.

Mblang Kapal ahaok par Dunya Tan Son Nhat, Ban raya Ho Chi Minh brei thau, tabung glaong lac tukvak duh tuai dalam bingun raya harei 30/4 - 1/5 thun ini yaok harei mblang kapal ahaok taduan raok 122.000 tuai damuai, labaih 740 mbang ahaok par nao saong mai, tagok 10% dut haong dahlau nan. Dalam nan, dua harei tabung glaong abih lac 2/5 saong 4/5 hu tagok tal 770 mbang par/harei. Mblang Kapal ahaok par Dunya Tân Sơn Nhất pachreih tuai damuai hu mbaok di ga negar dahlau 2 mon saong ga dunya dahlau 3 mon dut haong tukvak peih ahaok par. Gam haong nan srap gap ginup harak gar, pasang iek ndap nda ba tui njauk hukum saong caik dahlau bruk ngak harak gar online abih takik tukvak.

Mban Khik iek Labik rivang ma-in Phu Quy, tinh Binh Thuan khan lac, dalam tuk padei le harei 30/4 saong Harei Dunya Urang ngak 1/5 meda hu biak rilo tuai damuai, urak ini dom labik daok hu labaih 70% duk bilik padeih padei, ralo labik oh daok meng bilan 4. Di kaoh pulao Phú Qúy urak ini hu 68 sang padeih padei, duk bilik saong jaik 100 homestay, ngan haong dom pandap rivang ma-in yulit birau gam haong tasik, daok lac labik di tuai damuai duah mai dalam tuk padeih padei harei 30 bilan 4 saong harei 1 bilan 5 dui atah 5 harei.   

UB Bhap bini Ban raya Ho Chi Minh bahrau ba tabiak bruk salih yaom kaom yitvu pandar bha di dua tapen Cát Lái saong Bình Khánh. Yaom harak ve bahrau ba tame pandar meng haarei 5/5 anak tal. Tui nan, yaom harak ve ka urang nao takai saong radaih juak lac 2.000 dong/mbang. Radaih patuh nao tapa bha Cát Lái hu tanut yaom 6.000 dong saong 7.000 dong di bha Bình Khánh. Oto mala 7 labik daok hu yaom danak lac 34.000 dong saong 40.000 dong/mbang. Tanut jien glaong abih pandar ka radaih katung hu rơ moóc lac 330.000 dong di Cát Lái saong 400.000 dong di Bình Khánh.

Sa mbaik ndao di Patao negar Prang Napoleon meda ba tabiak to yaom di Paris hu yaom tagok tagok 1 trieu 1 rituh ribau dola My. Patao Prang Napoleon pah urang ngak mbaik ndao hu sarak biak gheih tani tanat di thun 1802 saong khik  mbaik ndao nan luac rai patao di drei. Sajarah hu tavak veik, Napoleon biak iek praong dom thaot binguk adat quyen luc, dalam nan, duah thaot binguk hu makna praong dalam. Napoleon hu jaik 15 mbaik ndao. Ndao hu pablei to yaom mbang ini ngak meng bar tauk ameh saong kanduh papaok ndao hu ngak meng kalik ikan mhai.

Piah patakik bruk gar jalan, Thong doc Jakarta, Indonesia ong Pramono Anung Wibowo hu pandar taong abih urang jakar di ban ine brei nao mai meng radaih cong cong di harei but yaok adit. Piah pachreih urang kong chuc ngak tui siam jang, Rajaei Jakarta brei pandar radaih karja ka urang kong chuc dalam dom harei but. Gar jalan lac sa dalam dom asal kadha cuang kandah abih ngan haong rahra Jakarta. Kuhria rah tapa yaok urang palai lahik 10 thun umo piah jhaik gauk nao mai angaok dom jalan gar radaih.

Urang yau patuh radaoh di Lady Gaga hu var parang adaoh oh abih jien di harei 3/5 anak tal di tapen tasik Rio de Janeiro, Braxin. Urak ini, bruk ramik caga hu peih ngak dalam sami samar piah taduan raok 1 trieu 5 rituh urang mai iek melam daoh take bika praong prang nan. Piah sap pagap hu siam mekre ka melam daoh take hu biak rilo manuac mai mong iek, dom urang jakar  ban Rio de Janeiro ba tabiak jalan khik brei  siam mekre dalam bruk tame tabiak. Lady Gaga hu jeng sa dalam dom urang daoh hu tavak jeng parieng ragam daoh pablei hu ralo abih di dunya./.