Huyen Xuân Lộc, tinh Dong Nai ba tagok panuac likau mbaoh tangin brei angan palei pala bahrau kieu mau. Tapa 6 thun ngak Sarak ngak iek dahlau padang huyen Xuân Lộc mek hu tanut chuan palei pala bahrau kieu mau tui jalan “Patagok bruk ngak ndap nda kaya nong karo kajap” tukvak 2018 -2025, tal ini huyen Xuân Lộc hu salah blaoh 6 kapul asal kadha saong 29 tanut ba tabiak di Sarak. Dalam huyen taong abih 14 xa mek hu tanut palei pala bahrau paglaong. Jien mek tame kuhria tui yaok urang mek hu jaik 96 trieu dong sa urang. Yaom kaom pala drak kuhria rah tapa 1 hecta taneh pala hu labaih 232 trieu dong.

Danak dak binah ka 1 di Danak dak padang ngak jalan peih drah samar Bac -Nam gah Pei negar, jalan tapa Gia Nghĩa (Dak Nong) - Chơn Thành (Binh Phuoc) hu padang ngak. Danak dak ngak jalan atah labaih 124 km peih praong tal 6 jalan radaih, radaih peih nduac samar 120km sa mon. Jalan peih drah samar  Gia Nghĩa - Chơn Thành lac jalan peih tabiak ngak mbang praong, pambuak  tani tanat dom tinh Binh Phuoc, Dak Nong saong rilo bhum palei karei haong TPHCM – nan lac pasak kinh te sami samar  abih di dalam negar.

Tinh Binh Phuoc hu salah blaoh jalan ngak daong sang daok dalam danak dak brei oh daok baoh sang taik tahak. Danak dak hu salah blaoh bruk padang saong pasiam hu taong abih 765 baoh sang, haong taong abih jien buh tabiak ngak jaik 54 ty dong. Dalam kein lagaih daok rilo kan kandah, meng rilo thun tapa, Binh Phuoc hu kham merat peih bruk padang yaok ribau baoh sang ka urang kathaot, jaik kathaot, baoh sang mbang tui sarak, urang ngak bruk katmang meng kal. Bruk salah blaoh daanak dak brei oh daok baoh sang taik tahak oh lac paglaong raidiuk ka rahra bo daok pabak veik hatai je, jalan sahnang dalam bruk patagok karo kajap.

Yaom la-u thu di dom tinh bhum taneran kraong Cuu Long daok tagok glong  labaih 200.000 dong sa pluh blaoh. Ben Tre lac “labik hu pala rilo la-u” abih dalam negar, phun la-u hu jeng phun kong nghiep duah jien tame rilo di tỉnh, rik tame jhul khang bruk patagok kinh te  di bhum palei ini. Tui ong Trần Ngọc Tam, Akok UBND tỉnh Bến Tre, la-u lac sa dalam dom phun kong nghiep hu pala ralo piah duah jien tame, yau nan ye tinh tuk halei jeng caik hatai sangka saong ba mbuan lagaih  ka bruk dak padang  jalan ngak, sarak pachreih urang buh jien tame saong pakhang bruk ba ilamo kong nghe tame pala tui, sangka iek glang, ngak tabiak pandap meng la-u.

UB Bhap bini tinh Ninh Thuan mbaoh tangin ka sarak haong taong abih jien buh tabiak labaih 10 ty dong piah khik ramik saong paglaong yaom kaom Harei Kate, drap ar ilamo oh mbaoh di meta pakat negar di urang bangsa Cam. Bruk mbaoh tangin ka sarak hu caong takre paglaong jalan sahneng ka yaom kaom drap ar ilamo, paglaong bruk hu mbaok tame di bhap bini dalam bruk khik ramik saong paglaong Harei Kate, ba Ninh Thuan jeng sa labik jirah ilamo dui pachreih.

An Do saong Pakistan daok kan kandah gauk catang tagok hadei mbang patuh phao tame Kashmir bo Ấn Độ ndem puac lac dom urang khung bo hu jabat ngak bruk di Pakistan ngak. An Do brei thau lac padeih Hiep uoc Thuy loi Indus. Ba tabiak bruk nan ngak yaok trieu urang ngak nong di Pakistan huac lahik halau ia pruh ka phun pala. Hiep uoc Thuy loi Indus thun 1960 - nan lac ba ia pruh ka 80% taneh pala drak di Pakistan - urak ini An Do brei padeih kayua Pakistan tui kol khung bo rilo taneh ia.

Buu ndien Vatican hu ba tabiak sa anek tem thaik thaot biak karei piah brei mboh sa tukvak oh hu giao hoang, hu ieu lac "Sede Vacante" (anak meta lang lac labik ngak bruk oh ka hu urang ngak). Asar mbaoh tangin Sede Vacante meng kal hu ba tabiak dalam tukvak daok cang hu giao haong bahrau tagok ngak saong hu brei pandar tal tuk hu sa giao hoang bahrau hu pilih ruah dalam mbang nyaom biai kandauk.

Rilo sinh vien di Mỹ daok tame bruk pakacah oh bhian mboh, nan lac “Pakacah tinh trung”. Bruk ini hu peih ngak piah paglong jalan sahaneng ka bruk takik hu anek di urang likei. Yai thuong hu yaom 10.000 USD, sumu jaik 260 trieu dong. Tui kapol padang ngak “Pakacah tinh trung”, ini oh lac “ bruk ngak mengak” bo lac bruk pachreih tagok  dom mbang ginum biai tapak hatai ka bruk menek anek – bo tui urang sahaneng lac daok trun./.