Piah duh ka bhap bini padeih padei Raya, hu mbaok di dom harei padeih padei 30/4 saong harei 1/5 di negar drei, Thu tuong Phạm Minh Chính hu harak payua tacei pato lac: Dom mentri, dom gah, dom bhum palei padang kapol nyaom, radaih, ndap nda, mac jamraih caga blaoh blai piah peih ngak hu siam bruk khik brei salamat dalam tukvak yau urak ini. Peih bruk parabha jalan mbak piah hu lagaih di dom labik pataom hu rilo manuac saong pabah mbang tame dom ban praong. Pataom bol lin, radaih pandap piah caga, pacang dom kol toi pham, chap mek kol kanjiak jhak, abih di nyu nan lac kol pandar kong nghe  glong, peih bruk ma-in mbia, pandar matuy, kol kanjak jhak pambak tame labik peih ngak dom bruk pahadar…piah khik brei salamat raidiuk, haniem phol di Bhap bini.

Piah pabak bruk caong khin nao mai rilo dalam tuk Pahadar 50 thun Harei Peih paha gah Meraong negar, yasa taneh ia, TPHCM brei ramik pasiam veik tukvak peih ngak jakan metro ka 1 saong dom radaih buyt…Tui nan, jalan Metro ka 1 (Bến Thành - Suối Tiên) brei parilo jalan radaih, tukvak ngak bruk dui atah  meng harei 25/4 tal abih harei 4/5. Abih di nyu harei 30 bilan 4, metro 1 ngak bruk meng 4 mon meteh kuhria abih tih hu 240 mbang dalam sa harei. 

Ban Cần Thơ birau peih bruk Pathau khan ngak salah bruk ba tabiak Jak ba “Urang rik tame ngak brei abih baoh sang oh daok taik tahak di labik ini”. Tuk birau peih ngak danak dak, ban raya pasang iek hu 1.066 baoh sang brei padang ngak birau, ramik pasiam veik. Thun ini, Cần Thơ daok 531 baoh sang, ban kham merat  ngak brei salah  blaoh dahlau harei 30 bilan 4. Piah hu jien peih ngak, ban Cần Thơ jak ba urang rik tame labaih 49 ti dong.

Pahadar 50 thun Harei Peih paha gah Meraong negar ( 30/4/1975-30/4/2025), UB bhap bini tinh Tien Giang peih jalan brei radaih nduac Danak dak Jalan tinh 864 vaktu ka 1 Jalan 50 tal jalan 877B saong tatua Chợ Gạo. Ini lac danak dak hu makna praong dalam rik tame ngak brei cak rok patagok kinh te - xa hoi di tinh Tien Giang. Jalan nan lagaih pambuak dom bhum biak mbuan mbiah lagaih ralo dalam bruk pablei salih, nao mai  di tỉnh Tien Giang haong dom tinh di bhum kraong Tien, bhum Taneran kraong Cuu Long.

BCH Đảng bộ tỉnh Long An mbang XI hu njauk gauk ka danak dak ramik, peih ngak veik 186 xa, phuong, ban sit piah padang birau 60 don vi karja pakat xã, trun 126 don vi karja pakat xã dut saong urak ini. Langiu di nan, hu 98% cu tri lambaok ka baoh sang brei panuac njauk hatai ka jalan pagam tame tinh Tay Ninh saong Long An. Danak dak pagam Long An tame Tây Ninh, mek angan birau lac tinh Tây Ninh. Pasak chinh tri - hanh chinh lac Ban Tân An.   

Rajaei Italia daok peih ngak dom jalan pacang cakak catang piah khik brei salamat ka ndam padhi Giáo hoàng Francis, tui kuhria peih ngak di harei 26/4 di Vatican. Ndam padhi nan hu mbaok di labaih 170 kapok urang negar langiu. Yaom lac  dahlau di nan Giáo hoàng Francis kakei lac ngak ndam metai mbuan mbiah saong kandi kandang, min urang mikva agama  mai Vatican meda tagok rilo tal 200 ribau urang.

Sa kamuan kumei umo 9 thun di tinh Hà Bắc, Trung Quốc metuah daok diuk hadei tuk laik meng tal 25 trun tal 7 di sang chung cu. Balai rah tabiak di harei 27/3, tuk nan amaik di kamuan daok ngak bruk ye pasang iew phone brei thau lac anek kumei lahik. Kapol khik iek toa sang  khan lac anek kumei ndih di tabung sang tal 7, kayua urang sang labik ini mehit sap saong khan veik ka urang khik iek toa sang. Di sang iek ruak Uranaih  Bắc Kinh dut iek mboh jaoh tangin, pacah talang mbaok saong talang tada.

Indonesia oh ka pablei brah tabiak ka Malaysia tuk ini kayua daok kham merat khik piah brah ginup dalam negar. Brah khik piah di taneh ia ini di Jabat Hau can Karja Indonesia urak ini dang si tanut 3,3 trieu tan. Jabat ini kham ba tame piah rilo tagok 4 trieu tan di bilan 5 anak tal. Indonesia daok kham merat pamong tal bruk khik piah brah dalam negar  rilo jang, brei adat ka taneh ia ini padeih blei brah tame dalam  thun 2025./.