Mentri Kong an hu jak ba rik jien daong padang 700 baoh sang, haong abih tih jien buh tabiak labaih 42 ti dong, yaok baoh sang hu yaom 50 trieu dong, tinh Bac Lieu đối ứng 10 trieu sa baoh sang. Uy mban Mat tran Negar Viet Nam tinh Bac Lieu brei ngak siam dom bruk taduan, khik jien saong pandar jien njauk tui hukum, tantu cambaih laih, khik kajap ka paok jien hu pandar njauk bruk , njauk urang. Bingun ini, 40 baoh sang kathaot, jaik kathaot gaok kan kandah ka sang daok hu Mentri Kong an saong tinh Bac Lieu alin pandap, gam haong nan hu rivang tangi, pasang iek saong pato tacei sangka prein yava, pabak jru cavao oh mek jien.

Mban Tacei ba jalan jak ba urang halan hatian brei darah tinh Hau Giang birau peih bruk ngak tui “ Harei taong abih bhap bini halan hatian alin brei darah” harei 7/4. Di var peih bruk jak ba,  dom urang lambaok vakil hu mbaoh tangin tame alin brei darah, tapa nan Mban Tacei ba jalan jak ba urang halan hatian brei darah tinh Hau Giang  taduan hu 160 don vi drah. Meng kaok thun  mbiah tal ini Mban Tacei ba jalan jak ba urang halan hatian brei darah tinh Hau Giang taduan hu labaih 4.000 don vi darah, labaih 33% bruk ba tabiak dalam thun.

Tui Kong an Ban raya Ho Chi Minh, dalam 1.046 sang pah ngak suan ka bruk pacang caga apui khuah, labaih 200 labik sang daok brei padeih bruk brei pah, 837 labik sang daok karei njauk brei padeih brei pah dalam tukvak anak tal, labaih 15.500 urang pah sang daok brei nao duah labik daok karei kayua dom sang daok oh khik kajap ka bruk pacang caga apui khuah. Karja palei brei pandar rahra duah labik pah sang daok karei piah khik kajap karo salamat, tani tanat raidiuk. Abih di nyu nan lac, Kong an Ban raya Ho Chi Minh brei mboh tantu cambaih laih angan dom labik brei pah sang daok ngak suan hukum saong dom labik ngak njauk ginup asal kadha ka bruk pacang caga apui khuah piah rahra meda ta-eng duah thau saong pilih ruah labik daok karo salamat.

Piah pacang caga  bruk glut jaleih taneh hu samar, UB bhap bini Ban Cần Thơ birau peih bruk padang ngak ar pacang glut jaleih samar kraong Ô Môn, labik tapa phuong Thới An (quận Ô Môn) kuhria abih tih jien buh tame ngak  labaih 130 ti dong. Thun 2024, ban Can Tho rah tabika 27 mbang glut jaleih, ngak jaleih 14 baoh sang, glut jaleih 1 gilang pandap saong ngak kan kandah tal 35 baoh sang karei. Kuhria abih tih jien khat lahik  labaih 15 ti dong. Ban ini hu ba tabiak 12 sarak adat padang ngak danak dak samar chip piah ramik pasiam 12 labik glut jaleih  mbuan ba tal bala, atah labaih 2.100 m, kuhria abih tih labaih 166 ti dong.

Sa ar pacang khik danao hlung ikan atah 8m di Kongti co phan Gò Đàng, daok di puk Thủy Tây, xa Ngũ Hiệp, huyen Cai Lậy, tinh Tien Giang pacah. Ia tagok nduac khang ngak dauk rilo bein phun durian di jaik 10 baoh sang rahra di ini, hu labik ia dauk labaih 1m. Tui rahra di puk palei, bein durian dauk ia rilo harei meda ngak druh baoh, bluk agha ngak metai phun, ngak khat lahik biak praong. Urak ini karja daok duah thau bruk kanjah jhak saong khat lahik kayua ia nduac tame meng bruk ini.

Dom urang ngak praong di Malaysia daok samar duah thau ka bruk patuh brong ba menyek di Kapol Menyek pakat negar Petronas rah tabiak di bang Selangor harei 1/4 meng blaoh. Bala patuh paui khuah mbang abaih 78 baoh sang, 10 sang kuan, ngak khut veik 237 baoh sang karei saong rilo radaih. Labaih 100 urang njauk rambuac saong 60 urang brei ba tame sang iek ruak. Thu tuong taneh ia ini  sanya brei daong sumu 5.000 ringgit (sumu 1.250 đôla Mỹ) ka yaok po sang hu sang danaok njauk apui mbang.

 Uy mban Chu thap do Dunya brei (ICRC) brei thau, dom urang oh ka duah mboh kayua taong paoh mesuh metak dalam dunya hu tagok tal tanut glaong abih dut haong meng dahlau mai, ngan haong labaih 56.000 bruk hu duah mboh dalam thun 2024. Cao uy Lien Hop quoc ka quyen urang menuac, ong  Volker Turk, ndom rilo ka bruk ini lac tanut tagok glaong abih dalam takik abih di 20 thun tapa, gam haong nan ndom lac rilo mbang taong paoh mesuh metak biak praong saong bruk maong biar hukum ilamo urang menuac dunya lac makna ba tal bruk rah tabiak ini.

Harak mbao New York Times harei 2/4 ba khaw tin “ ong praong” ngak mbang pablei salih gah dien tu My Amazon khin blei veik ung dung TikTok tuk ung dung ini dang anak njauk My pakau. Dalam panuac khan jaik ini, Tong thong My khan lac TikTok njauk pakauk di My oh glong saong meda  duah hu po birau dalam bruk ngak mbang pablei salih di TikTok di Mỹ dalau di abih tukvak ngak bruk.