Harei ini kapul bol lin saong kong an Viet Nam tame ngak bruk duah urang njauk bala dalam pambuk patau kayau di sang jaleih kateik saong daong samar chip urang njauk bala dalam mbang megei taneh di Myanmar. Ini lac kapul naih joi abih hu Viet Nam pandar nao ngak bruk daong bala. Hu mbaok tame duah urang njauk bala mbang ini daok hu 9 gru tacei ba saong 6 drei asau ngak bruk daok dalam Bo Tu lenh Bol lin Bien phong. Ini lac kapul huan mboh, duah mboh urang njauk bala samar abih piah kapul urang daong bala nao duah saong kapul bol lin y te daong samu.

Tinh Binh Thuan birau peih ngak sumu gauk dalam sami samar ralo ka bruk “ 50 harei ngak brei abih baoh sang oh daok taik tahak”. Urak ini, tinh Binh Thuan caong khin hu daong ngak sang birau  saong pasiam veik sang daok labiah 1.170 baoh sang hu ginup tui sarak saong labaih 860 baoh sang oh ka ginup bruk daong. Binh Thuan kham merat tal harei 30/6 anak tak, ngak brei salah siam abih baoh sang oh daok taik tahak ka urang kathaot, baoh sang jaik kathaot, baoh sang raidiuk kan kandah hu ginup sarak tui hukum karja. 

Pasak Yitvu bruk ngak tinh Hau Giang bahrau peih bruk ba 86 urang ngak bruk nao ngak bruk katut tukvak di Han Quoc, ngan haong bruk paik amraik saong traong ndaiy. Jien bilan di yauok urang labaih 36-37 trieu dong/bilan. Meng thun 2021 tal ini, Hau Giang hu ba labaih 2.000 urang ngak bruk tabiak negar langiu ngak bruk. Bruk ba dom urang ngak bruk tabiak negar langiu oh lac jalan brei bruk ngak, bo daok lac kein lagaih paglaong raidiuk urang ngak bruk haong baoh sang, daong patrun kathaot karo kajap.

Rilo bein la-u di tinh Tiền Giang daok njauk halak akok jhuk kaik palai, oh lac takik phun la-u gaok halak mbang metai abih. Urak ini labaih 270 ha bein la-u njauk gaok halak akaok njuk palai. Tukvak tapa, gah ngak nong hu pathau khan, tacei pato, daong ka dom po bein pruh jru, cakak klak hala, dhar njom ruak, sangka bruk iek glang phun la-u…Yau nan min, langik pandiak thu lagu yau nan ye urang ngak nong gaok rilo kan kandah dalam bruk pacang caga ruak, khik phun la-u ka siam. 

Tamia klan, sing, ine girai di urang Lo di Ban raya Ho Chi Minh hu ba tame harak angan drap ar ilamo oh mboh di meta pakat negar. Tamia lan, su, rong brei mboh raidiuk daok dang di bol bhap rahra bangsa Lo. 3 athur gireih: Lan, Su, Rong hu dalam damnei, oh hu biak di langiu, brei mboh ka hatai caong ginup meda, patuah jamo, tiaok dom bruk jhak, bhian hu tamia dalam dom harei roya, Tet Nguyen dan, Tet Trung thu, harei peih pakak, peih taneh…Tal ini, Ban raya Ho Chi Minh hu 5 drap ar ilamo oh mboh di meta hu ba tame Harak angan drap ar ilamo oh mboh di meta pakat negar.

Myanmar gaok bala megei tayun baoh taneh khang 7,7 meng blaoh meng blaoh, ngak metai tagok tal 1.700 urang, 3.400 urang njauk rambuac, 300 urang lahik oh ka duah mboh. Negar Thái Lan jiak nan, dom urang metai tagok 17 urang, 32 urang  njauk rambuac saong 38 urang lahik. Di Ban  Mandalay, Myanmar yaok pluh urang medil lac daok tavak ala pambuk patau kayau sang glong rilo tal jaleih kateik saong jaik abih kan tame hu atau ba tabiak meyah oh hu mac moc ngak bruk trak. Urak ini, rilo negar karei hu ba  bol lin manuac urang mai daong, kaya mbang, jru tavao mai daong ka Myanma ramik pasiam veik hadei baoh taneh tayun megei glut jaleih.

Mentri Noi vu Thai Lan pagun sanya brei salah blaoh bruk pasang iek mbang jaleih sang Jabat Kiem toan Karja glaong 30 tal di ban ine Bangkok, dalam 7 harei, kham merat daong urang njauk bala dak harei dak siam. Gam haong nan brei mboh dom urang hu pambuak tal bruk ini brei ciuk ka bruk di drei saong mbang pasang iek urak ini daok pataom tame gah thiet ke, pasang iek saong urang dang ngak sang glaong. Tui hukum Thai Lan hu ba tame pandar meng thun 1997, sang glaong Jabat Kiem toan Karja brei hu padang piah ciuk hu megei taneh.

Sa janih virus oh ka thau meng halei mai hu mboh di Nga, pambak ruak patuh tabiak darah saong pandiak glong, dalam tuk dut iek rauk COVID-19 saong kum oh mboh ruak. Urak ini kuhria oh ka mboh cambaic laic dom mbang urang njom virus jeng yau urang tame jru ruak. Camereip, dom urang njom virus mboh karei nan dalam rup glaih glar saong pandik lagah lagoi. Dom harei hadei di nan, prein yawa  urang jhak trun samar, meda pandiak dalam rup tagok tal 39 do C, ndih bet saong patuh tabiak darak. Dom gru jru oh ka duah mboh virus nan mai meng halei./.