Mon 17 tuk harei ini meda padeih brei tut angan palih ruah tame đại học di anek saih di He thong daong palih ruah anek saih di Mentri Pato megru. Kuhria tal jala pandiak harei kabroi, He thong daong palih ruah anek saih haong gauk di Mentri hu labaih 702.700 anek saih hu palih ruah tui hatai caong khin tame đại học thun 2024, meblah jaik 65,6% anek saih hu tame pakacah THPT thun ini. Hadei meng harei 31/7 mbiah tal mon 17 tuk harei 6/8, taong abih anek saih brei bayar jien tut angan online. Suai abih tal mon 17 tuk harei 27/8, anek saih brei ngak salah bruk tut angan palih ruah mbang 1.

Bilai Biên phòng Thạnh An pambuak haong Huyện đoàn Cần Giờ, TPHCM saong dom kapul halain hatain bilan pandiak hijao bahrau peih danak dak Harei ngak bruk tukvak tabung glaong sa tangin haong gauk dak padang xã đảo Thạnh An. Dalam danak dak daok hu dom bruk daong ba, alin pandap, alin jien bac ka anek saih; ngak pasiam veik tal bac saong sang vệ sinh di Sang bac Mầm non Thạnh An; alin pandap di Bilai Y tế xã Thạnh An. Danak dak halain hatain bilan he hijao hu patagok dom yaom glaong di hatai halain hatain di urang dam dara dalam bruk hu mbaok tame padang ngak palei pala bahrau, cak rok patagok kinh tế - xã hội di pak ini.

Dom urang bac si di Phan hieu gah Meraong, Học viện Quân y pambuak haong Bilaik iek ruak đa khoa - sang ndih tapui Nhân Nghĩa (tỉnh Bình Phước) birau peih bruk iek ruak, brei jru oh mek jien  saong alin pandap ka dom baoh sang sarak karja saong bhap bini bangsa takik di xã Thọ Sơn, huyện Bù Đăng. Tui trunhg tá Đỗ Việt Hồng, Pho Yam ndoc Phân viện gah Meraong, Học viện Quân y, dalam labaih 10 thun tapa, đơn vị iek ruak, brei jru, alin pandap ka jaik 3.000 bhap bini di tỉnh Bình Phước. Harei nan, kapol hu jao brei jaik 300 paok pandap ka dom baoh sang sarak karja saong bhap bani urang bangsa takik, yaok paok pandap hu yaom 450 ribau đồng. Kuhria abih tih jien buh tame peih ngak danak dak jaik 200 trieu dong.

UBND tỉnh Trà Vinh bahrau pathau khan bruk samar drah di bala glut jaleih taneh di labik jalan ar tapen kraong Hậu di dua xã Ninh Thới saong Hòa Tân, huyện Cầu Kè. Urak ini di labik jalan ini rahtabiak 15 labik glut jaleih, atah abih tih jaik 1km. Dalam nan mboh 3 labik glut jaleih biak trak mbang dalam tame meng 5-10m, hu labik glut jaleih tame jaik takai jalan atah labaih 200m. Dom thun jaik di ini, ia tagok glaong ngak dauk saong glut jaleih takai kraong, ngak khat lahik tal bruk ngak, ngak kan kandah biak trak tal raidiuk di rahra.

Tỉnh Cà Mau hu labaih 500 labik ngak hadang pajaih saong labaih 300 labik pabam hadang pajaih. Yau nan min, jaik abih dom labik ngak tabiak tui jalan sit sot, yau nan ye hadang pajaih tok pabak labaih meteh urang raong glang, ralo lac pajaih hadang su. Piah brei hu pajaih raong, anak tal, tỉnh Cà Mau pamong tal bruk ba tame pandar ilamo - kong  nghe  piah ngak tabiak pajaih siam khang kajap, pacang hu ruak saong pabak pajaih hadang, asar siam, ngak tabiak di sa labik brei pabak ka bruk raong; parilo mbang iek ruak ka pajaih saong tui iek jit ruak…

Tui Tổng cục Yaok pataom pakat negar di Hàn Quốc bahrau ba tabiak brei mboh dom urang kumei hu bruk ngak glaong jang di urang likei. Kuhria tal thun 2023, dom urang kumei dalam umo 20 thun hu bruk ngak lac 63% dut saong urang likei lac 58% gam dalam umo thun. Makna lac kayua dom bruk ngak pambuak tal gah dich vu tagok glaong. Bruk atah gauk di likei saong kumei hu bruk ngak daok hu dui katut panak veik hadei di rilo thun bruk ini pleng nao gah likei. Bruk ini brei mboh bruk patagok biak rilo di bruk bac dai hoc saong hu bruk ngak di urang kumei.

Bol bala Thái Lan birau khan brei thau Tapuk mbong - Sách trắng ka Quoc phong thun 2024. Tui nan, Bol bala brei thau ka bruk khin paglong samar chip ilamo pacang caga ka taneh ia piah caga dom bruk sraw kadau an ninh daok dak harei dak ralo, khik kajap bebat độc lập saong khik tani tanat an ninh taneh ia. Mentri Quoc phong Thái Lan khan brei thau Tapuk-Sách trắng hu khan brei mboh cambaic laic, jhul pakhang bruk thau cambaic laic jang di bhap bini ka bruk ngak di bol bala dak harei catang.

Meng bruk pachreih ba di yaok rabau tuai damuai, 38 urang hu mbaok tame pakacah chat tatua meng kan di ban Mostar, Bosnia saong Herzegovina. Ini lac sa bruk pahadar 20 thun harei padang ngak tatua ini hadei di mbang mesuh metak. Tatua Stari Most hu padang ngak meng abap 16 saong lac sa labik kiến trúc zaman Ottoman. Thun 2004, tatua hu padang ngak gilac yau angan je di bruk ngak pasiam veik saong yasa. Mbaik tatua jeng hu Gah pato magru, Khoa hoc saong Ilamo di Liên Hợp Quốc (UNESCO) pok brei angan lac Inem krung ilamo Dunya di thun 2005./.