Tui nan, tỉnh Bà Rịa - Vũng Tàu ba tabiak bruk lac taong abih gilai ikan ngak salah bruk tut angan, đăng kiểm, taong laik gilai ikan, brei harak adat taong chap ikan, pagam jamraih tui eik gilai ikan tui adat; Pasang iek taong abih gilai ikan tuk tabiak tasik, gilac veik mai tapen gilai, balai biên phòng di tasik; khik brei taong abih gilai ikan atah meng 15 mét  tagoak brei tame tapen tasik tui tacei ba;  tui eik  luac harei melam taong abih gilai ikan nao tasik tapa mac jamraih.  

Harei kabroi, Bộ Tư lệnh Bhum 4 Lin tasik pambuak haong tỉnh Ninh Thuận peih nyaom biai pathau khan ka tasik, pulao kaoh, dui pachreih prein yava dak padang Quân chủng Lin tasik ka jaik 500 anek saih tal bac 12 di Sang bac THPT chuyên Lê Quý Đôn saong Sang bac THPT Nguyễn Trãi dalam tỉnh Ninh Thuận. Tapa ini, Bộ Tư lệnh Vùng 4 lin tasik hu jao 5 triệu đồng brei Kadung jien pachreih bac di Sang bac THPT chuyên Lê Quý Đôn; 3 triệu đồng brei Kadung jein pachreih bac di sang bac THPT Nguyễn Trãi saong 10 paok jien bac (yaok paok 300.000 đồng) ka anek saih sang kan kandah.

Dom tinh Tay Nguyen daok tame tabung glong bilan thu, pandiak bhang thun ini biak khang jang yaok thun. Tỉnh Gia Lai iew dom gah khik ramik binek thủy điện brei hu jalan peih thuak ia njauk lagaih gam peih điện saong brei ia pruk dalam bilan pandiak bhang ka phun pala, athur raong. Tỉnh Kon Tum,  hu labaih 1.700 ha phun pala meda thu lagu, kurang ia. Dalam tỉnh Dak Nong  hu labaih 300 danak dak ribaong kraong, abih tih hu labaih 172 trieu met khoi ia, mbiah tal ini ia tok hu 75 trieu met khoi; 29 danak dak ribaong kraong abih ia atau jaik  thu abih, mbuan ngak brei kurang ia pruh ka labaih 8.600 ha phun pala.

Tỉnh Quảng Ngãi daok pataom prein tame khik ramik sap ndem panuac puac di 3 bangsa takik lac Hrê, Cor saong Ca Dong. Sở Nội vụ tỉnh Quảng Ngãi hu pambuak haong Sang bac Đại học Phạm Văn Đồng peih dom tal pato  sap bangsa Hrê saong Co ka urang jakar, công chức, viên chức, gru pato, abih di nyu nan lac dom urang daok ngak bruk di dom huyen bhum ceik. Langiu di nan, tỉnh Quảng Ngãi daok ngak Danak dak Ilamo “Padang ngak asal kadha online sap bangsa takik Yuan - Hrê, Yuan - Co” piah daong ka bruk pato magru, bac taa, roh duah sap ndem, akhar vak di mikva.

 Huyen Krông Pa, tỉnh Gia Lai birau peih ngak Harei ilamo, the thao dom bangsa takik; Nyaom darak pambuak kayua nong saong Nyaom daoh tamia bhap bini peih ngak bika chreih chrai, hu mbaok di yaok rituh nghe nhan hoang dom asar kadha: padang ngak veik le hoi meng kan, parang ma-in kong chieng, daoh tamia bhap bini, parang ma-in alat ragam bangsa, ngak iek bruk ngak meng kan, dieu hanh angaok jalan, parang iek khan ao meng kan. Nyaom pataom hu makna kinh te, xa hoi biak dalam piah peih ngak  hu siam dom jalan ngak di Đảng, sarak, hukum di Karja ka bruk bangsa, padang bruk jum pataom taong abih bhap bini, patagok ilamo, nghe thuat.

Kapul daong duah urang njauk bala di Trung Quốc daok kham marat ba dom rahra daok gar kayua ia dauk ia sua biak khang di dom puk palei pak tỉnh Quảng Đông, gah maraong negar Trung Quốc. takik di nyu 11 urang lahik, jaik 54 ribau urang hu ba tabiak samar drag. Jabat kuhria mboh dahlau bruk langik tasik Trung Quốc brei thau lac, hajan daok trun manieng min rilo sang bac, labik ngak bruk di karja jeng daok kreik pabah mbang. Tui kuhria, bhum ini daok hu hajan khang di adit tal. Ini lac bilan hajan tal aval jang dut saong yaok thun lac di puac bilan 5 akaok bilan 6.

Hãng ngak radaih điện Tesla di tỷ phú Elon Musk harei kabroi khan brei thau yaom pablei rai dom mau radaih di urang di dom darak apsar praong, dalam nan hu Trung Quốc saong Đức. Bruk ngak nan piah pacang bruk pablei hu takik saong bruk meriak gauk biak khang di darak pasar radaih điện. Dalam tuk nan, dom gah meriak gauk di Trung Quốc, darak pasar ô tô praong abih di dunya, daok ba tabiak rilo radaih birau yaom lap jang. Cổ phiếu Tesla trun 40,8% dalam thun ini.

Jabat pasang iek langik tasik Copernicus di Liên minh châu Âu (EU) saong Gah Kuhria mboh dahlau bruk langik tasik Dunya (WMO) harei kabroi brei thau lac, Châu Âu dak harei dak tame dom mbang langik pandiak biak khang tal tanut bo rup pabhap anek manuac oh lagaih hu. Dalam sa pathau khan ka gah langik tasik châu Âu brei thau, thun 2023 lac thun pandiak khang abih di dunya meng di tuk dom mbang pandiak khang hu mboh. Châu Âu lac bhum taneh pandiak tagok samar abih di dunya saong dom urang metai pambuak tal langik pandiak tagok labaih 30% di châu Âu dalam 20 thun tapa./.