Di Nyaom biai pakat negar pataom iek veik taong abih bruk HĐ bhap bini dom tỉnh, ban di T.Ư thun 2022 saong ba tabiak jalan ngak bruk thun 2023 peih tabiak harei 21/2, UV Mentri Chính trị, Akok QH Vương Đình Huệ brei thau, thun 2023 QH saong HĐ bhap bini brei peih bruk mek phieu tín nhiệm ngan hong dom urang kayua QH, HĐ bhap bini palih ruah atau mbaoh tangin tame. Akok QH brei thau, ini lac mbang mek phieu tín nhiệm dalam vaktu, rik daong taong yaom urang jakar ka bruk ngak piah urang jia tame saong ngak hu siam bruk hu jao brei.

Ndom ka bruk ngak jalan Vành đai 3, UBND TP.HCM ba tabiak bruk lac meda jao 90% mbaok taneh ngak jalan Vành đai 3 dahlau di harei 30/6 thun ini saong ngak salah abih bruk nan di jhung thun 2023. UBND TP ieu dom gah, dom puk palei ngak ka nyu salah bruk kuhria caga, bayar jien, rami ramik labik daok bahrau, tabiak harak mek veik taneh, patabiak jalan bayar jien, daong saong ramik labik daok bahrau di bilan 4 saong bilan 7/2023. Vành đai 3 TP.HCM atah abih tih labaih 76,34 km. Jalan hu peih tabiak ngak di bilan 6/2023 saong hu ngak salah, brei radaih peih meneing di thun 2025.

UB bhap bini ban Cần Thơ birau payua harak tagok Mentri KH saong Đầu tư haong Mentri Jien padai pasang iek, piah pok tagok Thủ tướng Rajaei mbaoh tangin tame danak dak padang ngak tatua Ô Môn tapa kraong Hậu pambuak ban Cần Thơ saong tỉnh Đồng Tháp haong yaom jien abih tih jaik 9.200 tỷ đồng. Tui kuhria mboh dahlau, phun jien buh tame ngak danak dak labaih 9.187 tỷ đồng sumu labaih 374 triệu USD. Tui UB bhap bini ban Cần Thơ, danak dak  tatua Ô Môn meda peih tabiak sa jalan pajeng ba siam saong salamat, trun takik bala angaok jalan mbak saong nerak tachrauk alam moi truong ka khu vuc bhap bini hu jalan nao tapa, abih di nyu lac trun meneing bruk gar jalan ka Jalan raya 1.

Panuac khan meng Sở Pato Megru tỉnh Vĩnh Long, mbang pakacah pilih ruah anek saih tal 10 thun ini hu peih tabiak di bilan 6/2023. Kadha bahrau di mbang pakacah lac tỉnh oh peih bruk pakacah bo tok pilih ruah iek tui bruk bac da-a di 4 thun bac Trung học cơ sở. Điểm pilih ruah lac điểm hạnh kiểm saong bac da-a di 4 thun bac trung học cơ sở parabha dua, hadei di nan cộng điểm ưu tiên (meyah hu). Dahlau di nan, Đồng Tháp lac tỉnh camereip abih brei thau bruk pilih ruah anek saih tame tal 10 tui jalan pilih ruah.

Di tỉnh Bạc Liêu birau rah tabiak glut jaleih ar tasik Biển Đông atah 30m, jalan pambuak dua tỉnh Bạc Liêu - Sóc Trăng di xã Vĩnh Trạch Đông, ban Bạc Liêu. Piah caga dahlau, oh caik rah tabiak bruk glut jaleih ar pacang, anak meta, Chi cục Thủy lợi brei tuh patau piah pacang khik. Urak ini, tỉnh hu rilo labik glut jaleih trak, dalam nan hu jalan Biển Đông. Caga bruk glut jaleih nan, UB bhap bini tỉnh ba tabiak Danak pacang caga glut jaleih ar kraong, ar tasik piah pasiam pakhang, pakajap ar pacang, tani tanat raidiuk bhap bini dalam bhum glut jaleih taneh. Tui kuhria mboh dahlau piah ngak danak dak nan tal thun 2023, njauk hu labaih 19.200 tỷ đồng. 

Karja Tổng thống Mỹ Joe Biden hu ba tabiak sa jalan ngak bahrau piah patrun patakik meuac likau tị nạn, piah pacang veik bruk rilo menuac tuh mai bhum tapen negar gah meraong. Dom quy định bahrau caik ka urang di cư tal Mỹ brei nộp đơn likau tị nạn tui jalan online tapa ứng dụng CBP One di rajaei saong ba tabiak harei sanya taom gaok urang jakar Mỹ, atau likau tị nạn dahlau di taneh ia bo urang nao tapa angaok jalan nao tal bhum tapen negar Mỹ. Dom menuac oh ngak yau nan saong daok kham merat yam tapa jalan tapen negar, hu maong lac oh ginup kadha piah likau tị nạn.

Viện  Pasteur di Pháp birau brei thau hu urang ka 3 di dunya taong dhit ruak  HIV/AIDS meng bruk pagam tuy talang. Urang ruak daok taong ruak bạch cầu di sa sang iek ruak di Đức hu pagam tủy talang meng sa urang alin brei mboh jaik đột biến tế bào gốc oh bhian mboh, meda pacang hu HIV. Yaom lac tal tukvak ini, oh hu jru atau vaccine pacang ruak HIV/AIDS, min dom urang dhit ruak hu brei thau  di dunya ba mai siam mekre dalam bruk jhul kadun likuh ruak the ky nan. Kuhria meng tuk dom urang njom ruak akaok meti  hu mboh dahlau di ini 40 thun,  HIV/AIDS ngak brei labaih 38 trieu urang metai di dunya ini.

Tui CNN, sa baoh iPhone camereip daok tamo tabiak mbaok meng thun 2007 hu ba tabiak pablei to yaom labaih 63.356 USD (lac jaik 1.5 tỷ đồng). Baoh iPhone ini daok tamo pa-op, oh ka gaok tal, oh ka hu pandar. Baoh phone ini hu màn hình 3,5 inch camera 2 megapixel saong  bộ nhớ 4 GB haong 8 GB, pambuak hu haong Internet saong iTunes, min oh hu cửa hàng ứng dụng. Po di baoh phone ini, lac anai Karen Green. Anai hu gauk gar alin brei di thun 2007, tuk anai bahrau nao ngak bruk. Min kayua tok hu pandar mạng AT & T nan ye anai ba tame mepiah dalam tu khan ao./.