Hadei pagam tinh, ban, thun ini lagaih ralo mbuan ka Ban Can Tho akaok meti hu dang akaok negar ka bruk pablei kaya dalam ia saong pablei hadang tabiak negar langiu. Kayua hadang pablei tabiak negar langiu 8 bilan tapa biak mbuan mbiah. Jaik abih dom kong ty  ngak hadang pablei tabiak negar hu patagok dut sang tukvak ini thun dahlau. Njauk ndem tal lac mbang akaok meti  Kong ty Fimex Viet Nam patagok jien mek tame meng bruk pablei hadang tabiak negar langiu, labaih 192 trieu USD. Tui sa po ngak mbang pablei salih khan lac, meng bruk peih praong darak pasar, buh jien tame blei mac jamraih piah ngak tabiak dom janih pandap hu yaom glong…meng nan bruk pablei hadang jeng yau kaya dalam ia tabiak negar langiu  mek tame hu rilo jien.

Parang iek bruk ngak mbang kinh te - xa hoi jak jeng di tinh Vinh Long jaik peih ngak piah uan raok Nyaom roya Dang bo tinh vaktu 2025-2030. Bruk parang iek daok lac piah maong veik bruk cakrok patagok, brei mboh dom bruk jak jeng praong, pabak prein khang saong hatai jia tame vaktu birau. Dom gah di tinh Vĩnh Long ba tabiak jalan pathau khan ka anek saih sinh vien saong bhap bini mai rivang iek labik parang, rik daong  pambak praong ilamo meng kan, pamedeih jalan diukrai di mukkei meng kan, brei mboh bruk ngak di urak ini saong pamong tal bruk cak rok harei hadei.

Urang ngak nong di tinh Ca Mau daok yuak padai he thu, yau nan min, yaom padai trun biar, urang ngak hamu oh hu laba labaih. Muk Nguyễn Thị Giang, Pho Yam ndoc So Ngak nong – Moi truong Ban Can Tho khan lac: urak ini rilo HTX pablei padai peih bruk daong urang pambu meng mac, khik piah cang tagok yaom pablei. Langiu di nan, gah ngak nong daok ngak bruk haong doanh nghiep blei padai, pablei brah ralo piah kham merat blei padai tame piah, daong ka urang ngak hamu yam tapa kan kandah; da-a urang ngak mbang pablei salih pambuak bruk ngak padai, blei veik padai brah di urang ngak nong.

Melam 21 bilan 9, hajan praong tuh trun khang dom jalan di Dong Nai yau Trấn Biên, Trảng Dài, Tân Triều ba tal rilo labik dauk dalam ia. Dom jalan dalam labik bhap bini daok dauk dalam ia, ia tame sang bhap bini. Hajan di balai Bien Hoa biak praong, sumu 68 mm. Tui Jabat dut kuhria langik tathik Dong Nai kakei  hajan praong daok rah tabiak di dom labik angaok nan saong peih praong tabiak labik jiak taphia. Bhap bini brei caga dahlau ia dauk dom labik dhaong  dalam kayua hajan praong. 

Adat ngak yang Nghinh Ông Cần Giờ 2025 nan lac Drap ar ilamo oh mboh di meta pakat negar peih ngak di xa Can Gio, TPHCM di akaok bilan 10 anak tal. Bruk praong di Adat ngak yang Nghinh Ông di tathik saong Adat taduan raok kapol Nghinh mai Kalan Ông, brei mboh bruk ngak praong prang saong ndung bak ilamo  di urang bhum tathik. Ini lac adat praong abih di urang ngak mbang di tathik xa Can Gio ( dahlau diah lac huyen Can Gio), piah likau brei hajan hangin hu lagaih, prein kaya bhap bini rahra karo kajap, raidiuk trei sir, haniem phol.

Bhap bini Campuchia daok dalam mbang padeih padei harei roya Pchum Ben 2025, dui atah dalam 3 harei, mbiah tal harei 23 bilan 9, dalam dom bruk peih ngak roya Kan Ben saong Pchum Ben. Ini lac piah ka bhap bini thau dhar phol tal ong muk kei  drei, jeng lac makna praong piah taom mbaok gauk gar dalam sang, adei sa-ai but pajaih atah jaik. Harei Pchum Ben thun ini, Thu tuong Rajaei Patao Campuchia  hu payua panuac tadhau ayuh siam mekre saong haniem phol  tal taong abih bhap bini dalam saong langiu negar.

Di Thai Lan, ia ribuk rah tabiak di 13 tinh, 57 huyen gaok kan kandah tal jaik 220.000 bhap bini saong ba tal 3 urang metai. Jabat chuc nang Thai Lan daok jhul khang dom jalan pacang caga ia sua, pasang iek saong peih kareik ia di dom danak dak  ribaong kraong  piah khik ia hu siam. Gah chuc nang  hu ba rilo gilai piah pajeng bhap bini. Rilo labik pabak ia hacih di labik ini labik diah  saong ging tahaneh mbang padang gah langiu.

Dalam bruk kham merat cakak trun meneing jien cai pandar ka bhap bini saong tani tanat yaom xang menyek dalam negar, Rajaei Malaysia birau ba tabiak danak dak daong yaom xang birau. Tui nan, bhap bini Malaysia hu harak peih radaih brei blei ralo 300 lit xang RON 95 yaok bilan tui yaom daong labaih 0,42 USD sa lit. Rajaei Malaysia caong khin danak dak ini ba mai kein laba ka labaih 16 trieu bhap bini, rik tame tani tanat raidiuk saong pakhang bruk kein lagaih di sarak daong raidiuk rahra di tuk kinh te dunya rilo kan kandah.