Urak ini, di Ban raya HCM birau hu 11/19 pasak đăng kiểm ngak bruk, daok veik oh ka thau tuk halei meng ngak bruk veik, yaom lac meng blaoh rilo pasak hu taduan bruk daong di dom urang đang kiểm  bol lin. Tui yaok pataom di Cục Đăng kiểm Việt Nam,di TPHCM, dalam bilan 3/2023, dom radaih abih tukvak pasang iek lac jaik 49.000 sruh, prein pabak  di dom pasak dut iek tok hu 55%. Dalam bilan 4 thun 2023 hu tal 84.600 sruh radaih tal tuk pasang iek saong prein ngak bruk tok pabak  hu 31%.

Rilo thun ini mai, tỉnh Long An hu ieu bhap bini di bhum Đồng Tháp Mười oh kuac raok danao raong hadang di mangaok taneh ngak padai, kayua ini lac labik ia taba. Min bhap bini jeng oh padeih patagok taneh raong, ngak pambak tal môi trường, ngak tayah bruk quy hoạch bhum pala padai labik ini. Anak bruk ini, gah ngak nong hu panuac tagok UBND tỉnh tacei pato dom puk palei oh caik rah tabiak taneh raong bahrau. Meyah hu sang halei kuac raok danao raong, karja dom puk palei brei ngak catang meng akaok, nan lac gam langyah, taong phạt gah hành chính, gam brei ngak veik mbaok taneh yau tuk camereip.

  Urang ngak nong di Tiền Giang daok tame bilan paik baoh durien aval dalam bui sambai hu rilo baoh, pablei hu yaom glong. Di dom labik pala sa janih durien urang mai blei yaom 90.000 đồng tal 120.000 đồng sa kilo tui baoh siam, glong abih dut haong dom janih baoh kayau karei di tinh. Durien di Tiền Giang kuhria rah tapa hu 25 tấn sa ha. Meng yaom yau angaok nan, yaok ha durien pablei hu meng 2,2 tal 2,4 tỷ đồng, kaoh abih jien buh tame ngak, mikva daok laba hu meng 1,2 tal 1,4 tỷ đồng. Meng durien hu rilo baoh, rilo urang ngak nong padang mbang ngui hu khang kajap.

Piah caga pacang pandiak bhang, kurang ia, njaom ia mbak dalam bilan thu thun ini, UBND tỉnh Hậu Giang ieu dom puk palei tui iek bruk njom mbak piah kuac raok dom ribaong saong pok ar pacang di dom labik akaok ribaong pakat 2, pakat 3 saong ribaong dalam mblang hamu tuk mbak tagok tal 1,5‰. Oh caik ka mbak njaom tame mblang hamu, piah khik ia taba ginup pruh ka phun pala saong ia pandar ka mikva dalam bhum pandiak bhang, ia njaom mbak. Gam haong nan, pathau khan, jak ba bhap bini khik piah ia taba, khik ginup ia pandar dalam bilan pandiak, mbak thun ini.

Di tỉnh Kiên Giang jeng daok bruk gilai ikan lahik pambuak hu angaok tasik, piah pasiam bruk nan, Mban tacei ba jalan pacang bruk taong chap ikan suan hukum, oh khan brei thau saong oh tui bruk ba tabiak di IUU tỉnh, iew dom gah tui iek luac harei melam taong abih gilai ikan ngak bruk ngaok tasik tapa jamraih  tui iek gilai ikan. Dom gilai ikan brei khik hu bruk salamat ky thuat, hu tut angan, pandap mbang hacih sa-at di gilai ikan, harak adat brei taong chap ikan, vak siphau piah tui iek bruk taong chap ikan, harak gal urang peih gilai, urang mac di gilai ikan tui hukum ba tabiak.

Dalam tuk bruk mesruh pacang ruak lao di dunya daok gaok rilo cuang kandah, tavak tavaiy hadei di jit praong COVID-19, Harei dunya pacang caga lao 24/3 thun ini hu angan ieu lac “Njauk! Kol drei meda palahik abih ruak lao”, yau sa panuac lac bruk “palahik” ruak lao lac meda ngak hu. Ruak lao jeng daok lac 1 dalam dom ruak njom mbak mbuan metai lahik abih di dunya. Yaok harei, jaik 4.400 menuac metai kayua ruak lao saong jaik 30.000 urang njauk ruak. Lao lac ruak njaom mbak ngak brei metai lahik glaong ka 2 hadei di COVID-19, glaong jang ruak HIV/AIDS. Jaik 25% menuac sia dunya njauk ruak lao dalam rup oh ka tamuh tabiak gah langiu.

LHQ saong dom gah pambuak bruk daok jhul khang bruk parabha pandap daong tal dom labik gaok kan kandah trak kayua megei baoh taneh di Thổ Nhĩ Kỳ saong Syri. Urak ini hu 973 radaih pajeng pandap daong pahala meng 7 jabat LHQ tal bhum Tây Bắc Syri. Dahlau di nan, hu 34 kapol nyaom pasang iek di negar langiu mai labik ini. Dom kapol hu rivang bhap bini piah taong yaom bruk caong khin daong jeng yau  parabha  dom bruk daong ngak pahala. Rilo kapol nyaom daok pabak dom var mbang pandiak ka labaih 1,25 trieu urang yaok harei di Thổ Nhĩ Kỳ. Langiu di nan, labaih 623.000 urang hu daong ia hacih saong dom bruk ngak brei hacih sa-at.

Dom urang ilamu negar Japon duah mboh hu sa janih phong lan bahrau hu dom bingu lapih yau kaca hu sambo bingu caraih haong mbong patih. Yaom lac janih bingu ini tamuh rilo di dom mblang bein di negar Japon min dom urang roh duah di Đại học Kobe jeng lahik abih 1 pluh thun piah thau cambaih ini lac janih phun oh ka hu thau tal dahlau daih. Angaok dunya urak ini hu jaik 28.000 janih lan hu thau tal. Min tui bruk diukrai dak harei dak lahik nao, daok mbuan ngak brei lahik rilo janih  lan./.