Ban raya HCM birau patabiak 18 tanut piah padang ngak sang bac haniem phol. Tui nan, 18 tanut padang ngak sang bac haniem phol hu parabha jeng 3 nyaom tanut. Cambaic laic, nyaom tanut chuan ka Anek manuac, nyaom tanut chuan ka bruk Pato bac saong bruk pato pakai, nyaom tanut chuan ka Moi truong. Abih di nyu, dalam nyaom tanut chuan ka moi truong, TPHCM kakei dalam học bạ njauk brei tavak dom bruk ngak hu siam daok bruk oh ka siam, daok kurang ye brei takik tuk daok ngak anek saih. Tuk taong yaom bruk daok kurang, njauk brei pasang iek luac tuvak hadei tuk pambuak haong baoh sang daong ka anek saih; iek cambaic laic akhar huroh tuk tavak tame học bạ di anek saih. Tui nan sang bac brei khik piah hồ sơ pambuak tal kỉ luật anek saih tui bruk ba tabiak, oh cih, vak jaln kỉ luật học sinh tame học bạ.

UBMT nehar tỉnh An Giang, mBan jak ba Kadung jien “kayua urang kathaot” tỉnh bahrau peih bilan tabung glaong “kayua urang kathaot” saong jak ba “Phun bilan xuân” Tết anek sak girai 2024. Pak di tuk peih bruk, dom urang ngak pahla, labik agama saong doanh nghiệp dalam saong langiu tỉnh hu tut angan daong labaih 186 tỷ đồng. kayua lac tỉnh taphia negar, bangsa saong bhan hu bala meng langik tasik, ia dauk ia sua, glut jaleih takai kraong nan ye dalam tỉnh urak ini daok hu labaih 14.872 baoh sang kathaot saong 24.370 baoh sang jaik kathaot 

Bilan 12 anak tal di ban Vị Thanh, tỉnh Hậu Giang meda peih ngak Adit du lich ngan haong ilamu kaya mbang tỉnh Hậu Giang thun 2023. Adit meda hu klau labik praong, nan lac: Labik dulich, labik ilamu, labik kaya mbang. Dalam nan, labik dulich brei pambuak haong kapal dulich Xà No, pambak tame ilamu daoh Đờn ca tài tử, daoh Aday… Hậu Giang pataom tame định vị hu jak jeng dua labik du lich patagok di bhum saong dalam taneh ia, nan lac: du lich di Ribaong Xà No; ba tame ngak hu siam Labik Khik ramik alam dunya Lung Ngọc Hoàng pambuak dom Labik inem mek sajarah dakrai di huyen Phụng Hiệp saong darak angaok kraong Ngã Bảy...

Bilan 11 tal, tỉnh Kiên Giang brei peih Harei pataom ilamu Thể thao saong Du lịch bhap bini Khmer mbang ka XV, njauk di tuk Ok-Om-Bok di urang Khmer. Dalam danak dak, langiu di adat ieu yang ia bulan, pakacah ghe Ngo, daok hu rilo bruk ngak karei yau ye: Nyaom darak pablei salih saong yaih khan pandap palei, parang iek thaot binguk, pandap panda hu pambuak tal raidiuk, bruk ngak mbang ngak huak di urang Khmer; parang iek, yaih khan tapuk, pakacah urang kumei Khmer siam binai saong parang me-in phleing ngũ âm tỉnh Kiên Giang. 

Yaok pluh baoh sang bhap bini di khu phố Ninh Chữ 1, ban sit Khánh Hải, huyện Ninh Hải, tỉnh Ninh Thuận daok haduh hatai kayua riyak tasik lih tame mbaok taneh dak harei dak trak. Rilo baoh sang, danak dak padang ngak glut jaleih ba tal bhap bini brei panduan ba nao labik karei piah hu salamat ka manuac jeng yau drap ar. Anak bruk riyak lih tame, UB bhap bini tỉnh tacei ba gah chức năng, UB bhap bini huyen Ninh Hải brei ngak dahlau, hu jalan brei thau dahlau saong peih ngak jalan pacang caga siam ka manuac, drap ar di bhap bini dalam bhum.

Kinh tế Trung Quốc daok hadah hadai veik yaom lac darak pasar sang danaok taneh riya daok ndih kandang. GDP Trung Quốc hadah tagok dalam quý 3 meng blaoh, tuk tagok 1,3% duk haong quý dahlau. Menuac oh hu bruk ngak di ban praong daok 5% dalam bilan 9, trun meng 5,2% dalam bilan 8. Cục Yaok pataom negar Trung Quốc taong yaom lac bruk siam veik kinh tế hu cambaih laih jang dalam quý 3, kuhria mboh lac meyah tagok dalam quý 4 labaih 4,4%, taeh ia ini meda mek hu bruk patagok abih thun.

Di Nyaom biai pakat glong pacang pachot pagat di dunya pak di Lisbon, Bồ Đào Nha birau peih tabiak brei thau lac, dom urang pachot klaik kuhria labaih 1,02 ribau tỷ USD di dunya meng bilan 8 thun 2022 tal bilan 8 thun 2023. Dalam nan, kuhria rah tapa, urang njauk pagat pachot di Singapore lahik jien ralo abih. Dom jalan pachot pagat ralo lac pambuak tal bruk blei online, klaik angan je saong jien padai. Tui dom urang ilamu ye dom urang pachot pagat daok pandar dom jalan kan thau jang nan lac pandar cong nghe deep fake, dom jalan duah thau bru pachot pagat yau dahlau diah oh daok lagaih.

Gah lin kapal haok Hàn Quốc (ROKAF) brei thau, anai Lee Ho-jeong, 41 thun, urang Việt Nam nhập cư, hu jeng 1 dalam 4 urang hu pilih ruah ngak menuac peih kapal haoh di negar Hàn Quốc saong meda peih kapal haok chiến đấu T-50 di parang iek hàng không Seoul. Anai Lee nao Hàn Quốc tui pasang meng thun 2001, tame quốc tịch Hàn Quốc di thun 2007, hu 2 urang anek, ngak bruk di gilang pariak saong pato sap Việt. Anai pasram pahat saong hu harak peih kapal haoh sit. Yam tapa rilo mbang pilih ruah biak catang, anai Lee hu jeng 1 dalam 4 urang hu pilih ruah ngak menuac peih kapal haoh pakat negar di Hàn Quốc thun ini./.