Ban Thủ Đức lac đơn vị kaok meti di Ban raya HCM brei harak adat pandar taneh atau daok lac sổ đỏ ka sang daok tạm, sang njuak labik quy hoạch dom danak dak oh ka ngak atau oh lagaih. Bruk nan brei lang talaih dom kan kandah ka rilo bhap bini daok di dom labik quy hoach hu danak dak padeih ngak suai labik rilo thun tapa. Luật sư Nguyễn Tuyết Nhung, Kapol Luật sư Ban raya HCM brei thau: “Hu brei sarak sổ hồng  ye urang meda pablei atau blei jeng ye caik veik, padang piah mesre phun jien, brei mboh bruk ngak po njauk tui hukum”.  Bruk mbaok harak brei sổ đỏ ka sang daok tạm dalam labik quy hoach padeih suai yau nan ye caong khin yaok ribau baoh sang bhap bini di Ban raya HCM dalam nan hu dom labik quy hoach padeih ngak yaok pluh thun.

Sóc Trăng lac tỉnh hu rilo urang bangsa Khmer diukrai abih dalam negar, ngan haong labaih 362.000 urang, meblah 30% bhap bini dalam tỉnh. Tui jalan anit ranam daong gauk, “oh caik thei veik gah likuh”, tỉnh Sóc Trăng jak ba ralo gah XH piah daong padang sang daok ka urang kathaot, abih di nyu lac baoh sang urang Khmer oh ka hu sang daok. Meng thun 2021 mbiah tal ini, dalam tỉnh hu jak ba daong padang ngak labaih 5.240 baoh sang ka urang kathaot, kuhria abih tih labaih 280 tỷ đồng, dalam nan hu labaih 1.870 baoh sang urang Khmer hu taduan baoh sang birau.  

Di Labik khik ramik ilamo bangsa S’tiêng Sóc Bom Bo, huyện Bù Đăng, tỉnh Bình Phước birau peih ngak Adat Pambuak ayut bhap bini piah padang gilac veik adat meng kan nan, rik tame daong khik ramik, patagok ilamo di bhap bini takik. Pambuak ayut bhap bini lac adat meng kan di bhap bini bangsa S’tiêng. Tukvak tapa, adat cambat nan dak harei dak labik, rilo anek kamuan bangsa jaik abih oh thau atau tok pang ndem ka adat nan min. Yau nan ye, karja bhum palei  padang ngak gilac veik  piah lagaih khik ramik saong patagok ilamo siam gheih meng kan di bhap bini dom bangsa takik, dalam nan hu bhap bini S’tiêng.

Adat pakacah Ghe ngo TPHCM birau hu peih ngak di kraong Nhiêu Lộc, Thị Nghè ngan  haong kadha “ Taneh ia chreih chrai ot tanot”. Pakacah ghe ngo Quan 3 mbang ka 2 hu mbaok di 12 kapol mai meng dom tỉnh, ban gah Meraong negar: Ban raya Hồ Chí Minh, Bình Dương, Cần Thơ, Sóc Trăng, Kiên Giang...Ini lac bruk hu makna dalam piah pok meyaom ilamo urang bangsa Khmer Nam Bộ, pakhang bruk jum pataom taong abih bangsa, rik tame yaih khan,  pambuak praong dom ilamo  siam gheih di urang bangsa Khmer  Nam Bộ dalam 54 bangsa Viet Nam.

Gah bol lin bien phong tỉnh An Giang pambuak haong jabat chuc nang birau chap mek bruk pajeng pháo duak tagok tal labaih 100 kilo. Tapa pasang iek, gah chuc nang hu mboh dalam thung radaih hu 3 thung carton saong 2 kadung tải pháo kuhria abih tih 115 kilo. Urang pajeng ba pháo patuh ini hu blei meng Campuchia piah ba mai Viet Nam pablei. Sa bilan gilac veik, dom gah chuc nang hu chap mek yaok pluh mbang pajeng ba pháo suan hukum tapa tapen negar.

Di Mỹ, đảng Cộng hoà pasang iek hu Thượng viện saong daok khik hu rilo urang jakar di Hạ viện. Meyah bruk ngak nan hu jak jeng, meda daong Tong thong palih ruah Donald Trump jhul pakhang danak dak ngak ruk di drei tuk ong hu gilac veik tame Nhà Trắng. Piah pasang khik hu Hạ viện, đảng Cộng hoà urak ini hu veik 5 ghe. Bruk khik Hạ viện ka đảng Cộng hòa ngak bruk pakhang pambak praong akok meti hadei 8 thun piah ngak bruk brei cakak trun jien je saong jien car pandar, atah klak bruk ba tabiak gah nang luong saong pasang iek labik taphia negar.

Dom mbang ceik apui pruh  di Đông Flores, tỉnh Đông Nusa Tenggara, Indonesia meng harei 4/11 mbiah tala ini hu 9 urang metai, jaik 10.300 bhap bini gaok kan kandah. Ceik pui pruh  pambuk bau glong tal 9km. Dom mblang kapal haok brei padeih  saong yaok pluh mbang par  brei padeih. Jabat chuc nang kakei bhap bini dom bhum mbon gaok bala brei ngak njauk tui tacei ba di karja piah hu salamat.

Di Tây Ban Nha, hu 78 urang daok lahik hadei ribuk khang abih kuhria dalam 100 thun tapa. Karja Valencia, labik gaok khut khat trak abih, hu ba tagok angaok mang XH.  Urak ini, bruk duah daong dom urang lahik daok hu peih ngak, karja hu khan lac 40 rup tau hu duah mboh min oh ka thau angan je. Urang huac ia ba theik tabiak tasik Địa Trung Hải. Bruk ramik daok hu peih ngak hacih, kayua dom bhum palei daok gam gluh baok ralo./.