Di mbang nyaom mek panuac urang ilamo ka jalan cak rok patagok kinh tế - xã hội TP.HCM tukvak 2026-2030 kayua UBND TP.HCM peih tabiak bahrau ini, Akaok UBND TP.HCM ong Phan Văn Mãi ieu brei duah tabiak dom labik gar, tavak tavaiy, bruk hu makna  njauk salih piah yam tapa bẫy kuhria jien mek tame. Tui Sarak ka 31, jalan ba tabiak tal thun 2030 lac TP.HCM jeng ban siam makre, bahrau, hadah hadai jang, anit ranam, hu manuac ngak hu ilamo glaong. Ban raya caong ngak hagait piah mek hu dom bruk ba tabiak ini. Dom kapul nyaom, dom urang roh duah ilamo brei thau lac, Việt Nam daok 10 thun tra piah brei thau lac tapa bẫy jien kuhria mek tame atau jeng daok sarau kadau di tal mala.

Salam uan pahadar 79 thun CM bilan 8 (19/8/1945 - 19/8/2024) saong harei negar 2/9 (2/9/1945 - 2/9/2024), Mban Thường vụ Tỉnh ủy Tiền Giang hu alin, hadiah, truy tặng Huy hiệu Đảng ka 650 urang praong thun, hadah krah dalam bruk ngak di urang đảng.. Dom urang đảng praong thun hu alin hadiah Huy hiệu Đảng brei mboh hatai thau dhar phor anak bruk sangka di Đảng, sanya daok buh prein yava daong dak padang puk paga palei negar dak harei dak siam mekre, kaya meda. 

UBND ban Ngã Bảy, tỉnh Hậu Giang bahrau pathau khan lac xã Tân Thành mek hu tanut chuan palei pala bahrau kieu mau. Ini lac xa ka 5 di tỉnh Hậu Giang saong lac xa ka dua di ban Ngã Bảy mek hu angan ini. Urak ini Tân Thành hu padang ngak rilo bruk ngak mek hu kein laba glaong. Taphia di nan, xa daok padang ngak bruk pala durain tui tanut chuan GlobalGAP, bruk du lich sinh thai bein phun mbang baoh, bruk raong ikan pra. Jien mek tame tui kuhria yaok akaok manuac mek hu jaik 81 triệu đồng sa urang sa thun.

Festival 100 thun La-u ralinh  Trà Vinh bahrau peih tabiak, hu mbaok 31 lãnh sự quán, dom tỉnh ban dalam bhum, yaok ratuh doanh nghiệp. Festival 100 thun La-u ralinh Trà Vinh piah pok meyaom, yaih khan angan je, dom yaom glaong di phun la-u ralinh daong jhul tagok kinh tế - xã hội di palei saong jeng bruk praong di taneh ia dalam tukvak anak tal. Urak ini taneh pala la-u ralinh tagok jaik 780ha, yaok thun paik hu labaih 3 triệu baoh saong lac bruk ngak mbang duah jien di jaik 2.600 sang dalam tỉnh. 

 Piah duh ka tuai dalam tuk padeih Harei negar 2/9, Sở Ilamo, Thể thao saong Du lịch tỉnh Bình Thuận bahrau hu panuac ieu gah pablei salih paglaong bruk khik ramik, khik kajap siam mekre di dom labik du lich; khik salamat haci hacih pandap mbang, hacih sa-at labik rahra, mbaok mata labik daok. Oh caik rahtabiak bruk tagok yaom, pachot pagait, dui palua tuai, ngak sarau kadau tuai damuai. Meng akaok thun tal ini, du lịch Bình Thuận dui pachreih hu jaik 5 trieu 5 rituh ribau mbang tuai.

Quyền Thủ tướng Thái Lan brei thau, hadom menuac dalam Rajaei bahrau hu khan brei thau di jhung bilan ini piah tame bruk ngak meng bilan 9. Urak ini taong abih dom đảng dalam liên minh cầm quyền hu ba tabiak menuac tui parabha. Min dom menuac ba tabiak nyu rilo jang dom menuac dalam rajaei, nan ye gah chức năng brei hu tukvak piah pasang iek, taong yaom cambaih laih ka yaok urang piah brei bruk ka nyu njauk, lagaih. 

Rajaei Indonesia daok caga labaih 1 trieu 5 rituh rabau héc-ta taneh palao raong limo ia tasau, piah caga ka danak dak “var mbang dinh duong saong ia tasau oh lahik jien”. Ini lac sa dalam dom sanya dang akaok dalam mbang tranh cu di Tổng thống đắc cử Prabowo – Subianto. Danak dak meda hu peih ngak meng thun 2025 saong duh ka yaok piluh trieu anek saih pakat tiểu học, urang kumei matain, amaik daok brei anek mam. Danak dak caong hu biak rilo ia tasau, dalam tuk ia tasau di Indonesia daok hu takik.

Langik oh siam daok rah tabiak di Trung Quốc. Pandiak daok dui atah di gah meraong tal jhung bilan, dalam tuk hajan praong daok ngak khat lahik praong di gah brak. Takik di nyu 11 urang matai saong 14 urang lahik hadei di dom mbang hajan praong di tỉnh Liêu Ninh, gah Đông Bắc Trung Quốc. Di ban Hồ Lô Đảo hajan praong ngak ka jalan mbak, jalan điện, jalan talei phone, sang danaok saong phun pala jeng khut khat biak trak danak. Dom menuac gaok kan kandah meng bruk nan tagok tal jaik 190.000 urang, khat lahik labaih 10 tỷ nhân dân tệ./.