UB bhap bini Ban raya HCM ba tabiak bruk lac tal thun 2025, pandap dulich jalan kraong ia hu ba tame pandar di taong abih dom jalan kraong Sài Gòn, pambuak  Đồng Nai, Bình Dương, Tiền Giang, Long An, Bến Tre saong dom jalan ribong dalam ban, hu takik abih lac 10 danak dak dulich jalan ia. Tuai damuai dulich  jalan kraong ia di Ban raya tal thun 2023 saong 2024 ba tabiak kham ngak brei hu 300 tỷ đồng sa thun saong tagok labaih 10% dalam dom thun anak tal. Ban raya HCM kham merat tal thun 2030, tuai damuai rivang ma-in  jaln ia hu jeng sa dalam dom janih dulich, pandap dulich ngak brei karei, rik tame ngak brei parilo dom pandap dulich.

Tỉnh An Giang bahrau peih 5 labik pathau khan, brei thau, pato pakai hukum pacang caga bruk tok gauk ka oh tal umo thun saong tok gauk dalam but pajaih ka anek saih bangsa Khmer di dalam huyện Tri Tôn. Ini lac bruk ngak dalam danak dak sit ka 2, daok dalam danak dak 9 di danak dak bruk ngak negar cak rok patagok kinh tế - xã hội bhum bangsa takik saong bhum ceik huyện Tri Tôn thun 2023. Tui nan, anek saih bangsa Khmer di pak ini hu pang dom adat  Hukum tok gauk saong baoh sang pambuak tal bruk tok gauk ka oh tal umo thun saong tok gauk dalam but pajaih.

Tuk ini, dom po bein  di Tiền Giang biak chreih chrai kayua rilo janih baoh kayau bingi pablei hu yaom glong. Baoh panat  janih 1 yaom 48 ribau đồng sa kg,  thanh long hatai bhong, kruac bung  kalik hijao yaom 24 ribau đồng sa kg, tagok dua mbang dut saong bilan dahlau. Tiền Giang lac  bhum palei  hu taneh bein phun mbang baoh dang dhi dua dalam negar ngan haong 11 janih baoh kayau đặc sản hu pala rilo; dalam nan phun durien, thanh long, panat, manaih meblah ralo taneh abih saong daong ka po bein duah hu jien tame rilo.

Jit ruak tangin takai cambuai di Kiên Giang daok tagok, rahtabiak srau kadau, dom urang ruak trak tagok biak rilo, saong hu 3 urang metai. Anak bruk ini, UBND tỉnh Kiên Giang hu pato tacei dom mban, dom gah pambuak tal saong dom bhum palei paglaong bruk pacang caga jit ruak tangin takai cambuai. Urak ini jaik tal thun bac bahrau, Sở Y tế Kiên Giang daok padang dom kapul pasang iek, daong ka dom bhum palei saong pato tacei samar drah bruk pacang caga jit ruak tangin takai cambuai. Rami ramik hacih saat tal bac, ngak haci hacih alam môi trường, khik kajap salamat pandap mbang di dom ging mbang praong rilo manuac, gam tui di nan pasang iek catang bruk jit ruak, duah mboh samar drah saong langyah samar drah dom sruh jit ruak bahrau tamuh tabiak.

Urang kumei di ban Dĩ An, tỉnh Bình Dương birau njauk urang pachot pagat labaih 700 trieu đồng tuk tut angan ka anek ngak mẫu nhí. Công an khan veik, kreh bilan 7/2023, sa-ai X daok di  Dĩ An tagok mạng zalo mboh ba kadha palih ruah mẫu nhí. Mboh bruk ngak mbuan mbiah hu jien glong, tui nan anek drei hu ngak mẫu nhí ka dom hãng khan ao danei angan yau nan ye X. pambuak haong blah web nan. Piah ngak salah harak brei tut angan, sa-ai X. brei ngak dom bruk, dalam nan hu brei buh jien hasit blei pandap. Tuk salah bruk brei pandap, sa-ai hu taduan jien meng yaok pluh tal yaok ratuh ribau đồng. Hadei di nan, jien blei pandap tagok veik min sa-ai oh hu taduan jien hoa hong yau dahlau  saong oh pambuak hu urang tacei pato veik tra, sa-ai meng thau drei njauk pachot pagat. Sa-ai X khan brei ka Công an ban Dĩ An thau.

Hàn Quốc saong Nhật Bản ginum biai njauk gauk biak rilo dalam mbang nyaom di dua gah bahrau abih pambuak tal dom panuac ieu di gah Seoul ngan haongbruk tathuak ia meng sang mac điện hạt nhân Fukushima di Nhật Bản. Akaok bilan 7 meng blaoh, Jabat Năng lượng nguyên tử dunya (IAEA) hu ba tabiak pathau khan lac bruk tathuak ia njom phóng xạ tapa langyah blaoh di sang mac điện hạt nhân Fukushima pabak hu dom tanut chuan salamat di dunya. IAEA jeng brei thau lac, bruk tathuak ia nerak meda hu phóng xạ biak sit oh kan kandah hagait ka anek manuac saong alam môi trường. Yaom lac yau nan, dom urang taong cap ikan saong taneh ia jaik taphia jeng daok huac ka chất lượng di kaya tasik.

Rajaei Trung Quốc jhul pakhang bruk pasiam veik khut khat hadei di ribuk piah khik brei salamat ka bhap bini di dom labik njauk kan kandah piah urang gilac veik mai sang di bilan la-ar. Tui nan taneh ia ini jhul pasamar bruk pasiam jalan điện saong jalan viễn thông njauk khut khat kayua ia sua saong samar pasiam veik bruk siam mekre di dom bhum ia sua. Mentri Jien padai parabha  kadung jien daong bala kuhria abih tih yaom 732 trieu Nhân dân tệ sumu 102,3 triệu USD,  piah daong pasiam bruk ngak nong. Dom kong ty  bao hiem  hu taduan 117.600 mbang caong khin bayar jien ka bhap bini. Kuhria abih tih jien bayar khat lahik tagok tal 5,37 tỷ Nhân dân tệ, sumu 750 trieu USD.

Urang brei panuac di Mintri Ngoại giao Mỹ brei thau lac meda daok peih ngak abih tih dom jalan taong phat urak ini ngan haong Triều Tiên, dalam tuk daok hhuac ka bruk pambuak gauk gah quân sự dak harei dak khang tagok di Triều Tiên saong dua taneh ia jaik taphia lac Trung Quốc saong Nga. Pathau khan dalam mbang ginum biai tuk hu sua tangi lac Mỹ hu caik hatai tal bruk pandar dom jalan taong phat pabak ngan haong Triều Tiên halei oh, urang brei panuac di Mintri Ngoại giao Mỹ, Matthew Miller brei thau lac, meda peih ngak ginup dom jalan taong phat urak ini saong meda taong phat veik dalam harei hadei, min ong oh khan brei thau dahlau./.