73 urang y, bac si gru jru ranaih Ban raya Ho Chi Minh bahrau taduan yai thuong Phạm Ngọc Thạch mbang ka 9 thun 2025. Ini lac dom urang sahaneng hadah krah, roh duah ilamo duh ka bruk ngak, paglong kein lagaih dalam bruk taong ruak saong iek glang prein yawa bhap bini meng nan brei mboh thaok binguk gru jru uranaih Ban raya Ho Chi Minh iek praong ka bruk ngak, daong iek prein yawa bhap bini, daong tani tanat xa hoi. Yai thuong Phạm Ngọc Thạch hu Thanh Doan Ban raya Ho Chi Minh peih ngak meng thun 2009, piah pathau khan dom y, bac si lac gru jru uranaih  naih joi bruk ngak, mek hu rilo bruk jak jeng siam mekre.

Bac si Huỳnh Thị Kẩm Huyên, urang bangsa Khmer, bruk ngak di Pasak Y te huyen Châu Thành, tinh Tra Vinh, lac kareih hadah krah ka jalan diukrai di urang gru jru. Sang iek ruak lac labik anai taduan urang bangsa Khmer saong sang kathaot. Bac si Huyên tuk halei brei ngak bruk abih hatai daong mikva, meng bruk taong ruak  tal daong pandap tuk urang kurang. Yam ndoc Pasak Y te Huyen Chau Thanh mboh lac: bac si Kẩm Huyên la sa gru jru naih joi abih hatung haong urang ruak saong hu ilamo ngak bruk khang kajap, hu ayut sahabat anit ranam. 

Peih bruk padang ngak, pasang iek danak dak sang daok di Danak dak ngak brei oh daok baoh sang taik tahak tinh Hau Giang birau ini di huyen Vị Thủy, kham merat ngak brei oh daok baoh sang halei taik tahak  dalam bilan 5 ini. Hau Giang kham merat ngak brei abih baoh sang oh daok taik tahak, ba mai raidiuk siam mekre ka bhap bini; tui nan jhul pakhang bruk cakrok patagok khang kajap. Piah ngak salah  bruk tinh ba tabiak iew da-a  dom daonh nghiep, kapol nyaom, urang patui bruk ba tangin daong prein daong jien tame Danak dak.

Dua mbang hajan ribuk birau ini di tinh Ca Mau di kreh bilan thu ngak par tabung sang bac saong khut tayak 6 baoh sang di bhap bini. Meng kaok thun mbiah tal ini, bala meng langik tasik  ngak karam 4 gilai ikan, sa urang nao gilai lahik. Kuhria abih tih drap ar khut lahik tui jien tal ini jaik 3 ty 300 trieu dong. Langiu di nan, 4 mbang bala rah tabiak di tasik, ngak 9 urang nao gilai lahik, dua sruh gilai pakal saong apui khuah sa kapal gilai ikan, kuhria khat lahik  jaik 1 ti dong.

Trần Chí Bình umo 28 thun, daok huyện Tân Trụ, tinh Long An njauk jabat chuc nang taong phat 10 trieu dong kayua ba kadha suan tagok mang XH. Dahlau di nan, harei 5/2, sa-ai Bình ba thaot binguk  sa kapol nyaom urang pataom tame iek urang ma-in pacaoh manuk gam asar kadha “ chreih bui Long An” tagok TikTok di drei. Nan min, kadha nan meyai lau oh hu biak. Bruk nan di sa-ai Bình lac ba kadha oh hu, ngak manuac sia sahaneng huac saong pachut gauk XH”. Urak ini sa-ai Binh tah klak  kadha nan trun saong likau duis di karja gam haong bhap bini mang.

Rajaei Indonesia khan lac rilo danak dak daong karei piah blei pandap pandar pachreih urang blei dalam negar, duh ralo bruk ngak harei roya di taneh ia ini thun 2025, nan lac bilan Ramadan saong harei roya. Dom danak dak pachreih urang blei  dalam tukvak ini ba mai kein laba ka bhap bini blei hu pandap tui hatai hu yaom lap jang. Tui nan dom doanh nghiep sit sot, mbiah saong gap hu lagaih pablei salih kaya pandap  tabiak darak pasar.

Dalam thin 2024, dom urang pametai rup eng di Han Quoc tagok glong abih kuhria dalam 13 thun hu abih tih 14 ribau 439 mbang. Tui taka kuhria mboh thun 2021 ye Han Quoc  hu urang pametai rup eng glong abih dalam dom taneh ia di To chuc Hop tac saong Patagok Kinh te, ngan haong 24,3 dalam 100.000 urang. Dalam tuk  nan, Litva dang dhi 2 ngan haong 18,5 urang metai.

Labaih 7.000 bhap bini negar langiu hu daong ba tabiak truh dom kapol pachot pagat di Myanmar nan lac labik njauk urang kateih greik ngak bruk suan hukum. Dom urang njauk  2 nyaom urang bol pan phao karong bangsa di Myanmar daong ba mai hu di labik dom kapol nan chap khik  di labik jaik tapen negar Thái Lan . Khaw tin nan hu ba tabiak dalam tuk Thai Lan  daok pambuak haong Lào saong Campuchia  chap mek dom kapol nyaom urang pachot pagat tapa iew phone, sa bruk suan hukum birau mboh jiak ini./.