Piah khik hu salamat jalan mbak, langiu dom tanut taong phat jien yau urak ini, TPHCM daok roh duah, caong khin pabak dom kadha taong phat birau yau urang ngak bruk duh ka bhap bini. Ini lac jalan ngak birau piah pato padar, paglong jalan sahaneng ngak tui Hukum salamat jalan mbak saong takik ngak suan. So Padang ngak brei pasang iek, langyah tal catang bruk lih mek jalan pasei, “ mek veik” jalan ka urang nao tabak, khik brei siam mekre ka jalan mbak jeng yau urang nao mai ngaok jalan.

UBND tinh An Giang birau pabak labaih 39 ti dong piah peih bruk daong jien nao mai, daok veik ka urang jakar, kong chuc, vien chuc, urang ngak hadei ramik jabat karja di tinh thun 2025. Tui urang jakar, kong chuc, vien chuc, urang ngak hu bayar jien yaok bilan saong jien bilan daok mbang tui saong peih ngak tui jalan jao khoan. Dom urang jakar, cong chuc, vien chuc, urang ngak hu radaih taduan raok atau sang daok di karja tui hukum ba tabiak ye oh hu taduan jien daong nan.

Mentri Jien padai taduan hu khaw tin khan ka Facebook angan “ Bo Tai Chinh -  Labik taduan harak ho so” pandar thaot binguk saong khaw tin di Mentri Jien padai, taduan lambaok Mentri Jien padai “ taduan mek jien” ka dom urang pachot pagat tapa mang. Mentri Jien padai ndem lac, ini lac Facebook ja, bhap bini, doanh nghiep brei caik hatai caga anak bruk ba dom asar kadha di facebook ini piah pachot pagat. Urak ini, Mentri Jien padai  daok caong khin dom jabat chuc nang tame ngak brei cambaic laic dom bruk ngak ja website, fanpage di Mentri Jien padai.

Dalam 9 bilan tapa, tinh Vinh Long taduan hu jaik 7 trieu tuai damuai, dalam nan hu jaik 1 trieu tuai negar langiu. Gah Yulit tinh ba tabiak bruk caong khin ngak hu dalam thun mek tame 7.300 ti dong. Hadei pagam tame, Vinh Long hu 130 km jalan tathik, rilo kaoh pulao saong dom danak dak dien hangin di tathik - biak lagaih piah ngak yulit sirah sinh thai, padeih padei. Bhum taneh daok pataom hu ilamo biak gheih gam haong rahra daok labik ini meng lavik mai nan lac bangsa Yuan, Khmer, Lo ngak jeng ilamo siam gheih karei.

Luac jiak sa pluh thun laik yaom, urak ini yaom amriak kalu hu tagok gilac veik, daong mikva pala amriak kalu di labik tapen negar tinh Dong Nai duah hu jien tame rilo. Urak ini, yaom blei amriak kalu labaih 150.000 dong sa kilo, glong jang rilo mbang duk saong dua, klau thun dahlau. Kayua dui atah tukvak amriak kalu laik yaom yau nan ye rilo urang tak klak  pala phun karei. Di palei Tan Hoi danei ngan  pala rilo amriak kalu, sang halei jeng pala amraik kalu. Urak ini, di labik ini daok labaih 20% taneh pala amriak kalu.

Gah ngak kong nghiep oto Trung Quoc daok pamong tal bruk pablei yaok thun labaih 40 trieu sruh radaih dalam 5 thun anak tal. Urak ini, urang hu radaih oto di Trung Quoc labaih  250 radaih angaok 1.000 urang, biar jang rilo dut saong dom taneh ia patagok karei. Ngan haong darak pasar dunya, dom taneh ia Meraong baoh taneh jeng labik blei radaih oto Trung Quoc, tuk urang blei di dom taneh ia ini caong khin blei dom radaih hu yaom gap mbiah kadung jien di drei.

Ung thu buong trung urak ini lac janih ruak ung thu mboh ralo ka 3 di urang kumei di Ấn Độ, labaih 47.000 urang ruak birau saong jaik 33.000 urang metai dalam sa thun tapa. Bruk nan oh brei mboh salih ruak bo daok lac bruk kan kandah ka gah y te saong bruk caga ruak. Bruk ba tal ruak nan, dahlau di abih  lac kayua ndih tapui anek  umo praong thun, hu takik anek atau jru ruak vo sinh. Langiu di nan, rilo urang lameh tagok kilo saong dom ruak dalam rup ba tal.

Gah chuc nang Colombia daong hu 23 urang jeng mo ameh  daok gar luac 48 mon dalam sa lubang mo jaleih. Taong abih dom urang nan hu taduan raok dalam uan tabuan di ayut sahabat pah tangin saong gauk gar daok cang di angaok lubang. 23 urang kuac ameh  daok gar ala lubang  meng page harei 22/9 dalam trun 80m. Dalam tuk daong duah, urang taduan hu ndap mbang, ia menyum saong oxy tapa jalan ala taneh.