Di mbang nyaom biai ka 22 di HĐ Bhap bini Ban raya Ho Chi Minh mbang ka X rah tabiak di page ini 18/4, dom urang lambaok vakil hu mbaoh tangin ka bruk padang Ban raya Ho Chi Minh (bahrau) lac ban raya daok dalam trung uong hu pagam 3 jabat karja pakat tinh dalam nan hu Ban raya Ho Chi Minh, tinh Binh Duong, tinh Ba Ria - Vung Tau. Ban raya Ho Chi Minh bahrau hadei tuk ramik, pagam hu praong labaih 6.772km2, hu 190 jabat karja daok dalam ini, ngak jeng sa ban praong di bhum Dong Nam bo. Pasak karja - chinh tri di Ban raya Ho Chi Minh bahrau hu padang di labik Ban raya Ho Chi Minh urak ini. Labik 2 di Ban Thủ Dầu Một saong labik 3 padang di Ban Bà Rịa.

Tinh Hau Giang birau peih bruk rivang iek, alin pandap saong jao brei radaih galung ka urang jaoh jo di huyen Chau Thanh. Dalam nan yaok paok pandap hu 1 trieu dong jien mbaok saong 10 urang jaoh jo hu alin brei radaih galung. Harei ini, Kapol Urang njom jru mek kalik kruac/Dioxin tinh Hau Giang jeng hu alin brei  ka 2 baoh sang, yaok baoh sang hu 5 trieu dong. Dom paok pandap saong radaih galung daong urang kathaot hu lagaih yam tapa kan kandah, patagok dalam raidiuk, ba drei tame bhap bini.

Pambuak tal bruk jru ja hu ba tame darak pasar, Kuk Pasang iek jru, Mentri Y te pachreih rahra brei duah thau ka jru hu mai meng halei dahlau si blei. Rahra meda tame blah web piah duah thau di labik web https://dichvucong.dav.gov.vn/congbothuoc. Meyah angan jru oh hu di dalam web, ye jru nan lac jru ja.

Jabat canh sat pasang iek Kong an tinh Bac Lieu daok pasang iek ngak brei cambaic laic bruk paga meng talei pagam điện piah pametai tikuk ngak sa urang di xa Ninh Qưới A, huyen Hồng Dân metai. Dalam tukvak tapa, yaom lac gah chuc nang bhian pathau khan, kakei dahlau, bruk pandar ndien piah mek tikuk, taong ikan, khik caga padai saong njam patam...lac bruk biak mbuan ba tal bala, meda ngak metai manuac  tuk halei jeng oh thau. Yau nan min, dom bhap bini ta-eng drei paga pacang meng talei hu dien piah pametai tikuk klak kaik palai padai, njam patam...ba tal dom bruk metai pandik pandua, ngak manuac sia haduh hatai.

Di Inem mek pakat negar hu yaom glaong Bimong Po Ine Negar di ban Nha Trang, tinh Khanh Hoa daok rah tabiak Harei raya Bimong Po Ine Negar thun 2025. Harei raya hu dui pachreih yaok ribau mbang rahra dalam tinh, tuai damuai dalam negar saong dunya, abih di nyu nan lac urang bangsa Cam meng dom tinh Ninh Thuan, Binh Thuan, bhum Tay Nguyen jeng ba gauk mai hu mbaok tame di ini. Ini lac bingun piah bol bhap rahra thau dhar phol tal Amaik Po Ine Negar daok lac sa kein lagaih piah khik ramik saong patagok yaom kaom inem mek ilamo muk-kei caik gilac.

Labaih 130 sinh vien dunya di grauk negar My hu tame sa bruk meriak gauk di lien bang mboh lac karja Tong thong Donald Trump atah klak thi thuc di urang suan hukum, ngak kan kandah ka bruk harak gal hukum di urang pak taneh ia ini. Tui dom sinh vien, Jabat Thuc thi di tru saong hải quan padeih oh brei thau dahlau saong bruk urang jeng suan hukum di dalam co so du lieu He thong Thong tin sinh vien saong tuai damuai ndem biai nao mai di rajaei, ba tal urang mbuan chap mek saong patrauk tabiak.

Toa an toi cao Nga bahrau tayah klak harak pakauk ngan haong Taliban, kapul hu maong lac sa kapul khung bo luac 20 thun tapa. Bruk Nga tayah klak harak pakauk ngan haong Taliban hu maong yau piah brei kein lagaih patagok bruk pambuak an ninh dalam bhum, abih di nyu nan lac tuk Nga daok duh hatai meng dom kapul Islam cuc doan hu ngak bruk meng Afghanistan tal Trung Đông.

Dom mbang tapa negar chau Au suan hukum trun 30% dalam 3 bilan thun 2025 dut saong tukvak thun 2024. Dom kapol nyaom quyen anek manuac mboh lac  bruk trun  takik urang di cu suan hukum tame chau Au kayua dom sarak di Chau Au ba tabiak piah pacang cakak, dalam tuk nan “ pik meta ngak mengak yau oh mboh” anak bruk mbuan ba tal suan hukum./.