Di harei Pahadar 60 thun Harei Gru jru Viet Nam, Bi thu Ban uy Ban raya Ho Chi Minh Nguyễn Văn Nên hu brei mboh hatai dhar phol praong glaong ngan haong dom bruk rik prein, halan tian di dom rairah gru jru, gam haong nan brei mboh, yaom lac hu tapa rilo tukvak kan kandah, kapul y te ban raya oh padeih kham merat, rik prein hu makna tame bruk patagok di gah y te taneh ia. Bi thu Ban uy Ban raya Ho Chi Minh ndom lac, bruk sangka prein yava rahra lac sa dalam bruk brei ngak dahlau abih. Ban raya brei patui veik padang he thong y te bahrau, lagaih, pamaong tal bruk jeng pasak sangka prein yava di labik  ASEAN. 

Ong taha Lê Văn Thanh, pajeng di thun 1925 di tinh Long An bahrau hu Po Ine Negar alin Harak tadhau ayuh umo 100 thun. Dalam Harak tadhau ayuh umo 100 thun, Po Ine Negar Lương Cường tadhau ayuh ong taha Lê Văn Thanh tuk halei jeng khang kadang, baoh sang haniem phol; patui veik daong prein anek, taco anit ranam dom urang dalam sang, khik ramik ilamo bangsa, rik daong siam mekre tame bruk padang saong pacang khik Taneh ia.

UB Bhap bini tinh Bac Lieu bahrau peih mbang jao 100 baoh sang bahrau ka urang nao tasik kathaot. Haong bruk samar drah, kham merat, tok dalam 3 bilan, Bac Lieu hu peih bruk padang salah blaoh 100 baoh sang, samu ka mikva hu sang bahrau piah raok uan Tet Ula Naih 2025. Tapa nan, hu ba mai hatai bui sambai, haniem phol ka yaok baoh sang, rik daong praong ka urang nao tasik sang kathaot hu tani tanat raidiuk, tabiak tasik taong ikan hadang, daong tame bruk ngak hu siam lagaih danak dak trun kathaot karo kajap saong sarak daok dang mbang ngui dalam tinh.

Tal ini, glai U Minh, tinh Ca Mau hu salah blaoh pang dom braong, bineik piah padang ia pacang khuah padam khuah glai. Dalam tinh Ca Mau hu 65 kapul, hu 470 urang bhian pasang iek dalam bruk pacang khuah padam khuah glai. Hu labaih 5.500 baoh sang rahra daok taphia glai hu mbaoh tangin sanya oh tame glai dalam bilan thu, jeng yau srap gap hu mbaok tame pasang iek, daong kapul urang, radaih tuk hu paui khuah.

Tui rayo kuhria langik tasik bhum Meraong negar, dalam bilan 3 anak tal bhum Meraong negar meda rah tabiak dom mbang pandiak di dom tinh bhum Pur saong tapen negar gah pei meraong di bhum Pei. Min, tanut pandiak oh catang samu haong thun blaoh saong tukvak rah tabiak pandiak jeng suai jang. Langik pandiak kuhria rah tapa dalam bilan 3 glaong jang dut haong kuhria rah tapa rilo thun min oh rilo. Di Ban raya Ho Chi Minh, meng ini tal harei 6.3, oh daok hajan karei bilan, langik pandiak abih meng 32 – 34 ndo C.

Kapul Y te Dunya brei mboh bruk huac kanda ka bruk mesruh di Gah Pei saong dom kanja jhak di mbang mesruh metiak “tagok rilo” ngan haong he thong sangka prein yava. Panuac ndom hu ba tabiak hadei tuk bol lin Israel hu ba radaih tank tame Gah Pei saong pandar bol lin srap gap ka bruk “daok suak” piah pacang dom kapul bol lin Palestine di dom balai ti nan. Dalam thun ini rah tabiak 44 mbang mesruh metiak ngak kanjah jhak tal bruk pabak yitvu sangka prein yava di Gah Pei.

Bilan 7 ini Ai Cập peih harei uan Gilang khik drap ar Ai Cập bahrau, dom danak dak uan bui ka bruk ini hu dui atah dalam rilo harei, dui pachreih hatai sangka di urang dalam dunya. Hu labik jaik kapul Kim Thự Tháp danei angan Giza haong hu taneh praong tal 500.000 m2, Gilang khik drap ar Ai Cập jeng sa gilang praong abih dalam dunya ka sa ilamo Ai Cập meng kal. Kapul Pato megru, Khoa hoc saong Ilamo Lien Hop Quoc hu mbaoh tangin lac sa dalam dom gilang khik drap ar gheih abih dalam dunya.

Harei hoa trang Carnival – sa dalam dom harei raya praong abih saong bui sambai abih dalam dunya hu rah tabiak di harei 28/2 anak tal di ban Rio de Janeiro di Brazil. Piah srap gap ka harei raya, dom urang chreih gah yulit di grauk labik dalam dunya daok jal val srap gap blei khan ao piah ba mai tal ini dom khan ao rilo sambo bar saong bingi maong abih. Thun ini, dom pandap kaya yau ye siaok thien than, talmo balau ciim, dom baoh mat na saong biar rilo sambo bar…lac dom pandap kaya hu pablei biak nduac.