Brei panuac tamat Nyaom biai Thanh uy mbang ka 39 peih ngak di biar harei  kabroi 15/4, Uy vien Mentri Chinh tri, Bi thu Thanh uy Ban raya Ho Chi Minh Nguyễn Văn Nên caong khin karja Ban raya brei ngak catang lang talaih dom bruk daok tavak tavaiy, dalam nan hu Danak dak pacang ia dauk 10.000 ti dong. BCH Ndang bo  Ban raya jeng njauk hatai ka jalan ngak di Ban raya brei trun 102 don vi karja pakat xa. Abih di nyu, nan lac angan di dom jabat karja pakat xa brei ngak hasa jalan yau gauk, sumu gauk, lagaih haong ilamo meng kan, ilamo, sajarah.

Tui Mentri Pato megru hu labaih 160 ribau anek saih  tut angan tame brei pakacah iek dahlau tamat THPT thun 2025 tui jalan online. Tukvak tapa brei tut angan tapak tapa online dui atah tal abih harei 18 bilan 4. Tamat  tukvak tut angan pakacah iek dahlau, dom anek saih  tal 12 saong anek saih  pakacah veik brei tut angan  pakacah tamat THPT thun 2025 tui jalan online  meng harei 21 bilan 4 tal mon 17  tuk harei 28 bilan 4.

Kuhria tal ini, bruk peih taneh piah padang ngak jalan Bien Hoa - Vung Tau tapa Ban Bien Hoa, tinh Dong Nai hu jaik 99%. Urak ini daok 3 baoh sang oh ka jao brei taneh, karja palei daok jak ba, meyah mikva urang oh bayar ye brei ngak catang piah mek taneh. Danak dak jalan peih drah samar Bien Hoa - Vung Tau  nao tapa ban Bien Hoa atah 6,2 km. Piah peih ngak danak dak, hu 1.514 baoh sang brei panduan ba sang danaok nao labik karei.

Dom harei ini mikva urang bangsa Khmer di Nam Bộ daok uan raok tet Chol Chnam Thmay dalam bui sambai, chreih chrai. Dom thun tapa, tinh Soc Trang peih ngak sumu gauk, hu siam lagaih dom sarak di Dang saong Karja, ngak jeng bruk salih siam mekre dalam raidiuk kinh te - xa hoi di bol bhap Khmer. Mbaok meta bhum urang bangsa takik dak harei dak hadah hadei, raidiuk  mbang ngui saong jalan sahaneng  hu paglong  mboh di meta, baoh sang kathaot trun daok takik, sang urang Khmer kathaot trun daok 1.961 baoh sang, sumu 1,9%. Jalan mbak, sang danaok di bhum urang Khmer  hu buh jien tame ngak siam jang, hu 75/80 xã taduan hu tanut chuan palei pala birau. Bruk y te saong pato bac megru hu siam tagok ralo.

Biar harei 14/4 di huyen Ngọc Hồi, tinh Kon Tum hu hajan praong gam kala klak, 7 urang daok di palei Tà Pók, xa Đăk Nông daok rok bei plom mboh langik hajan tame daok kandauk dalam tadai tuan di apuh. Hadei di nan, kala klak tame tadai tuan, labik 7 urang nan daok pandauk hajan, ngak saai kumei Y Dườn metai, 6 urang daok veik njauk rambuac. Thau ka bruk nan, mikva ba dom urang njauk rambuac tame Sang iek ruak Đa khoa  Khu vuc Ngọc Hồi. Karja xa Đăk Nông saong UB Bhap bini huyen Ngọc Hồi hu padang kapol nyaom nao rivang saong pajong daong dom baoh sang hu urang gaok bala nan.

Quoc hoi Singapore harei ini padeih ginum biai piah ngak bruk sap pagap caga ka bruk palih ruah meda peih ngak dalam 3  bilan anak tal. Bruk palih ruah  meda rah tabiak dalam tuk sarak jien je  birau di karja Tong thong My Donald Trump kuhria mboh dahlau lac meda ngak kan kandah tal bruk ngak mbang kinh te pabei salih di Singapore. Rajaei negar ini kuhria dahlau dalam harei kabroi mboh bruk patagok thun 2025 meng 1 tal 3% trun 0% tal 2%.

Dalam mbang adat Thaik ia Songkran raok thun birau meng blaoh, Thai Lan taduan raok hu 700.000 tuai damuai, tagok jaik 11% dut adit dahlau di nan, jien mek tame jaik 520 ti Baht ( sumu labaih 15,5 ti USD). Tui Mentri Yulit saong The thao Thai Lan, adat Thaik ia  Maha Songkran 2025 hu jak jeng praong, rilo adat hu peih ngak di grauk labik dalam negar, abih di nyu nan lac di Bangkok, Chiang Mai, Khon Kaen saong Hat Yai pachreih hu yaok rituh  urang hu mbaok tame.

Mentri Y te Iraq khan lac, labaih 3.700 urang di taneh ia ini brei jru dom ruak jalan suan yawa kayau ribuk cuah paoh tame. Ribuk cuah  di Iraq bhian rah tabiak di bilan pataih min jhak trak jang gam hu rilo mbang ribuh rah tabiak saong khang jang dalam dom thun jaik ini. Iraq jeng lac sa dalam dom taneh ia mbuan gaok kan kandah abih kayua langik salih karei oh lagaih jeng yau bruk cuah tuh tame. Tui Mentri Alam moi truong Iraq “harei dhur mur” meda rah tabiak rilo jang dalam 25 thun anak tal./.