Ban raya Ho Chi Minh daok sami samar ngak brei salah 50 sang bac taka so tui bruk ba tabiak di UB bhap bini Ban raya brei lagaih haong bruk daok rah tabiak. Tui UB bhap bini TPHCM, bruk kham peih ngak salah 50 sang bac pandar taka so pamong tal harei pahadar 50 thun harei Peih paha gah Meraong negar, yasa taneh ia saong danak “Gilang tapuk taka so ka 50 sang bac so” meda rik tame jhul khang bruk salih pandar taka so dalam sang bac.

Tinh Soc Trang jak ba abih pakat chinh tri kham merat ngak salah danak dak ngak brei oh daok baoh sang taik tahak. Kuhria  mbuah tal ini, tỉnh padang ngak, pasiam veik hu 4.935 baoh sang saong ngak salah hu 2.269 baoh sang ka bhap bini. Piah ngak sumu tukvak ba tabiak, Bi thu Tinh uy Soc Trang tacei pato dom bhum palei jhul khang bruk pathau khar dakvak, jak ba dom urang, dom kapol nyaom rik jien Kadung jien Daong urang kathaot di tỉnh sumu tukvak peih ngak dom bruk ngak brei abih baoh sang oh daok taik tahak, kham merat ngak salah dahlau di harei 30/9/2025.

Di tinh Tien Giang saong Ben Tre, bilan raong hadang akao thun ini, yaom tagok glong yau nan ye urang raong hadang mek tame yaok ti dong. Urak ini, hadang the takai patih  saong hadang su jnaih 25 -30 drei sa kilo, yaom 180.000 - 210.000 đồng, hadang  40 drei sa kilo yaom labaih 150 ribau dong sa kilo, tagok glong dua mbang saong tukvak ini thun dahlau. Yaom hadang tagok glong kayua hadang raong mbang dahlau  njauk ruak ba tal hadang trun takik, dalam tuk nan urang khin blei hadang dalam negar saong pablei tabiak negar langiu tagok glong.

Durian tabiak baoh karei bilan di dom bein bhum gah Pei negar yaom meng 60 -70% dut saong tukvak ini thun dahlau. Yaom durian trun biar kayua tabiak ralo kadha birau di dom taneh ia blei tame ba tal bruk blei tabiak dang veik. Dom thun jaik ini, durian hu jeng sa dalam dom janih phun hu pala rilo abih di Ban Can Tho saong Bhum taneran kraong Cuu Long. Ta-eng Ban Can Tho hu jaik 5.000 ha. Dom bruk salih meng jalan pala drak saong darak pasar  meng tuk ini daong ka bruk pala phun durian hu karo saong cakrok patagok dalam tukvak anak tal.  

Kuhria tal puac thun 2024, dalam tinh Dong Nai hu jaik 2.000 labik raong glong panduan ba nao labik karei atau padeih raong, sumu 66% dalam abih tih labik var raong  njauk panduan ba nao atau padeih raong. Dom labik raong glang brei panduan  nao labik karei gaok kan kandah kayua kurang phun jien piah buh tame raong glang di labik birau; ralo urang ngak di dom labik raong glang umo taha yau nan ye kan salih bruk ngak karei…Ngan haong bruk khik ramik alam hacih sa-at, UB Bhap bini tinh Dong Nai brei labaih 3 ribau labik raong glang dalam tinh  padeih raong atau panduan ba nao labik karei.

Mentri Agama Indonesia khan lac, taong abih sarak tukvak nao makah ASaudi Arabia abih di nyu lac nao tal Taneh Po Nabi Mecca thun ini, hu tut  angan saong bayar ginup jien. Mbang nao makak thun ini tal Taneh Po Nabi Mecca lac 17.680 urang. Langiu di nan, daok hu biak rilo urang tut nagan jiak nao makak hu makna biak praong nan, meyah oh hu nao dalam thun ini ye dom urang nan meda brei nao dahlau  dalam thun anak tal. Mbiah tal bilan 12 thun 2024, hu jiak 5 trieu 500 urang Isalam  Indonesia dalam sarak nao Haji.

Dom urang ilamo  Trung Quoc  birau duah mboh sa janih  virus corona birau meda njom tame dalam rup manuac dreih yau SARS-CoV-2. Janih virus birau hu angan HKU5-CoV-2, hu duah mboh do cim dhur saong pandar  sa janih protein langiu piah tame rup manuac  yau SARS-CoV-2. Yau nan min, dom urang ilamo kakei lac virus ini oh tame rup manuac mbuan yau nan. Dom urang roh duah Mỹ mboh lac dom bruk haduh hatai ralo ka janih virus birau nan lac oh njauk.

Rajaei Australia sanya brei buh tabiak 8 ti 500 trieu dola Australia piah ngak bruk iek glang prein yawa ka bhap bini dalam negar. Tui panuac pathau khan nan hu pabak veik 18 trieu mbang urang bac si da khoa hu daong yaok thun, sa rituh paok jien daong urang dieu duong saong yaok ribau  paok jien daong ka urang bac si nao bac pasram ilamo. Danak iek glang prein yawa  taong abih bhap bini di Medicare piah taong abih bhap bini hu iek glang prein yawa  abih takik jien atau oh mek jien./.