Ong Nguyễn Văn Nên, Uy vien Mentri Chinh tri, Bi thu Thanh uy Ban raya Ho Chi Minh, harei kabroi dang akaok mbang nyaom biai Gah Pato Tacei dom danak dak pahadar 50 thun Harei Peih paha gah Meraong negar, yasa taneh ia (30/4/1975 - 30/4/2025), piah pang veik bruk ngak danak dak saong kuhria iek taong abih dom bruk srap gap peih harei pahadar, dieu binh, dieu hanh…Tui Bi thu Thanh uy Ban raya Ho Chi Minh, njauk ngak bruk biak samar drah,  pataom tame tani tanat piah salah blaoh taong abih dom asal kadha haong hatai caong glaong abih – meng bruk srap gap, peih ngak tal asal kadha tantu yaok banah – biak tani tanat cambaih laih. Ong Nguyễn Văn Nên pandar yaok urang jakar, cong chuc, vien chuc brei mboh hatai “ngak ka abih bruk oh ngak tal abih mon”, srap gap salih tukvak ngak ka gauk, rabha tukvak ngak piah khik kajap salah blaoh bruk hu njauk tukvak.

Mban tacei ba ngak bruk  Danak dak ramik, pagam tinh Binh Phuoc tame tinh Dong Nai brei duah thau tapa dom jabat pambuak tal brei panuac tame du thao danak dak. Tui Danak dak, tinh Dong Nai (birau) hu 95 don vi hanh chinh pakat xa. Dalam nan, xa Dak Lua( huyen Tân Phú, tỉnh Đồng Nai) saong xã Đăng Hà (huyện Bù Đăng, tỉnh Bình Phước) lagaih pambuak, dom bruk lagaih gah kinh te-xa hoi sumu gauk saong dua bhum taneh jaik taphia gauk. Yau nan ye, UB bhap bini tinh Dong Nai brei thau, bruk ba tabiak di Trung uong pasang iek, njauk hatai brei ka 2 tinh ini ramik pagam xa Dak Lua tame xa Đăng Hà.

UB Bhap bini tinh Ca Mau bahrau hu mbaoh tangin, sarak daong sang daok ka urang hu ngak bruk katmang meng kal, urang gauk gar adei sa-ai di bol lin plang lahik di dalam tinh thun 2025. Tui sarak, dalam tinh Ca Mau hu 1.147 urang hu ginup tanut ka bruk daong sang daok. Tanut daong hu 60 trieu dong/baoh sang ngan haong bruk bahrau padang baoh sang; daong 30 trieu dong/baoh sang ngan haong bruk pasiam pakajap sang daok. Taong abih jien padai daong tui sarak labaih 52 ty dong meng kadung jien Karja.

Danak dak buh jien tame padang ngak tatua Đại Ngãi di jalan raya 60 pambuak tinh Soc Trang haong tinh Tra Vinh daok hu peih ngak. Dalam nan, tatua  Đại Ngãi 2 pambuak huyện Long Phú saong Cù Lao Dung, tỉnh Sóc Trăng mbiah tal ini ngak hu salah blaoh 90% bruk ba tabiak, tui kuhria mboh dahlau ngak blaoh saong peih radaih nduac  njauk  tame harei 30 bilan 4 anak tal. Kuhria tal ini, tatua Đại Ngãi 2 ngak jaik blaoh , daok dom bruk gah langiu hu dom don vi daok pataom tame ngak brei salah yau: lan can tatua, ngak njuac mbaok tatua saong dom bruk khik brei salamat angaok tatua.

Harei ini (25/4), dom urang pakacah juak radaih tame mbang 20 pakacah juak radaih mek Cup Papar binguk Ban raya Ho Chi Minh – Tôn Đông Á 2025 haong jalan biak kan kandah meng ban Vung Tau tal ban Bien Hoa (Dong Nai). Mbang pakacah atah 129km pagun sanya hu ba mai dom kadha kacah gauk juak radaih biak mekre tui iek. Hadei tuk tamat blaoh mbang kacah gauk, Gah padang peih ngak hu jao yai thuong ka dom urang naih joi abih. Ini lac mbang piah pok meyaom dom kham merat di dom urang kacah juak radaih samar hadei mbang kacah gauk biak chreih chrai.

Biar harei kabroi, Trung Quoc brei cuh kapal ahaok hu manuac peih tagok langik Thần Châu 20 meng  Pasak cuh ve tinh Tửu Tuyền, gah payaok -Tay Bac negsar Trung Quốc meng ten lua Trường Chinh-2F Y20. Dalam kapal ahaok nan hu 3 urang Chen Dong, Chen Zhongrui saong Wang Jie. Ini lac kapal haok hu manuac peih  ka 5 dalam tuk pandar  saong patagok balai vu tru saong ngak bruk di kapal haok ka 35 dalam danak  ahaok hu manuac peih di Trung Quốc.

Rajaei Đức hu pasiam khang ka bruk kuhria cakrok patagok kinh te thun 2025, meng tanut 1,3% trun daok 0%, kayua dom cuang kandah dalam dunya dui atah, ndap nda ngak meng gah ngak kong takik saong dom kan kandah ka gah nang luong jeng oh ka hu langyah. Bruk patrun kuhria ndom biai ka dom bruk duh hatai dak harei dak tagok di rajaei Đức ka bruk pasiam di gah kinh te dalam bruk pablei salih dalam dunya suai gilac, jien laba glaong dui atah saong cuang kandah gah chính trị ngak salih ka darak pasar saong ngak tayah bruk pambuak pagam pabak ndap nda.

Malaysia daok mboh bruk tamuh tabiak rilo dom bruk pachot pagat hu pandar kong nghe tri tue nhan tao, ngan haong 12.000 mbang pachot pagat online hu pandar kong nghe glong dalam klau bilan akaok thun 2025. Canh sat Malaysia khan brei thau ka dom bruk pachot pagat online hu pandar kong nghe glong, ngak labaih 130 trieu USD ka bhap bini. Malaysia kakei bhap bini juai tame dom jalan oh bhian randap saong juai brei ka urang karei thau asar kadha di rup drei jeng yau gilang pariak./.