Pamaong tal harei pahadar 50 thun harei Peih paha gah Meraong negar, yasa taneh ia (30/4/1975 - 30/4/2025), Ban raya Ho Chi Minh brei peih bruk pilih ruah 50 urang naih gheih gah ilamo, urang daok langiu negar, urang ngak bruk bangsa, gah agama…hu rilo rik daong tame ka bruk gul pataom bangsa rahra di Ban raya Ho Chi Minh, tukvak thun 1975 - 2025. Tui So Noi vu Ban raya Ho Chi Minh, dom urang hu pilih ruah oh rabha tui thun umo, bruk ngak, agama, bangsa, hu rilo bruk ngak siam gheih dalam gah kinh te, ilamo, xa hoi, daong padang bruk gul pataom grauk bangsa dalam Ban raya Ho Chi Minh meng thun 1975 tal ini.

Pambuak tal danak dak jalan peih drah samar Gia Nghĩa (Đắk Nông) - Chơn Thành (Bình Phước), urak ini tinh Bình Phước daok samar padang ngak 6 labik daok birau di 4 labik: Ban Đồng Xoài, Ban sit Chơn Thành, huyện Bù Đăng saong huyện Đồng Phú, ngan haong jien buh tame jaik 4 ribau ti dong. Tui kuhria mboh dahlau danak dak ngak brei salah di thun 2026, ba tame pandar ngak bruk di thun 2027, rik tame biak praong jhul pasamar bruk pambuak di Tay Nguyen saong Dong Nam bo, jalan pambuak ngak atah ngak brei takik abih tukvak nao mai meng Đắk Nông tal Bình Phước, TP.HCM.

Harei raya Kaphe Buôn Ma Thuột mbang ka 9, thun 2025 hu peih tamat di malam blaoh 13/3. Hadei 5 harei rah tabiak, harei raya hu dui pachreih labaih 250.000 mbang tuai damuai mai tal Dak Lak. Rilo asal kadha hu salih bahrau, hadah krah paying ka asal kadha “Buôn Ma Thuột - Labik mai haong kaphe di dunya” hu payua nao asal kadha: Patui veik ngak bruk, Labik piah mai, Pambuak kaphe di Viet Nam. Ong Nguyễn Thiên Văn, Phaok akaok UB Bhap bini tinh Dak Lak, taong yaom: Harei raya kaphe pamaong tal bruk padang “Buôn Ma Thuột jeng labik mai rivang di kaphe dunya”.

Melam 13/3, di ban sit Sông Đốc, huyện Trần Văn Thời, tỉnh Cà Mau, Adat ngak yang Nghinh Ông Sông Đốc hu peih pakak ngan haong kadha “ Drap ar Ilamo phi vat the pakat negar Adat ngak yang Nghinh Ông Sông Đốc - Cà Mau 100 thun padang tabiak saong patagok”. Adat ngak yang Nghinh Ông Sông Đốc oh lac pabak bruk caong khin hatai sahaneng ilamo di urang nao tasik tinh Ca Mau bo daok ngak brei ilamo biak praong, piah pambuak bhap bini. Adat ngak yang Nghinh Ông Sông Đốc rik tame pato pakai ka rairah bhum palei saong lac jalan khik ramik drap ar ilamo khang kajap.

Dalam dom harei jaik ini, Ban raya Ho Chi Minh saong dom labik di Dong Nam Bo daok hu pandiak, pandiak meng hadah page tal biar harei mesup. Tanut UV ngak kanjah jhak biak glaong. Bruk daok dui atah takik abih lac tal abih adit ini. Dalam labaih tukvak meng 10h page tal 16h biar harei mesup, rahra brei takik tabiak langiu piah plaih bruk kanjah jhak di tia cuc tim saong pandiak.

Tong thong My Donald Trump brei taong jien je alak vang 200% ngan haong taong abih dom janih alak vang saong dom pandap panda hu alak mai meng Lien minh chau Au, meyah gah ini oh klak mek jien je alak whisky. Bruk nan peih ngak tok 1 harei  hadei tuk UB chau Au khan brei thau jien je buh tabiak dahlau lac 26 ti tỷ euro (sumu 28 tỷ đô la) pandap di My mai meng bilan anak tal, piah bayar abih jien je di My ikan ka thep saong nhom. Dom bruk nan ngak kan kandah gauk catang bruk dalam bruk pablei salih.

Kenh papar binguk DW hu kaoh ba khau tin kayua Jabat pathau khan negar langiu di Đức brei thau, dom mbang duah pasang iek bruk ba tal ka bruk gaok bala, atau sa bruk kan kandah oh njauk hatai caong khin dalam bilik ngak iek dahlau di Trung Quoc hu meda mbuan ba tal jit ruak COVID-19. Dom kadha vak brei thau lac hu kuhria mboh makna meng di thun 2020, ba tabiak tanut taong yaom ka bruk meda rah tabiak tui kuhria nan lac 80% - 95%, min khik kandauk haong rahra dalam tukvak nan.

Sa roh duah birau khan lac di harei 12/3 lac pandiak di tasik đại dương tagok glong oh bhian mboh di 2 thun tapa. Tui roh duah ba tagok angaok harak tap chi Nature, Baoh taneh pandiak tagok dalam dom pluh thun ini mai tuk dak harei dak rilo thak nerak. Meng bilan 3 thun 2023 - 4/2024, pandiak di mbaok ia tasik  di dunya glong jang 0,25 do C dut saong pandiak glong abih dahlau di nan. Urang roh duah Jens Terhaar di Đại học Bern (Thụy Sĩ) mboh lac, urak ini pandiak di mbaok ia tasik yau nan biak takik, kuhria 500 thun meng hu sa mbang meyah kuhria tui Baoh taneh dak harei dak pandiak jang yau urak ini./.