Mban tacei ba pakat Negar peih bruk ngak brei abih baoh sang oh daok taik tahak hu ba tabiak bruk kham marat tal harei 31/10 ngak brei salah bruk oh daok baoh sang taik tahak dalam negar. Meng tuk peih ngak mbiah tal ini, dalam negar  ngak hu 109.000 baoh sang, sumu 77% kuhria abih baoh sang khin daong sang daok. Yau nan ye Thủ tướng Phạm Minh Chính caong khin dom pakat, dom gah  kham merat glong jang, kham merat rilo jang, ngak cati catang, siam jang, njauk bruk, lagaih piah ngak hu siam jak jeng bruk di danak dak. 

Harei Dinh dưỡng Bhap bini Viet Nam mbang 4 peih ngak di TPHCM, Mentri Y te iew bhap bini, abih di nyu nan lac rairah dam dara, brei ngak tui dom bruk salih hasit dalam bruk  bhian randap mbang huak saong pasram rup pabhap piah hu karo kajap. Abih di nyu nan lac bruk labaih kilo saong lameh lac thaik thaok oh gheih bo daok mbuan njom mbak rauk trak yau baoh baoh hatai, me-ik saradang…Tui GS.TS Trần Văn Thuấn, Thứ trưởng Mentri Y tế, dom manuac lameh, labaih kilo  di dom ban praong, abih di nyu nan lac TPHCM, daok rilo saong labaih 20%, bruk nan mboh huac, njauk brei sahaneng kuhria.

Tong Kong ti Kapal haok Viet Nam (ACV) daok nga brei samar salah blaoh dom harak gal, kham merat padang ngak jalan par tagok saong trun ka 2 di bilan 5 atau bilan 6 anak tal. Tui ACV, danak dak hu peih ngak dalam 12 bilan, piah ba tame ngak bruk gam haong jalan par trun ka 1 tuk danak dak Mblang kapar haok dunya Long Thành  hu ba tame ngak bruk sumu gauk taong abih tui kuhria dahlau meteh thun 2016.

Meng bilan 3, dom po bein di bhum taneran kraong Cuu Long tame bilan paik baoh durian. Thun ini, durian brei rilo baoh min yaom pablei oh yau hatai caong takre. Urak ini baoh durian Ri6 di dom bein meng 25.000 đồng/kg biar jang 5.000 - 15.000 đồng/kg dut saong dahlau di ini metah bilan. Yaom trun min takik urang blei. Bruk nan kayua bhum taneran kraong Cuu Long tame bilan paik baoh durian, biak rilo baoh min bruk pablei tabiak negar langiu daok suai damuai. Langiu di nan, bruk caong blei durian oh ralo yau dahlau diah.

Tui pasak Kuhria iek dahlau langik tasik pakat negar, meng ini tal harei 15/5, di labik tapen tasik Đông Nam bộ (ĐNB) meda hu ia ndik tagok glong abih di balai Vũng Tàu meng 3,7 - 3,8m. Bhap bini brei caga dahlau di dom labik dhong biar, tapen kraong saong bhum langiu ar ribaong tapen tasok gah ĐNB. Ia ndik  tagok glong ngak suai tathuak ia di dom kraong gah ĐNB ngak ia dauk tuk page subuh saong tuk laik biar harei.

Harei ini 12/5, Philippines palih ruah kreh vaktu ngak bruk. Langiu taong abih gah cảnh sát, bol lin Philippines hu brei 45 ribau bol lin gam dom radaih, phao siuk ndap nda caga blaoh blai piah hu bruk hagait kandah rah tabiak oh thau dahlau. Meng kan mai,  bruk palih ruah kreh vaktu di Phillipines nan lac bruk duah thau hatai sahaneng di bhap bini oh ngak biak ngan haong urang jakat daok ngak bruk. Langiu di nan, bruk palih ruah Thuong vien jeng hu brei mboh dom urang tabiak ung cu piah hu mbuan ka bruk palih ruah Tong thong thun 2028.

Blah harak mbao di ndao Lao dong Trieu Tien, Rodong Sinmun brei thau, labaih 20.000 baoh sang bahrau hu padang di 130 labik ngak nong di bhum palei Trieu Tien dalam thun 2025. Ini hu maong yau sa banah dalam kham merat pasamu gauk di ban saong palei pala di Trieu Tien. Ndang Lao dong Trieu Tien ba tabiak jalan kuhria pabak ka rahra palei pala hu kein lagaih ka bruk pahacih sa-at samu haong rahra dalam ban.

My saong Iran salah blaoh mbang ndom meyai ka hat nhan ka 4 do Oman. Salah mbang ndom biai, Mentri Ngoai giao Iran taong yaom ini lac mbang ndom meyai kan kandah min hu kein lagaih. Tui nan, dua gah thau tanat jang jalan sahneng di gauk piah meng nan duah tabiak dom jalan ngak njauk saong lagaih piah langyah dom bruk karei gauk. Min, mbang nyaom biai hu jak jeng yau habar oh ka hu ndom tal./.