Urak ini, dom menuac daok ban glai ban klo, lakau mbang di langiu jalan trun daok takik, dom bruk duas hình sự jeng trun rilo, abih di nyu lac dom bruk co klaik saong ma túy, jru phiel, daong khik pacang siam mekre, salamat, sron mbon ban raya. Min, Sở LĐTBXH brei thau, jeng daok hu menuac likau mbang ban gkai ban klo kayua bruk ngak mbang kinh te kan kandah, rilo menuac oh ka hu bruk ngak tani tanat. 

Đồng Tháp lac tỉnh dang akaok bhum ĐBSCL ka dom kaya pandap OCOP. Dalam tỉnh hu labaih 450 kaya pandap OCOP hu brei angan 3 patuk, 4 patuk, 5 patuk, urak ini hu rilo kaya pandap hu pablei tapa dom darak pasar negar langiu saong hu dom gah blei taong yaom glaong kayua dom kaya pandap OCOP pabak hu hatai caong khin ka chất lượng, thaik thaot kaya pandap. Urak ini Đồng Tháp kham merat 100%, kaya pandap OCOP hu pablei salih angaok labik online. Gam haong nan tỉnh jeng caik hatai sangka praong tal bruk pambuak haong dom doanh nghiệp, dom dam dara padang mbang ngui piah daong jhul tagok bruk ngak tabiak pablei salih, pablei pandap kaya nong saong dom kaya pandap OCOP.

Dalam ban Cần Thơ hu labaih 25.000 hecta phun mbang baoh, dalam nan huyện Cờ Đỏ hu jaik 5.000 hecta. Tui UBND huyện Cờ Đỏ, baoh darang thanh nhan lac janih baoh mek hu tanut pablei tapa negar langiu saong hu pabak brei 36 mã số bhum pala pablei tapa dom darak pasar Hoa Kỳ saong Australia, Japon, Thái Lan, EU saong Trung Quốc. Tui panuac khan di rilo urang pala janih darang ini, pala tui jalan hữu cơ brei năng suất, chất lượng tani tanat, baoh darang praong, mekre, jien laba di urang pala glaong jang duk haong pala meng kan labaih 20 triệu đồng/hecta. 

Kayua oh ginup pablei nan tame tukvak ini yaom phun durian pajaih di tỉnh Hậu Giang daok tagok khang. Yaom phun durian pajaih Ri6, Monthong meng 120.000-200.000 đồng sa phun, tagok meng 20.000-30.000 đồng sa phun dut saong tukvak bilan pandiak. Taneh pala durian di tỉnh Hậu Giang tagok kayua tukvak tapa baoh durian pablei hu yaom, rilo sang bein hu jien mek tame meng 1-2 tỉ đồng sa ha ba tagok. Gah chức năng Hậu Giang daok kakei rahra brei sahneng kuhria tani tanat dahlau di tuk peih praong taneh pala durian piah plaih di bruk baoh rilo pablei oh abih, meng nan ngak khat lahik oh sit ka urang pala.

Hadei di labaih 1 bilan ba tabiak ngak, tal urak ini, Sở Ngak nong saong Patagok palei pala tỉnh Bà Rịa – Vũng Tàu hu klaak tut angan 379 kapal gilai ikan angaok Hệ thống bruk ngak ikan taneh ia. Ini lac dom sruh kapal gilai khut bruk atau kram, khuah...Langiu di nan, tỉnh hu labaih 600 kapal gilai taong cap langiu tasik oh ka ginup kadha piah nao taong cap kaya ikan atau daok cang harak adat bahrau. Urak ini, abih tih dom kapal gilai ikan di Bà Rịa - Vũng Tàu daok hu 4.345 sruh. Ini lac dom sruh bo EC tui iek kayua hu kaya ikan pablei tapa darak pasar châu Âu.  

Thủ tướng Campuchia Hun Manet bahrau ini hadah mbaok meta brei thau, labik yu lit danei angan Angkor Wat di negar ini hu pilih ruah lac “mbang thaot binguk” abih di Asia, dalam dom Inem Mek Dunya hu UNESCO brei angan. Angkor Wat lac sa dalam dom kalan pasak daok dalam dom kalan Angkor di tỉnh Siem Reap. Ini lac labik yu lit dane angan saong dui pachreih tuai damuai mai ravang me-in abih di Campuchia. Vịnh Hạ Long di Việt Nam jeng hu angan dalam harak nan. 

Dalam thun ini, dom menuac umo labaih 65 thun daok di negar Japon hu rilo di abih lac 36 trieu 250 rabau urang, rilo jang 20.000 menuac duk haong thun dahlau di nan. Tapa nan jeng brei mboh tanut glaong bahrau, ba taneh ia Japon jeng taneh ia hu menuac sia taha glaong abih di dunya. Hu thau, dom menuac taha praong thun di Japon jeng daok di tanut glaong abih dalam 200 taneh ia. Italia saong Bồ Đào Nha daok dalam 5 taneh ia dang akaok, patui di nan tal Hàn Quốc saong Trung Quốc.

Jit ruak đậu mùa khỉ daok rah tabiak srau kadau di Africa haong dom mbang njaom ruak bahrau glaong tagok. Di dalam adit blaoh, hu abih tih 3.160 mbang urang njauk ruak bahrau saong 107 urang metai. Dalam nan, Gah Y tế Dunya brei thau, prein dut iek ruak đậu mùa khỉ saong vắc-xin daok biak takik di labik pasak jit ruak CHDC Congo. Meng blaoh, Pasak Pasang iek saong Pacang caga Jit ruak (CDC) Africa jeng brei thau lac daok peih ngak jalan langyah haong WHO. Jalan ngak dui atah 6 bilan meng bilan 9 tal bilan 2/2025, hu kadung jien karja tui kuhria mboh lac jaik 600 triệu USD./.