Akaok UBND TP.HCM jeng likau Rajaei, Thủ tướng Rajaei patui veik pataom prein tame pato tacei bruk peih ngak dom jalan ngak, dom sarak ba tabiak dalam 6 bilan akaok thun; pataom tame langyah dom bruk daok kandaong veik di dalam darak pasa taneh riya sang danaok, tín dụng trái phiếu, dom adat pacang caga pui khuah padam khuah, đăng kiểm saong dom adat karei jeng daok gaok kan kandah.

Mintri Công an pambuak bruk haong tỉnh Sóc Trăng bahrau peih bruk jao sang mẫu saong jien daong padang ngak sang brei ka sang urang kathaot, sang urang bangsa Khmer kan kandah ka sang daok dalam tỉnh. Ini lac sa dalam 1.200 baoh sang hu Mintri Công an daong ka tỉnh Sóc Trăng padang ngak brei ka sang urang bangsa takik, gaok kan kandah ka sang daok, meng jien daong di dom doanh nghiệp, urang ngak pahla. Yaok baoh sang hu daong 50 triệu đồng ngak sang saong tabung sang. Daok jien ngak móng nền kayua sang rik tame atau palei ieu pataom meng kadung jien njauk adat hukum karei karei.

Mban Khik ramik danak dak buh jien tame padang ngak tỉnh Đồng Nai brei thau lac, hadei di tuk tacei tabiak po thầu, urak ini 6 paok thau padang ngak danak dak padang ngak sang danaok ka rahra di labik tái định cư Lộc An – Bình Sơn pabak ka mblang kapar haok Long Thành jeng hu peih ngak gilac veik. Yaom lac hu peih ngak gilac min kayua kurang phun jien nan ye bruk peih ngak 6 danak dak ini gaok rilo kan kandah. Makna lac kayua labik tái định cư ini abih tukvak ngak meng di thun 2021 nan ye yaom lac hu rami ramik phun jien min ka oh brei masaiy hu. Piah taoh talaih dom tavak tavaiy, bahrau ini, tỉnh Đồng Nai hu likau Trung ương brei  nyim dahlau 100 tỷ đồng piah jhul samar bruk ngak salah dom danak dak ka rahra di Labik tái định cư Lộc An - Bình Sơn.

Thun ini, dalam tỉnh Cà Mau hu 62 janih pandap di 44 po tut angan hu mbaok tame danak dak OCOP; 25 janih pandap di 16 po tut angan paglaong labik dang meng 3 patuk tagok 4 patuk. Piah patui jalan ngak hu siam danak dak OCOP, UBND tỉnh Cà Mau hu brei bruk ka sở, ngành, kapul nyaom tỉnh peih ngak bruk daong paglaong labik dang di pandap OCOP, kham merat tal puac thun tagok hu takik di abih 40 janih pandap. Tal urak ini, Cà Mau hu 128 janih pandap hu brei angan OCOP, dom pandap hadei di tuk hu brei angan, pablei hu rilo jang meng 10 - 30%.

Trung Quốc bahrau brei nduac iek hu siam mekre radaih nduac samar CR450, nduac hu 453 km sa tuk. Ini hu maong lac bruk tagok bahrau khang di Trung Quốc dalam paglaong chất lượng saong công nghệ radaih praong nduac samar ndung bak pakat dunya.  Tui kuhria di dom chuyên gia, tuk ba tame pandar CR450, haong prein nduac samar labaih 400 km sa tuk, ye nao meng Bắc Kinh tal Thượng Hải atah labaih 1.100 km tok abih 2 mon meteh.

Hadei di jaik 20 bilan peih ngak tal urak ini, tỉnh Tiền Giang hu padang ngak salah 2 danak dak pacang ia mbak saongkhik piah ia taba praong abih tapen kraong Tiền lac Rạch Gầm saong Phú Phong di huyện Châu Thành. Dom danak dak pacang ia mbak ini ngak salah meda daong ka yaok ribau baoh sang pasang iek hu ia taba piah tani tanat bruk ngak mbang, pala drak bhum pala phun mbang baoh hu yaom glaong, yau ye durain, sapô. Gam tui di nan, caga dahlau bruk salih ngak dom bruk ngak nong lagaih haong bruk bien đổi khí hậu.

Jaik 3 tỷ menuac, samu 30% menuac sia di dunya, jeng menuac nao daok di labik karei kayua biến đổi khí hậu di puac abap ini. Nan lac bruk hu urang ilamu gah khí hậu lac urang Nga angan Alexei Kokorin bahrau ba tabiak. Tui ong Kokorin, ini lac bruk hu kuhria tui biến đổi khí hậu jhak abih, daok meyah jhak takik jang, meda hu 10% dom menuac panduan nao daok di labik karei. Bilan dahlau, Gah Khí tượng Dunya di Liên hợp quốc kuhria mboh dahlau lac, dalam 5 thun tal, nhiệt độ di dunya meda tagok tal tanut glaong di abih.

Bruk sarau kadau di dalam taneh ia France dui atah 6 harei tapa pambuak tal bruk cảnh sát cuh matai sa urang dam umo 17 thun ngak khat lahik labaih 20 triệu euro ka gah radaih pajeng mebuac nao mai di labik Paris. Duah jalan langyah ka bruk ini daok lac sa dalam dom kan kandah peaong abih ngan haong Tổng thống Emmanuel Macron. Dalam 3 harei tapa, hu 45.000 cảnh sát saong urang lin hu ba tabiak khik iek dalam taneh ia. Kuhria tal harei 3/7, hu 78 urang njauk cap mek kayua pambuak tal bruk ngak brei srau kadau nan./.