Ban sit Long Khánh, tỉnh Đồng Nai bahrau brei thau đồ án ramik veik bruk padang ngak saong bruk pandar taneh dalam ban sit. Bruk ngak nan piah pamaong ba ban sit Long Khánh jeng đô thị ka 2 di tỉnh. Ban sit Long Khánh hu parabha jeng 10 phân khu, dalam nan peih praong patagok đô thị nao gah pai piah tagok bruk pambuak gauk haong dom jalan mbak dom bhum. Tỉnh Đồng Nai kakei Long Khánh tuk ieu urang buh jien tame ngak mbang brei biak caik hatai tal bruk tái định cư, padang ngak dom labik sang daok xã hội, sang daok ka urang ngak, gam haong nan brei khik ramik catang taneh riya, bruk padang ngak saong alam môi trường.

Meng bilan 6/2021 tal bilan 3/2022, dom sang iek ruak uraniah di TPHCM hu 315 uraniah tapa pasang iek ruak mboh lac njauk atau medil njauk hội chứng viêm đa hệ thống (MIS-C) hadei meng njauk COVID-19. Uranaih njauk ruak ini, dalam rup bhian mboh: pandiak glaong gam gam, meta meriah bhong, cambuai bhong meriah, tagok mban di klik, brah - pandik hạch takuai saong taglaoh ta-ok, pandik tian, aih craoh. Sở Y tế hu panuac kakei lac uraniah mboh yau njauk hội chứng MIS-C brei hu tui iek saong taong ruak di dom sang iek ruak uraniah.

Urang nong pala medar di tỉnh Ninh Thuận daok sangka tui iek, paik baoh medar pablei ka urang pablei salih. Urak ini medar daok hu blei di bein  yaom meng 20.000 tal 25.000 đồng sa kg. Kuhria rah tapa, yaok sào medar paik hu meng 3-4 tấn baoh sa vụ, tui yaom pablei yau ini, hadei meng kaoh abih phun jien buh tame ngak, urang pala medar daok laba hu yaok pluh triệu đồng sa sào. Medar hu yaom, daong ka mikva urang nong hu prein piah jhul khang bruk pasiam veik pala drak hadei di jit praong COVID-19.

Dua mbang hajan suan bilan di akaok bilan 4 meng blaoh ngak ka jaik 10.000 tấn sara cang kuac mek ralai abih jeng ia, ngak ka 764 baoh sang ngak sara di huyện Đông Hải, tỉnh Bạc Liêu laik tame mbong patih abih tangin. Taong abih dom taneh ngak sara labaih 1.200ha di huyện jeng khat lahik biak trak, oh pasiam veik hu. Piah klah rabha kan kandah haong urang ngak sara, huyện Đông Hải likau hu daong ka urang ngak sara labaih 2,2 tỉ đồng.

Công an ban sit Long Xuyên, tỉnh An Giang bahrau pok meyaom kreih camin menuac gheih bruk siam ka sa-ai Nguyễn Huỳnh Bảo Hân kayua bayar veik jaik 21 triệu đồng ka urang ngak lahik. Sa-ai Hân urak ini daok pablei ia menyum di tapen takai jalan. Yaom lac sang kan kandah min sa-ai oh hava. Bruk ngak siam mekre nan di sa-ai hu daong pambak tabiak hatai jia tame bruk siam mekre di hatai menuac dalam saman bahrau urak ini.

Thủ tướng Anh Boris Johnson  hu panuac likau ma-ah ampuan anak Hạ viện, hadei di tuk njauk cảnh sát taong phạt kayua ngak suan adat pacang caga jit COVID-19 di bilan 6/2020. Thủ tướng Johnson taduan lac ong ngak suan, yaom lac di tukvak nan, ong oh sahneng lac var payak uan harei menek dalam tuk jit tagok tal tabung glaong nan nyu suan dom adat pa-atah di gauk. Gam haong nan jeng hu panuac lac, rahra hu quyền ndok dom tiêu chuẩn glaong jang saong caong tame jalan ndom puac daok dang siam jang meng Thủ tướng.

Nga daok kuhria peih ngak dom jalan gah adat hukum piah mek veik jaik 300 tỉ USD khik piah ngoại hối daok njauk rilo rajaei phương Tây kreik veik hadei di tuk Nga taong tame Ukraina. Thống đốc Gilang pariak negar Nga brei thau, ini lac bruk pacang veik drap ar oh ka bhian mboh, biak praong saong pakat dunya praong abih kuhria meng kan mai. Kayua yau nan ye, Nga daok caga dom jalan yah bak saong caga payua harak yah bak.

Dom harei ini, di Nicaragua, rilo rahra daok nao bac caluai piah  caluai tapa hu 1 baoh kraong di tapen negar Mexico saong Mỹ. Jaik abih dom urang bac caluai ini, lac dom urang amaik sa drei raong anek, urang oh hu bruk ngak atau ngak oh ginup mbang. Hatai caong di rilo menuac lac nao ngak bruk di Mỹ, patak pataom jien blaoh mai sang veik peih sa bruk ngak mbang, pablei salih. Dalam labaih 1 thun tapa, hu jaik 112 rabau menuac di Nicaragua njauk cap mek di labik tapen negar tuk urang daok kham merat caluai tapa Mỹ./.

Urang lang: Thu Thảo & H.Pha – 20/4/2022