Rajaei tabiak sarak brei angan ban Sóc Trăng lac đô thị ka II di tỉnh Sóc Trăng. Ban Sóc Trăng brei thau lac meda yam tagok jeng pasak kinh tế di bhum sit tapen tasik biển Đông; pasak raong pala, taong cap saong pablei tabiak negar langiu kaya ikan, pasak ngak pandap meng kaya nong, kaya ikan, công nghiệp năng lượng hacih saong jeng 1 dalam 6 đô thị ka I di bhum taneran kraong Cuu Long. Tal thun 2025, ban Sóc Trăng meda ngak hu tanut glaong di dom bruk lac đô thị ka II, caga ginup pandap panda saong padang ngak cơ sở dữ liệu piah pamaong tal đô thị thông minh.

  UBND tỉnh Đồng Nai bahrau pok panuac ieu Gah pato megru - khoa học saong ilamu Liên Hiệp Quốc (UNESCO) brei panuac saong brei thau dahlau bruk oh siam meda hu meng padang ngak tatua Mã Đà saong jalan roya 13C nao tapa bhum kreh labik khik piah sinh quyển dunya. Labik khik piah ini, lac hala phổi hijao di Đông Nam Bộ. Di labik ini daok hu 3 inem krung sajarah pakat negar. Rilo thun tapa, Đồng Nai hu khik caga taneh glai, dom janih athur quý hiếm hu mboh rilo jang.. Nan ye bruk padang ngak tatua Mã Đà nao tapa glai meda ngak khut labik ini, ngak kan kandah tal bruk khik ramik dom inem krung sajarah cách mạng chiến khu Đ.

  Mintri Y tế bahrau hu harak ieu dom tỉnh, ban ngak khang jang bruk klauk vaccine pacang Covid-19 mbang klauk ka 3 ka urang umo meng 18 thun tagok, jak ba bhap bini tame klauk njauk tukvak saong klauk ginup mbang piah ka bruk pacang ruak hu siam di abih. Urak ini, bruk klauk vaccine Covid-19 mbang klauk ka 3 ka urang umo meng 18 thun tagok, hu 52,9%.

  Urak ini yaom thanh long di ĐBSCL daok tagok veik, thanh long ralow bhong hu urang mai blei yaom meng 20.000 đồng tal 25.000 đồng/kg … Tui yaom ini, urang pala hu laba rilo, min hu baik takik urang nong daok hu baoh thanh long piah pablei. Dahlau di nan, urang jakar hu panuac ieu urang ngak nong jhui kaoh klaak phun thanh long, bo njauk iek glang siam piah tani tanat bruk pala ngak hu suai lavik.

Di mangaok mạng xã hội daok pambak tabiak đoạn clip katut brei mboh bruk yaok rituh bhap bini di huyện Chơn Thành, tỉnh Bình Phước dang patui gauk meng maong 3 dah page di dhar jabat tut angan taneh riya huyện, hadei di nan meblah gauk mek số thứ tự để cang ngak harak gar langyah dom adat pambuak tal taneh riya. Bruk ini hu meng akaok bilan 4, min tal urak ini bruk ini jeng daok rahtabiak, ka oh hu langyah tal labik tal dhua. Makna lac kayua dom urang mai ngak harak gar gah taneh riya tagok biak rilo dalam tuk prein langyah harak gar di jabat lac 100 harak gar yaok harei. 

Nyaom dom taneh ia  kinh tế patagok song bahrau tagok dang akaok dunya (G20) bahrau ni njauk hatai ka bruk padang sa kadung jien bahrau piah langyah bruk kurang jien ka bruk kuhria caga, ngak bruk piah pacang cakak jit prong COVID-19. Gah y tế dunya kuhria mboh lac jien piah pacang  jit prong yaok thun  kurang  10 tỷ 500 triệu  USD. Kadung jien pacang caga jit prong brei hu dong dalam 5 thun, samu 50 tỷ USD.

Indonesia bahrau brei thau Jalan ngak bruk di taneh ia ngan haong 5 jalan ngak praong piah pasiam bruk diukrai, pato magru ka uranaih taneh ia ini. Dalam nan peih praong bruk pambuak haong dom dịch vụ y tế, dinh dưỡng chất lượng; ba mai labik salamat piah daong ka bruk cak rok patagok di uranaih, ngak pasiam bruk pato magru saong paglaong bruk dom uranaih hu nao tal sang bac. Urak ini hu labaih 4 trieu 4 rituh ribau uranaih haong dam dara Indonesia oh hu nao tal sang bac.

Karja Hong Kong (Trung Quốc) brei adat peih veik dom bruk yau balik pasram rup pabhap, rạp chiếu phim hadei di labaih  4 bilan krek pabah mbang. Bruk pacadu di Hong Kong rah tabiak tuk urang njom COVID-19 hu trun ala 1.000 urang sa harei. Hong Kong pacang veik hu siam meng di thun  2020 ngak ka ban njauk  pacang cakak dalam sa tuk vak atah./.

Urang lang: Thu Thảo & H.Pha – 23/4/2022