Beir harei ni xang tagok yaom

  Hu jaik abih urang QH yer tangin njauk hatai, QH brei tapa Sarak ka bruk brei padeih ngak Tổng Kiểm toán karja vaktu 2021- 2026 ngan haong ong Trần Sỹ Thanh saong brei tapa sarak brei padeih ngak Akok mentri Jalan mbak pajeng ba vaktu 2021 -2026 ngan haong ong Nguyễn Văn Thể. Jeng di mbang nyaom harei ini, Thủ tướng  Rajaei Phạm Minh Chính pok tagok QH pasang iek brei tapa bruk menuac ngak Akaok Mentri Y tế lac muk Đào Hồng Lan, quyền Akok Mentri Y tế  saong Akok mentri Jalan mbak pajeng ba vaktu 2021 -2026 lac ong Nguyễn Văn Thắng, Bí thư Tỉnh ủy Điện Biên.

Beir harei ni (21/10), 2 mintri  Công thương – jien padai  brei tagok yaom xăng, menyek  tui mbang ramik veik yaom. Tui nan, yaom  xăng RON 95-III tagok  22.340 đồng/ sa lít (lac tagok  340 đồng/sa lít); Xăng E5 RON 92 tagok 21.490 đồng sa lít (lac tagok 200 đồng/lít). Yau nan, meng akaok thun tal ni, yaom xăng dalam negar hu tapa  28 mbang ramik veik yaom, dalam nan hu 15 mbang tagok  song 12 mbang trun, sa mbang khik tamo. 

Mentri Công an daok duah thau bruk 2 D.N pablei salih xăng menyek di Ban raya HCM saong Binh Thuan suai bayar jien labaih 24 tỉ đồng tame Kadung jien khik tani tanat yaom xăng menyek. Mentri Công thương hu panuac ieu 2 D.N samar payua abih jien daok labaih di kadung jien khik tani tanat yaom xăng menyek tame kadung jien karja. Hadei di nan, meyah dom DN oh buh jien tame kadung jien khik tanat yaom kaom, Mentri Công thương brei payua hồ sơ pambak tal bruk nan tapa MentrI Công an piah langyah tui bruk ba tabiak di hukum.

Jit pandiak tabiak darah (SXH) dalam ban TPHCM jeng dok srau kadau. Urak ni , dalam ban hu jiak 67.000 urang ruak, tagok jang 7 mbang dut song tuk vak ini thun dahlau. Bruk njauk caik hatai, adit tapa, ban raya hu gac  2.000 urang ruak pandiak tabiak darah song  3 urang metai. Meng akaok thun tal ni, tong abih urang metai kayua ruak pandiak tabiak darah  lac 29 urang. Dom urang gah y tế hu panuac kakei bhap bini patagok dom jalan pametai jamuk, lăng quăng, pacang jamuk kaik meng ndih kamo, pandar  jru pateok  jamuk …

Di tỉnh Kiên Giang bhap  bini bangsa takik meblah 15% bhap bini dalam tỉnh, ralo lac bhap bini bangsa Khmer. Yaok thun, dom pakat, dom gah saong karja palei jeng hu daong, ba mbuan lagaih ka bhap bini peih ngak rija roya, tet  tui adat hukum meng kan saong dom bruk ilamu, daoh tamia, padhih sambai , salamat, ndung ba bak ilamu bangsa. Abih di nyu, tỉnh hu patagok le hoi Ok Om Bóc di bol bhap Khmer di huyện Gò Quao tagok jeng” Harei Ilamu, Padhih saong Dulich di bhap bini Khmer tỉnh Kiên Giang’. Kapol ilamu Khmer  di tỉnh, yaok thun hu meng 70 -80 mbang parang daoh tamia duh ka mikva, abih di nyu lac mikva diukrai di dom labik bhum atah bayah, bhum taphia negar. 

Trung Quốc hu panuac jia lac mek hu jayah dalam bruk mesruh pacang jit prong hadei di tuk Taong Yam doc gah  Y tế dunya  (WHO) brei thau COVID-19 jeng dok lac bruk samar drah ka pren yava di dunya. Urang brei panuac di mintri  Ngoại giao Trung Quốc hu panuac brei thau veik bruk ngak tui sarak “Oh Covid-19 sami samar” di rajaei  Trung Quốc, gam song bruk khang hatai pambuak gauk pacang caga  jit song patagok kinh tế xã hội. Ong ndom lac, Trung Quốc “jia lac mek hu  jayah dalam mbang mesruh pacang jit bak kan kandah ”

Bruk lạm phát pandar cai di Nhật Bản tagok 3,0% di bilan 9, tanut glong abih dalam 8 bilan tapa. Angka 3,0% lạm phát yam tapa tanut ba tabik 2% di Gilang pariak negar Nhật Bản dalam bilan ka 6 gam gam, tuk jien Yên trun yaom biar abih dalam 32 thun, gam jhuk jien buh tabiak piah pablei pandap tabiak negar langiu tagok glong. Trak damah yaom kaom tagok dak harei dak catang di Nhật Bản saong jien Yên  trun biar  ala 150 Yen angaok sa dola My meda ngak brei darak pasar daok sahaneng caga.

Ribuk Ian nao tapa caik veik dom trak damak gam song dom cuang kandah ka karja song bhap bini di  bang Florida, gah Đông Nam negar Mỹ. Taphia di bruk khat lahik drap ar, rahra dalam bang dok dang anak bruk mbuan si tamuh "vi khuẩn mbang rilow menuac". Meng akaok thun tal ini, vi khuẩn mbang rilow menuac ngak brei 11 urang metai song  65 urang ruak di Florida. Rilo urang njauk blac raih, gaok mai cakak klak tangin, atau takai piah klah bruk nhiễm trùng./.

Urang lang: Hanipha- Ái Nghiêm -21/10