Meng harei 1 bilan 7 anak tal, tuk bhap bini ngak harak likau ngak thẻ căn cước hu jabat kong an pataom mek khaw tin sinh trắc học meta gam haong bingu tangin saong mbaok meta. Tui nan, bruk mek khaw tin sinh trắc học meta piah pasang iek brei thau khaw tin di yaok urang; daong bruk meyah oh mek hu bingu tangin di urang  yau ye urang jaoh jo, bingu tangin salih karei…Thẻ căn cước  bhap bini abih tukvak pandar meng harei 15 bilan 1 thun 2024 tal dahlau harei  30-6-2024 jeng daok hu pandar tal abih bilan 6 ini.

Tỉnh Kiên Giang hu kuhria caga blaoh blai ka mbang pakacah tamat THPT thun ini. Ong Trần Quang Bảo, Yam ndok Sở Pato Megru tỉnh brei thau, dom cei gru anai gru saong gah chức năng hu taduan blaoh đề thi, tame thung saong niêm phong tani tanat, blaoh pajeng ba trun kapal gilai nduac samar, nao tapa jaik 120km jalan tasik meng TP. Rạch Giá tabiak pulao Phú Quốc brei ka anek saih pakacah. Mbang pakacah tamat THPT thun ini, Kiên Giang hu labaih 15.000 anek saih tame pakacah di 650 bilik dalam 26 labik pakacah. Ta-eng Phú Quốc hu 3 labik pakacah haong 62 bilik pakacah.. 

Urang ngak praong di Ban Cần Thơ birau pasang iek dom tapen ia, labik mblang radaih, labik padeih di dom radaih buyt gam haong đô thị kraong ia. Ini lac dom jalan kraong hu tapen pataok kapal gilai, mblang radaih, labik padeih di dom radaih  pajeng tuai công cộng  jalan kraong dalam ban, anak tal brei buh jien tame ngak piah duh ka bruk cakrok patagok kinh te, đô thị tapen kraong di ban. Tui Sở  Jalan mbak pajeng ba Ban Cần Thơ, quy hoạch ban vaktu 2021-2030, pamaong tal thun 2050 hu Thu tuong mbaok tangin, dalam nan  hu quy hoach  patagok dom radaih pajeng ba tuai damuai  công cộng jalan kraong ia dalam ban; padang ngak dom tapen, mblang, labik padeih taduan raok tuai pambuak  haong dom jalan radaih buyt  jalan kraong ia di dua jalan kraong Hậu saong kraong Cần Thơ.

Pasak pasang iek ruak kik tỉnh Đồng Nai bahrau khan brei thau ka urang njauk ruak đậu mùa khỉ di dalam huyện Trảng Bom. Urang ruak lac lakei, ndih tapui thun 1996, daok di xã Hố Nai 3, tapa dut iek mboh lac dương tính haong vi rút đậu mùa khỉ di harei 23/6. Dahlau di nan, harei 19/6, urang ruak ini tame sang iek ruak Đa khoa Thống Nhất dalam tuk rup pandiak glaong, hu dom baoh ia hu laneh praong 1cm di dua palak takai, tangin, lakuk ka-ing, mbaok saong labik ma-ik. Hu thau, urang ini dahlau daih njaom HIV di puac thun 2021, min klaak taong ruak. Yau nan, meng akaok thun tal ini, tỉnh Đồng Nai hu 4 urang njauk ruak đậu mùa khỉ. 

Harei pataom Ilamo bangsa Cam mbang ka VI hu peih tabiak meng harei 27 -29/9 di ban  Phan Rang - Tháp Chàm, tỉnh Ninh Thuận. Harei pataom  ngan haong kadha “ Khik ramik , patagok ilamo bangsa Cam dalam vaktu yam tame saong patagok  taneh ia”, hu mbaok di 9 tinh, ban nan lac:  Ninh Thuận, Bình Định, Phú Yên, Bình Thuận, An Giang, Tây Ninh, Quảng Nam, Đà Nẵng saong  Ban ray Hồ Chí Minh. Harei pataom hu daong pok meyaom, yaih khan  ilamo meng kan di bhap bini Cam tal ayut sahabat dalam taneh ia saong dunya. Tapa nan, patagok bruk yaih khan thaot binguk Viet Nam hu rilo ilamo siam gheih, jum pataom saong anit ranam gauk di dom bangsa.

Karja Senegal brei ngak dom dut iek halang duah COVID-19 di dom urang halan hatian brei dut iek saong pandar veik bruk cuk pataih pacang mbaok di dom mblang kapal haoh dunya hadei di tuk hu rilo urang Islam di taneh ia ini metai hadei di mbang nao ngak rukun Haji di palei Mecca, Saudi Arabia. Karja taneh ia ini medil lac hu dom menuac matai kayua njauk dom ruak gah jalan suak yava yau COVID-19, oh lac kayua pandiak khang. Dahlau di nan, Saudi Arabia brei thau, 1.301 urang matai dalam tuk ngak rukun Haji thun ini di Mecca.  

Rajaei bang Victoria, Australia brei thau, sa janih anek ruak mamnuk ada  hu jru mek glong njom mbak meng sa var raong manuk ada jaik Melbourne, tui nan, abih tih dom labik raong njom ruak dalam taneh ia ini tagok 10 labik. Ini lac mbang tamuh jit ruak ka 3, yaok janih  pambuak tal sa anek virut karei di gauk, oh hu chung halei lac H5N1 njom ruak tapa dom taphon cim saong athur hu tasau, meda njom tapa anek manuac di dunya. Urak ini labaih 1 trieu 500 ribau drei manuk ada  meda am cuh klak piah pacang virus njom mbak.

Harei pataom Yang Ia harei, sa rija meng kan di urang Inca klak, bahrau hu peih tabiak di ban Cusco dalam negar Peru di harei kabroi (tui mon pak nan). Jaik 500 nghệ sỹ hu mbaok tame ngak dom adat cambat tui meng kan. Peih akaok meng bruk raok dom po yang dalam sap ragu ragam, sap likau ta-a saong dom ragu chat tal pháo đài klak di pasak ban piah ngak adat ieu likau Yang Ia harei brei patuah jamo. Hu meng abap 16, ini hu maong lac sa rija praong di ilamu Inca cổ đại saong patuah lac diuk hu tapa zaman pan akaok di Tây Ban Nha./.