Tui Cục Thủy lợi, Mintri Ngak nong saong patagok palei pala, bilan thu thun ini, ia mbak njaom tame di ĐBSCL meda mbang dalam jang saong trak damak jang duk haong yaok thun. Abih tih dom jalan ia nduac dalam dom bilan thu meng akaok halau kraong Mê kông tuh mai mala ĐBSCL mbuan kurang meng 20% tal 25% dut saong kuhria di yaok thun. Tui kuhria, ia njom mbak meda mai tal aval jang meng bilan 12 saong biak trak jang dalam tukvak di bilan 2 tal bilan 5 thun hadei. Meng urak ini tal bilan 11 bhum ini jeng daok hajan, rahra njauk caga dahlau bruk khik ia taba.

Di dom tỉnh Tiền Giang, Trà Vinh, Đồng Tháp, An Giang, urang nong daok tame bilan paik baoh meriak dalam bui sambai chreih chrai kayua meriak hu rilo baoh saong pablei hu yaom. Tukvak ini, baoh meriak pablei yaom meng 30-35 rabau đồng/kg tui baoh praong, sit, hu yaom jang bilan dahlau 10 rabau đồng sa kg. Meng yaom tani tanat yau urak ini, yaok ha urang nong mek jien tame hu 350 triệu đồng sa thun. Hu tacei pato ilamu pala saong hu pajaih siam nan ye mikva urang pala meriak jeng hu kein laba. Yaok ha meriak paik hu labaih - kurang 25 tấn baoh.

Meng akaok thun tal urak ini, dalam taneh ia hu labaih 87.700 urang njauk ruak, 24 urang metai kayua ruak pandiak tabiak darah. Amuk Lê Hồng Nga - Phó Yam ndok Pasak Pasang iek ruak kik TP.HCM brei thau, meng thun 2018 tal 2022, di Ban raya dom urang ruak pandiak tabiak darah meblah glaong di abih di ban dalam dom ruak njom mbak, lac labaih 48%. Thun dahlau, TP.HCM hu 29 urang metai, glaong abih meng dahlau mai. Dom urang  ruak saong metai kayua ruak pandiak tabiak darah tagok samar lac bruk trak damak abih di gah y tế công cộng pak TP.HCM, abih di nyu nan lac dalam tuk pak ini rah tabiak rilo mbang jit ruak COVID-19 ngan haong dom khat lahik biak trak damak.

Bilan 11 tal, Đồng Tháp peih harei pataom “kapul nyaom Đất Sen hồng – nao gam haong cakrok” mbang ka I thun 2023, tui kuhria lac meng harei 18 - 19/11. Bruk kapul nyaom di Đồng Tháp pataom mbaok hu dom jabat, đơn vị, doanh nghiệp, dom urang ilamu - chuyên gia daok la veik haong rahra piah ndom biai ka ilamu pala, ngak, jalan pablei salih piah ngak habar paglaong siam mekre kaya nong, pabak dom ilamu kỹ thuật saong nao gam haong doanh nghiệp piah ba kaya nong yam atah jang, tame dom darak pasar dunya. Dalam tukvak peih harei pataom, meda hu dom ginum biai saong dom labik parang iek, yaih khan kaya pandap di kapul nyaom, pandap OCOP.

Tukvak jaik di ini di dalam tỉnh Tây Ninh mboh hu bruk bleik saleik bahrau di kol tội phạm pachot pagait meblah mek drap ar meng jalan ngak ja tai khoan di mangaok mạng xã hội di dom urang jakar pan akaok tỉnh. Tapa tai khoan ja, dom urang nan nhắn tin sua nyim masaiy jien piah nao langya bruk chip ngan haong makna lac tài khoản gilang paraik daok khut, haong panuac pagun sanya biyar veik di harei hadei saong pabak laik tài khoản gilang paraik piah ka dom urang njauk pagait payua jien blaoh meblah mek. Công an tỉnh Tây Ninh ndom lac, ini bruk ngak khat lahik drap ar di dom urang njauk pagait, tuk gaok bruk ini njauk samar drah pathau khan saong pambuak haong jabat Công an jaik di abih piah pasang iek saong langyah tui njauk adat.

Tổng thống Philippines Ferdinand Marcos bahrau pasang iek, mbaoh tangin brei tapa pok jien daong yaom 12,7 tỷ peso (samu 224 triệu dola Mỹ) brei ka urang nong ngak padai dalam taneh ia kayua bruk ngak nong daok gaok dom kan kandah. Tui nan, yaok urang nong ngak padai oh ka tal 2 ha hu daong 5.000 peso (lac labaih 2 triệu đồng VN). Tổng thống Philippines ndom lac, bruk daong jien ini meda daong ka urang nong khik tani tanat jien mek tame, anak bruk phun jien ngak padai nyu tagok, jeng yau khik ramik năng suất padai brah anak bruk El Nino.  

Rajaei Thái Lan kuhria mboh dahlau lac meda dui pachreih hu jaik 3 triệu tuai Trung Quốc ngan haong paok jien mek tame lac labaih 140 tỷ baht (jaik 4 tỷ USD) meng danak dak oh thị thực dalam 5 bilan. Taong cuc Du lịch Thái Lan kuhria mboh lac dom tuai negar Trung Quốc mai tal Thái Lan meda tagok meng 4 tal 4 trieu 4 rituh rabau urang dalam thun ini, abih di nyu nan lac ngan haong danak dak thị thực hu ba tabiak di tukvak padeih Adit ameh di Trung Quốc dalam adit ini jang yau dom harei uan salam thun bahrau jaik tal.

Dalam sa pathau khan hu ba tabiak bahrau ini, Viện Tài nguyên Dunya brei thau, Trung Đông saong Bắc Phi lac bhum gaok cuang kandah praong di dunya ka ia taba. Tui nan, hu tal 83% menuac sia dalam bhum taneh ini gaok kan kandah ka halau ia, glaong jang biak rilo duk haong bhum dang ka 2 lac Nam Á ngan haong 74% menuac sia. Bruk kurang ia taba oh lac ngak jhak khang tal prein yava di rahra, bo daok ngak kan kandah tal bruk raong glang, ngak nong, an ninh năng lượng… di rilo taneh ia saong bol bhap rahra./.