Ngak bruk haong urang ngak praong tỉnh Hậu Giang ka bruk ramik caga mbang pakacah tamat THPT thun 2024, Akaok Mentri Pato Megru Nguyễn Kim Sơn kakei Hậu Giang brei khik kajap salamat, siam mekre di taong abih dom bruk di mbang pakacah mbang ini; tuk halei hu jalan pacang caga ka dom bruk oh thau dahlau, dom asar kadha, jalan ngak di mbang pakacah, abih di nyu lac bruk pacang caga bleik saleik dalam bruk pakacah pandar kong nghe glong. Tui nan, caga jalan daong gru pato, anek saih, dalam tuk langik tasik hu hajan ribuk. Hậu giang di Cụm pakacah 64, urak ini hu jaik 7.300 anek saih tut angan pakacah.

Tapa 13 thun peih ngak danak dak Bruk ngak negar padang ngak palei pala bahrau tal urak ini, bhum Đồng Tháp Mười, huyện Tân Phước, tỉnh Tiền Giang hu ngak salah dom asal kadha piah likau Trung ương pasang iek  brei angan lac Huyen palei pala bahrau. Meng bruk pala labaih 15.000 ha manaih chuyen canh saong dom janih baoh kayau karei yau ye thanh long, pa-aok, panat, bei khoai mỡ, padai,… hu daong ka urang ngak nong dak harei dak cak rok patagok. Yaom jien mek tame kuhria tui akaok manuac lac labaih 64 triệu đồng sa urang sa thun. Bruk njauk hatai di rahra ka bruk padang ngak palei pala bahrau mek hu glaong jang duk haong adat.

Rilo bhap bini  di xã Dliê Yang, huyện Ea Hleo, tỉnh Đắk Lắk ngak harak likau tabiak truh angan baoh sang kathaot, brei veik bruk sangka daong di Đảng, Karja  ka dom baoh sang daok kan kandah jang. Tui ong Lê Bá Vũ, Akok  UB bhap bini xã Dliê Yang, kuhria dalam thun 2023, dalam xã hu 8 baoh sang halan hatian likau tabiak truh angan sang kathaot. Dom sang likau tabiak truh kathaot oh lac abih kan kandah, bo dalam akaok sahaneng  di urang caong khin  eng drei kham yam tagok, brei bruk daong ka dom baoh sang kan jang drei.

Meng maong 9 harei 10-6, radaih 3 trục tagok oh hu brei nduac tapa tatua Rạch Miễu gah meng Tiền Giang nao Bến Tre meng maong 9 tal maong 11 saong meng maong 3 bier harei tal maong 7 dayauk; daok gah Bến Tre nao Tiền Giang pakauk nao tapa tatua Rạch Miễu meng maong 3 bier harei tal maong 7 dayauk piah trun manieng bruk gar jalan di labik ini. Min, di pak ini jeng daok rahtabiak bruk gar jalan di labik jaik takai tatua. Kayua yau nan ye, jalan langyah praong piah ngak pasiam veik bruk gar jalan di labik ini lac samar drah yah bilai mek jien BOT tatua Rạch Miễu saong jhul samar bruk padang ngak tatua Rạch Miễu 2 ka nyu samar salah.

Jala pandiak harei 11/6 apui khuah di bhum taneh A dalam Bein pakat negar Tràm Chim. Mboh apui khuah, tỉnh Đồng Tháp ieu pataom labaih 200 urang tame padam apui. Mbiah tal 16 tuk 30 minit, apui khuah hu padam. Dom gah chuc nang pruh ia piah padam abih pui. Tui kuhria mboh di tuk camereip, taneh apui khuah labaih 20ha, dalam nan 60% lac mblang hareik saong 40% glai tràm. Bruk ba tal apui khuah tuk camereip mboh lac kayua hu menuac tame glai suan hukum gam pandar apui ba tal khuah.

Piah pacang caga haong bruk El Nino saong bruk pandiak bhang meda rahtabiak dalam tukvak tabung glaong di bilan thu anak tal, rajaei Indonesia brei parabha gilac Kadung jien kanja. Tui nan, rajaei Indonesia brei ba 7.000 tỷ rupiah jien di kadung jien karja (samu 416 triệu USD), dahlau deih piah padang ngak dom jabat, biyar ka dom mbang nao ngak bruk, dom mbang nyaom biai di rajaei, tapa daong ka urang ngak nong pacang caga haong El Nino saong langik pandiak bhang. Akaok Mintri Ngak nong Indonesia ndom lac, brei langyah dahlau bruk di urang ngak nong dalam 3 bilan tabung glaong bilan thu, meng bilan 8 tal bilan 10 anak tal.

Tui bruk roh duah di Đại học Công nghệ Nanyang tại Singapore, meng thun 1980 -2000, bruk nyom nerak langik tasik hu pambuak tal labaih 135 trieu urang metai aval di dunya. Tui nan, dom urang metai tagok 14%, lac rilo jang labaih 7.000 urang yaok thun kayua dom bruk langik tasik yau El Nino, lưỡng cực Ấn Độ Dương saong di Bắc Đại Tây Dương. Dom bruk langik tasikoh siam ini ngak ka nong ndo di dom asar njom nerak dalam langik tasik tagok glaong, ba tal kan kandah trak damak jang.

Phó Tổng thống Malawi Saulos Chilima haong 9 urang karei metai dalam bala  kapar haok. Bruk ini bahrau hu Tổng thống Malawi brei thau hadei di tuk kapul daong duah urang njauk bala hu duah mboh dom candaih pacah di sruh kapar haok sa harei hadei di tuk lahik kayua langik jhak. Ong Chilima ngak Phó Tổng thống Malawi meng thun 2014 saong lac urang hu rilo menuac takre di taneh ia châu Phi, abih di nyu nan lac rai ranaih.