Di var ngak bruk haong Mban Thuong vu Tỉnh ủy Bình Phước ka bruk peih ngak Sarak Nyaom roya XIII di Đảng, Sarak Nyaom roya XI di Đảng bộ tỉnh  biar harei 10/8, Bí thư Trung ương Đảng, Akok Mban Tuyên giáo Trung ương Nguyễn Trọng Nghĩa kakei lac: Bình Phước patagok bruk ngak kinh te brei tuk halei pambuak bruk daong tani tanat an sinh XH, sangka raidiuk bhap bini, abih di nyu lac bhap bini bhum atah bayah, bhum urang bangsa takik. Langiu di nan, Bình Phước njauk brei ngak siam jang bruk quy hoạch, khik ramik ilamu bhap bini dom bangsa takik; padang ngak, patagok jalan tapen negar sron mbon, hữu nghị piah jhul patagok kinh te - xa hoi, khik kajap an ninh quoc phong.

Tỉnh Sóc Trăng bahrau peih bruk pok meyaom labaih 400 urang naih gheih, hadah krah dalam bhum urang bangsa takik thun 2023. Tukvak tapa, meng dom bruk pakacah gauk anit ranam taneh ia, tỉnh Sóc Trăng mboh hu rilo menuac yau kreih camin dalam bhap bini bangsa takik di abih gah. Kuhria meng thun 2018 tal ini, dom urang hu angan je hu pathau khan, jak ba bhap bini alin brei taneh, daong prein padang ngak, peih praong dom jalan palei, padang dom bruk kein laba ka rahra...haong yaom jien abih labaih 2 tỷ đồng sa thun, jak ba bhap bini gam haong karja peih ngak dom bruk ba mai kein laba ka puk paga, ka rahra haong yaom jien labaih 127 tỷ đồng.

Bộ Tư lệnh Vùng 4 Hải quân pambuak haong Sở Ngak nong sang Patagok palei pala tỉnh Bình Thuận birau peih ngak danak dak “ Hải quân Việt Nam lac labik pambak tame di bhap bini ngak mbang pagam haong tasik” di tapen ikan Phước Hội, ban sit La Gi, tỉnh Bình Thuận. Danak dak piah daong anek di urang ngak mbang di tasik Bình Thuận chap mek ikan hu salamat, khang kajap, njauk hukum. Tapa nan Quan y di Bhum 4 Hải quân peih bruk iek ruak, brei jru oh mek jien ka bhap bini; alin brei 1.000 hala dok Negar saong yaok pluh paok pandap ka dom baoh sang hu raidiuk kan kandah.

Thun ini, dalam tỉnh Cà Mau brei trun pajaih labaih 36.700 ha padai - hadang. Sở Ngak nong saong Patagok palei pala Cà Mau kakei lac, bhap bini brei trun pajaih pala ngak njauk tui harei bilan ba tabiak, pandar padai pajaih hu xác nhận, hu asal cambaih laih piah pala drak. Langiu di nan, njauk pilih ruah pajaih padai cao sản lagaih haong ia mbak ia lakhun di palei, min pabak hu darak pasar dalam saong langiu taneh ia.

Dalam 2 thun tapa, tỉnh Tiền Giang oh hu urang halei ngak suan bruk cap mek ikan suan hukum, oh khan brei thau saong oh hu khik iek (iew lac IUU). Dalam tỉnh urak ini hu 1.286 gilai ikan hu tut angan ngak bruk taong abih gauk. Mbiah tal ini, hu 77% gilai  ikan brei hu pasang iek, 99% gilai hu pagam jam raih tui mong, daok veik tok hu 4 gilai daok pasiam veik. Urak ini Tiền Giang peih ngak siam patui veik  dom bruk ba tabiak di IUU piah Kapol Thanh tra di UB châu Âu  tame pasang iek bruk pacang caga taong chap ikan tui hukum IUU di bilan 10 anak tal.

Thủ tướng Ấn Độ Narendra Modi yam tapa hu bruk buh phiếu bất tín nhiệm di Hạ viện hadei di tuk puac harak ndom lac samar padang veik sron mbon - hòa bình ka bol bhap rahra, abih di nyu lac ka urang kumei daok di bang Manipur. Dahlau di nan, Liên minh Ấn Độ (INDIA) hu 26 đảng đối lập bahrau hu padang tagok, hu pok panuac likeu peih bruk buh phiếu bất tín nhiệm cagar veik Thủ tướng Modi pambuak tal bruk ong “daok kandang” dalam 3 bilan tuk rah tabiak bruk mesruh gauk di bang Đông Bắc Manipur, jaik tapen negar Myanmar, ngak brei  labaih 150 urang metai.

Mentri Jien padai Mỹ khan lac meda brei ka dom kapol nyaom, urang di taneh ia ini hu ngak dom bruk giao dich hanh chinh haong gilang pariak karja di Nga. Bruk ba tabiak yau nan hu ngak tui meng harei mboah tangin 10/8 saong dui atah  tal jala pandiak harei 8/11 anak tal. Bruk giao dich nan hu ba tame pandar ngan haong Kadung jien dau tu negar Nga saong Mentri Jien padai Nga. Dahlau di nan, Mỹ brei pandar dom jalan taong phạt tame Nga tui Sắc lệnh hành pháp 14024.

Ba Lan daok kuhria ba pabak 10.000 lin tal labik taphia negar haong Belarus piah daong ka gah Biên phòng tuk Belarus daok peih dom bruk pasram mesruh jaik tapiah negar. Langiu di nan, Ba Lan jeng daok tagok rilo menuac di cư, mai rilo meng Trung Đông saong châu Phi, kham merat tapa jalan tapen negar piah tame taneh ia ini dalam dom bilan jaik di ini. Meng akaok thun tal ini, hu 19.000 urang yam tapa jalan tapen negar Ba Lan - Belarus, tagok biak rilo duk haong 16.000 urang di thun blaoh./.