Dah page ini (29/6), di mblang kapar haok Tân Sơn Nhất, 63 urang lin di Sang iek ruak dã chiến pakat 2 saong pakat 5, haong urang lin công binh ka 2 hu tagok jalan nao ngak bruk khik iek saron mbon di Liên Hiệp Quốc di phái bộ Nam Sudan. Dalam 63urang lin nao Nam Sudan mbang ini hu 10 urang kumei lac bác sĩ, điều dưỡng, urang ngak gah kỹ thuật. Abih tih hu caga ginup dom ilamo, prein yava ka mbang nao ngak bruk biak glaih glar, kan kandah ini. Di tuk peih bruk palao tagok jalan, akaok negar Võ Văn Thưởng hu sua rivang prein yava, hatai caga dahlau di tuk tagok jalan nao ngak bruk di dom urang jakar, gam tui di nan jeng pok mayaom kapul khik iek saron mbon di taneh ia Việt Nam dalam tukvak tapa, tuk halei jeng paglaong hatai ngak bruk, ilamo saong prein yava di drei dalam tuk dunya daok rahtabiak sarau kadau, kan thau dahlau.

Hadei di 2 harei pakacah, biar harei ini, labaih 1 triệu anek saih dalam taneh ia hu ngak salah bruk pakacah tamat trung học phổ thông thun 2023. Tui Mintri Pato Megru, mbang pakacah ini rah tabiak dalam siam mekre, salamat, njauk adat pakacah. Ndom ka đề thi, tui taong yaom tuk camereip di anek saih, gru pato saong di dom amaik ame anek saih, asal kadha pakacah daok dalam danak dak THPT, mbiah haong prein di anek saih, hu ngak siam, lagaih. Bruk pakacah hu khan brei thau di mon 8 harei 18/7. Jaik 100 sang bac đại học iek tui bruk pakacah ini piah pilih ruah.

Dah page ini (29/6), tỉnh Bình Dương hu peih bruk padang ngak danak dak camriep di Danak dak jalan Vành đai 3 Ban raya Hồ Chí Minh labik nao tapa  tỉnh Bình Dương. Danak dak camriep di danak dak jalan Vành đai 3 Ban raya Hồ Chí Minh labik nao tapa tỉnh Bình Dương lac tanut canah Bình Chuẩn atah 1,3 km, dalam nan hu gam binah jalan nduac samar, tatua hầm chui... Ini lac tanut jalan mbak hu makna praong, hu rilo radaih tải, radaih container nao mai. Tui kuhria, gah nao tapa tỉnh Bình Dương meda hu ngak salah di thun 2025 saong ba tame nduac meng di thun 2026.

Tui Sở LĐTBXH TP.HCM, meng akaok thun tal ini, hu 23 doanh nghiệp khan lac brei ka urang ngak padeih bruk abih tih lac labaih 1.130 urang. Min  TP.HCM hu ba bruk ngak brei ka labaih 163.000 urang saong jaik 73.000 bruk ngak bahrau. Taong yaom di Sở LĐTBXH ban raya brei mboh, darak pasar urang ngak mboh lac daok siam veik, min tukvak anak tal jeng daok hu rilo cuang kandah tuki dom menuac lahik bruk saong mbang jien daong lahik bruk tagok rilo.

Ủy ban Pasang iek Tỉnh ủy Đồng Nai bahrau brei tapa bruk taong yaom bruk ngak di drei, pasang iek panuac ieu kakei peih ngak tui hukum ngan haong ong Nguyễn Tuấn Anh, akaok Kapul urang nong tỉnh. Tukvak daok ngak Akaok Jabat Quy hoạch, Sở Tài nguyên saong Môi trường tỉnh Đồng Nai, ong Nguyễn Tuấn Anh hu dom bruk ngak jhak, ngak suan pambuak tal jalan peih ngak Danak dak labik rahra pablei salih di Phước Thái (TP. Biên Hoà). Ủy ban Pasang iek Tỉnh ủy Đồng Nai ieu kakei Ban Thường vụ Tỉnh ủy, Ban Chấp hành Đảng bộ tỉnh pasang iek, langyah njauk  hukum tui thẩm quyền ngan haong ong Nguyễn Tuấn Anh.

Dalam mbang nyaom ka 53 di Hội đồng Nhân quyền Liên Hợp quốc harei 28/6, urang Lambaok Trung Quốc di Jabat Liên Hợp quốc daok di Geneva haong dom kapul nyaom dunya karei karei daok di Thụy Sĩ hu brei thau cambaih jalan ngak di Trung Quốc ka bruk jum pataom dunya. Urang lambaok di Trung Quốc brei thau, Trung Quốc tuk halei jeng tui jalan buh prein khik caga bruk jum pataom dunya, pachreih padang sa thar vak haong gauk ka menuac sia dunya saong ba gauk padang sa dunya siam mekre jang. Gam haong nan, hu ndom rilo tal bruk jhul patagok khang kadang bruk quyền anek menuac dunya, lac njauk jum pataom gauk, oh njauk lac neh rabha gauk saong pambuak gauk salih ka cagar gauk, jum pataom dunya lac quyền saong daok lac nghĩa vụ.

Hàn Quốc daok tame bruk pablei tabiak negar langiu ralaow limo siam abih, mek hu tanut chuan Halal pablei tapa Malaysia. Ini lac mbang camriep abih dalam sajarah, Hàn Quốc hu pablei ralaow limo halal di urang Islam tapa Malaysia. Hàn Quốc sanya lac meda khik ramik biak catang abih tih dom adat meng bruk pajeng ba tal bruk khik piah saong paraba, dak harei dak hu ba tame darak pasa ralaow tui tanut chuan Halal dunya. Urak ini Hàn Quốc daok pablei ralaow tapa 4 taneh ia saong bhum taneh, dalam nan hu Malaysia, Campuchia, Hong Kong saong Macao

Harei ini, menuac sia Indonesia yam tame harei padeih ka 2 dalam mbang padeih dui atah 5 harei. Meng bruk brei dui atah mbang padeih roya Eid Al Adha rilo jang 3 harei, Tổng thống Indonesia caong khin lac meda jhuk patagok kinh tế saong du lịch piah pacang bruk mbuan laik tame suy thoái. Lac sa adlam dom taneh ia hu bruk kinh tế tagok samar abih dalam bhum, Indonesia urak ini jeng daok dang anak dom bruk pambuak tal yaom kaom tagok glaong saong darak pasar urang ngak daok dang veik.