Kapol pakacah taneh ia Viet Nam hu 4 anek saih saong abih 4 adei thei jeng mek hu Huy chương Ameh

Biar harei kabroi 18/7, Olympic Hóa học dunya thun 2022 peih bruk pataom iek veik saong alin giải di Trung Quốc tui jalan online. Kapol pakacah taneh ia Viet Nam hu 4 anek saih saong abih 4 adei thei jeng mek hu Huy chương Ameh, lac: Nguyễn Việt Phong, anrek saih tal 12, Sang bac Trung học phổ thông chuyên Lê Hồng Phong, Ban raya Hồ Chí Minh; Trần Đức Minh, anek saih tal 12, Sang bac Trung học phổ thông chuyên Biên Hòa, tỉnh Hà Nam; Phan Xuân Hành, anek saih tal 12, Sang bac Trung học phổ thông chuyên Hà Tĩnh saong Phạm Nguyễn Minh Tuấn, anek saih tal 11, Sang bac Trung học phổ thông chuyên Khoa học Tự nhiên, Sang bac Đại học Khoa học Tự nhiên, Đại học Negar Hà Nội. Olympic Hóa học dunya thun 2022 hu mbaok labaih 326 anek saih mai meng 84 taneh ia saong bhum taneh ia. Ngan haong 04 Huy chương Ameh, kapol pakacah pakat negar Viet Nam hu ngak brei urang caik hatai tal, hu Mban peih bruk taong yaom biak glong.

6 bilan akaok thun, Sang mac Nhiệt điện Vĩnh Tân 4 pabak điện tapa jiak 40 triệu kWh; 6 bilan dok veik sang mac meda pabak labaih 2.614 triệu kWh , piah mek hu 100% bruk pabak điện di Tập đoàn Điện lực Việt Nam jao dalam thun ni, lac labaih 5.058 triệu kWh. Piah mek hu bruk ni, Sang mac Nhiệt điện Vĩnh Tân 4 peih bruk salih số dom gah dalam khik ramik, pandar siam lagaih dom pandap panda, phần mềm ba tame pandar paglong năng suất ka urang ngak. Urang ngak oh padeih patagok ilamu kỹ thuật piah ba mai năng suất, kein laba glong jang.

Mon 5 meteh harei 18/7, di Công ty TNHH MIWON Việt Nam, daok di phường Thọ Sơn, ban Việt Trì, tỉnh Phú Thọ, rah tabiak bruk mblung khí ngak brei 4 urang metai, sa urang daok cấp cứu di Sang iek ruak Đa khoa tỉnh Phú Thọ urak ini preih yawa hu yam tapa tukvak kan kandah. Tui panuac khan oh ka ginup abih, C.ty TNHH MIWON Việt Nam pah sa đơn vị alam moi truong di Hà Nội mai ngak hacih lubang gas vi sinh di Công ty. Dalam tuk ngak hacih, dua urang ngak kong di công ty moi truong nan njauk mblung khí. Pang mehit sap prew iew ala lubang gas, 3 urang ngak di lò hơi di Công ty TNHH MIWON Việt Nam daok ngak bruk jaik nan mai padau trun daong. Min taong abih 5 urang jeng njauk mblung khí, var drei jan. Klau urang metai dahlau di tuk ba tame sang iek ruak, sa urang metai di sang iek ruak.

Hadei di sa tukvak kandang joa bruk rong hàu meng giá thể lốp xe, ye urak ni dom boh sang rong hàu di xã Long Sơn, ban Vũng Tàu, tỉnh Bà Rịa-Vũng Tàu daok rong veik . Bruk rong hàu meng giá thể lốp xe mbuan ba tal nerak tathuak labik rong.Tui yaok pataom di Chi cục Kaya ikan tỉnh, urak ni, dalam xã hu labaih 1.000 boh sang rong hàu, rilo meng lac dom boh sang rong pajaih hàu patau jeng ngak tui jalan rong ni song blah tuah fibro xi măng ngak giá thể rong piah ka hàu gam tame.

Pambak tal mạng xã hội ba sa thaot binguk sa urang nao kapal haok daok pan to laok baoh kayau di kapal haok, tui khaw tin di harak mbao, bruk nan rah tabiak di kapal haok VN208 par meng Ban raya Hồ Chí Minh nao Nội Bài mong 7h58 page harei 18/7. Urang ba tuai nao kapal haok mek ngak văn bản chip bruk nan saong mek to. Tui bruk ba tabiak urak ini, to lam, to riac ba-ar, dom janih to hu dalah oh kuhria gai pan atah labaih 6cm tau kuhria gam gai to saong dahlah labaih 10 cm oh brei ba tame labik pakauk, labik tuai daok dalam kapal haok.

Negar Prang harei 18/07 rah tapa mbang pandiak glong abih, tuk nhiệt độ di rilo labik yam tapa 40 độ, gam song nan dom mbang khuah glai di gah Tây Nam daok pambak prong, khuah labaih 17 ribau héc-ta glai song ngak brei 32 ribau urang samar panduan nao labik karei . Dalam harei ni (19/07), pandiak khang daok rah tabiak di Prang, min salih tapa dom tỉnh gah Timun. Taeng di ban ine Paris, nhiệt độ glong di abih meda tagok tal 41 độ C.  

Tui Pasak Pasang iek saong Pacang caga jit ruak Mỹ, hu labaih 1.800 urang ruak đậu mùa khỉ dalam taneh ia ini.         Nhà Trắng sanya brei parabha jaik 300 ribau mbang vaccine dalam taneh ia Mỹ dalam dom adit tal saong 1,6 trieu mbang jru dalam dom biklan anak tal.

Urak ni, dok hu rilo suh sah ka bruk Triều Tiên dok kuhria caga cuh iek hạt nhân, mbang camereip kuhria meng di thun 2017. Brei panuac song gah harak mbao di mangaok jalan tal Hàn Quốc, Akaok mintri jien padai Mỹ Janet Yellen ndom lac, bruk Triều Tiên cuh iek hạt nhân hu mong lac sa bruk khiêu khích saong Mỹ meda hu dom jalan tong phạt bahrau negar ni. Tui muk Yellen, dom jalan tong phạt, piah kateik greik Triều Tiên klak danak dak hạt nhân di drei song meda hu ginum biaidalam mbang taom gaok di muk song dom urang pal akaok Hàn Quốc dalam harei ni ./.

Urang lang: Bhumi & Hani Pha – 19/07