Akaok negar jeng hu tacei tabiak bruk mbuan kadun likuk veik

Bier harei 2/8, akaok negar Nguyễn Xuân Phúc hu mbang ngak bruk haong urang par akaok tỉnh Đồng Nai. Tui pathau khan di Tỉnh ủy Đồng Nai, tukvak tapa, bruk peih ngak dom Sarak di Đảng hu siam abih gah, dalam nan kinh tế lac sa bruk hadah di abih, abih di nyu nan lac gah ngak kong. Tỉnh hu 1.500 danak dak hu jien buh tame meng gah negar langiu daok hu tukvak ngak saong labaih 47 ribau doanh nghiệp daok ngak bruk. Kayua yau ye, bruk kinh tế tỉnh dang ka 4 dalam taneh ia saong daok lac 1 dalam 6 tỉnh rik tame kadung jien karja praong abih ka kadung jien Trung ương; jien mek tame tui kuhrua yaok urang di thun dahlau hu 118 triệu đồng. Labaih mateh akaok thun ini, kinh tế tỉnh tagok labaih 7%... Taong yaom glaong bruk ngak hu makna praong di tỉnh ngan haong Bhum kinh tế praong di gah maraong saong dalam taneh ia, Akaok negar jeng hu tacei tabiak bruk mbuan kadun likuk veik. Kayua yau nan ye, Đồng Nai njauk salih biak khang dalam akaok saneng saong bruk ngak, njauk jeng sa bruk cak rok patagok ka dom tinh, ban jaik taphia.

Harei 2/8, Đại tướng Tô Lâm – Akaok mintri Công an tabiak harak brei tagok quân hàm ngan song 3 urang jakar, urang lin cảnh sát var klak rup drei, metai lahik tuk pacang khuah pandam khuah di quán karaoke di Hà Nội. Tui nan, meng Trung tá brei tagok Thượng tá ka ong Đặng Anh Quân, Akaok kapul; meng Trung uý brei tagok Thượng úy ka ong Đỗ Đức Việt song meng Binh nhì tagok Hạ sỹ ka ong Nguyễn Đình Phúc, urang lin nghĩa vụ. Jeng dalam harei nan, Akaok negar Nguyễn Xuân Phúc, Thủ tướng Phạm Minh Chính hu payua panuac klah rabha pandik harao tal gah CAND song boh sang di 3 urang jakar urang lin var klak rup drei ndih trun dalam tuk ngak bruk.

Daok sa harei tra, Danak dak Harei pataom papar sap pakat negar mbang ka XV hu peih tabiak min bruk daok biak chreih chrai, meda ba mai sa harei pataom biak siam makre di TP.HCM. Dalam 3 harei camriep peih bruk chấm pacacah papar sap online (meng bier harei 1/8 tal harei ini), dom danak dak hu ba mai biak rilo chrieh chrai ka ban giám khảo saong dom urang ngak dalam gah papar sap. Kapul halain hatain, kapul dam dara di Rayo sap ndem bhap bini TP.HCM jeng hu pataom tame biak rilo, achreih ba kapul di drei bo daok pachreih ba ka dom kapul saabat.

Yaom mek jien angaok jalan nduac samar Trung Lương - Mỹ Thuận bahrau hu UBND tỉnh Tiền Giang ba tabiak trun 5.000-97.300 đồng dut song jalan ngak klak. Ong Lý Hoàng Chiêu, Chánh văn phòng UBND tỉnh Tiền Giang brei thau, tui kuhria jalan nduac samar mek jien di harei 5/8. Min, urak ni, po đầu tư oh ka njauk hatai ka jalan ngak ni di tỉnh, yau nan ye 2 gah brei ginum biai veik .

Kapul urang kumei tỉnh Bình Dương peih danak dak “Nao gam haong urang kumei bhum tapen negar” tukvak 2021-2025 di xã Quảng Trực (huyện Tuy Đức, tỉnh Đắk Nông) dalam 2 harei 31/7 saong 1/8. Di danak dak, Kapul urang kumei tỉnh Bình Dương pambuak haong dom urang ngak pahla, kapul daong brei hu jao alin rilo paok pandap, peih bruk taong ruak saong brei jru oh mek jien, nao rivang dom sang uranaih matui di dalam xã Quảng Trực ngan haong abih tih jaik 400 triệu đồng.

Hadei di Đức song Tây Ban Nha, harei kabroi, Đại sứ quán Cộng hòa Séc di Hà Nội brei thau bruk padeih pandar mẫu passport bahrau di Việt Nam, makna kayua passport bahrau oh pabak dom tanut ky thuật di ICAO. Hu thau, angaok passport bahrau di Việt Nam, bruk brei thau ka labik ndih tapui hu kandauk meng mã số định danh ngan song 12 chữ số dok ngak kan kandah ka bruk pasang iek di dom taneh ia labik bhap bini Việt Nam khin tame. Yau nan, kuhria tal harei 2/8, hu 3 taneh ia dalam 26 taneh ia dalam nyaom Schengen brei thau oh taduan passport bahrau di Việt Nam.

Mỹ harei 02/08 brei thau oh salih sarak haong Đài Loan (Trung Quốc) dalam tuk Akaok Hạ viện Nancy Pelosi haong kapul dom nghị sỹ Mỹ urak ini daok hu mbang rivang di pak ini. Piah brei mboh bruk oh njauk hatai biak khang anak bruk nao rivang di Akaok Hạ viện Mỹ tal Đài Loan, Trung Quốc hu samar ieu Urang lambaok negar Mỹ di Trung Quốc dalam melam 2/8. Amuk Pelosi lac urang ngak praong pakat glaong abih di Mỹ rivang Đài Loan kuhria dalam 25 thun tapa.

Meng harei 1/8, Zalo kuhria pok thuê bao di urang pandar, gam song nan, cakak trun dom tính năng di bruk miễn phí. Piah meda pandar hu yau dahlau deih, urang pandar brei salih tapa pok Zalo OA. Ni lac, pok dịch vụ urang pandar brei bayar jien. Dom janih tài khoản Zalo bayar jien hu mong lac hu 4 pok pandar meng cơ bản (brei saoh), pandar iek (10.000 đồng), paglong (59.000 đồng) song Premium (399.000 đồng) ka yaok bilan. Tong abih kuhria mangaok chu kỳ sa bilan pandar. Tài khoản , tuk blei thuê bao bilan hu pacadu brei dom tính năng, klak menieng ka mbang hiển thị dalam bruk duah thau, dong danh bạ, phản hồi chat.../.

 Urang lang: Hani Pha & Thu Thao – 03/08