Phaok thu tuong hu panuac ndom pak di quoc hoi 

Harei ini 10/6, QH ginum biai ka bruk buh jien tame ngak 5 Danak dak nan lac: jalan Vành đai 4 bhum Ban ine Hà Nội; jalan Vành đai 3 Ban raya HCM; danak dak padang ngak jalan peih radaih drah samar  Châu Đốc - Cần Thơ - Sóc Trăng; Khánh Hòa - Buôn Ma Thuột; Biên Hòa - Vũng Tàu. Ini lac dom danak dak ngak tui Sarak Nyaom roya 13 di Đảng saong Sarak 31 di QH ka bruk rami ramik veik bruk ngak kinh te dalam 20 thun, padang ngak jalan mbak saong patagok bruk pambuak dom bhum.

Bier harei 9/6, javap jalei anak Quốc hội ka bruk bac môn lịch sử dalam sang bac phổ thông, Phaok Thủ tướng Phạm Bình Minh ndom lac: oh hu bruk palang lahik môn lịch sử. Môn lịch sử hu parabha tui  2 tuk vak, jeng daok hu môn bac ni di pakat  phổ thông.Rajaei hu tacei pato Mintri pato megru caik hatai  tui pang panuac di dom urang Quốc hội, cử tri, Kapul ilamu sajarah Việt Nam pambuak tal danak dak pato pakai môn lịch sử di THPT, peih bruk ginum biai song dom jabat, chuyên gia,urang ilamu…piah ginum biai ka nyu tantu cambaih laih,tong yaom abih gah, piah tabiak jalan ngak ka nyu lagaih, khik ka bruk bac môn lịch sử , abih di nyu nan lac  sajarah bangsa  hu tagok song iek prong .

Tapa pasang iek kadung jien dunya thun 2021, iew katut panak lac OBS-2021, birau hu Gah Pambuak kadung jien dunya brei thau, kadung jien di Viet Nam daok hu siam jang dut saong dom mbang taong yaom dahlau. Angan OBS-2021 di Viet Nam hu labik dang dhi 68 dalam 120 taneh ia hu taong yaom, tagok 9 pakat dut saong thun 2019 saong tagok 23 pakat dut saong thun 2017. Angan kadung jien Viet Nam tagok 9 pakat dut saong mbang pasang iek dahlau, dang dhi 68 dalam 120 taneh ia hu taong yaom. Tapa nan brei mboh bruk kham merat di Viet Nam dalam bruk patagok cambaic laic kadung jien negar. 

Muk Lê Hồng Nga, Phaok Yam Ndok pasak pasang iek  ruak kik ban raya  HCM (HCDC) brei thau, urak ni, bruk klauk vaccine mbang 3 di TP.HCM bahrau hu labaih  60%. Dalam tuk nan, bruk kllauk mbang ka 4 biak suai. Tui  muk  Nga, mintri  Y tế hu tacei pato dom tỉnh ban kham merat klauk  vaccine mbang 3, mbang 4 ka bhap bini song TP.HCM dok peih ngak. Bruk ni, hu makna biak prong kayua tapa mbang klauk ini nyu pasiam veik bruk miễn dịch , kayua dom mbang klauk dahlau nyu meda trun prein pacang ruak. Dalam tuk dom taneh ia jeng daok hu dom biến chủng bahrau, jit jeng dok srau kadau, yaom lac, Việt Nam pasang iek hu jit, min jhui iek lap ..

Yaom lac birau hu 1 urang ruak whitmore dalam tỉnh, min meng kan kandah trak damak di ruak, saong tuk ini Dak Lak lac bilan hanjan, lagaih ka ruak njom mbak, gah y te Dak Lak samar ba tangin tame bruk piah pasang iek ruak, caga blaoh manuac ngak bruk jeng yau pandap panda piah pacang ruak. Gam pambuak bruk haong karja palei, dom kapol ngak bruk daong xa hoi pathau khan ka bhap bini, piah paglong jalan saneng brei pacang caga ruak ini. Dahlau di nan, di xã Ia Lốp, huyện Ea Súp, lac labik hu urang tuak whitmore, Pasak Pasang iek jit ruak tỉnh pambuak saong y tế  xã gam haong karja  brei urang pruh jru pametai anek ruak vin val pandap padang ia, dom labik jaman, labik di daok di 20 baoh sang bhap bini vin taom dar sang daok di urang ruak.

Tui Tổng Yam ndok gah  Y tế dunya  (WHO) Tedros Adhanom Ghebreyesus, janih virus Sars-Cov-2 bahrau, kan kandah jang bo dom  vaccine, urak ni oh pacang hu lac bruk hu biak. Ong brei thau  WHO dok duh hatai ka bruk urang metai daok tagok di dom bhum yau châu Phi song  Tây Thái Bình Dương. Dok biak avar piah ndom lac jit prong tamat blaoh, song biak kan piah mboh lac virus meda tamuh tabiak yau habar.

Karja Tổng thống Joe Biden urak ini daok caga peih bruk brei klauk jru vaccine pacang Covid-19 ka uranaih ala 5 thun meyah hu dom jabat khik iek mbaoh tangin. Dom ủy ban tacei pato di Jabat Khik iek Pandap mbang saong Jru tavao saong Pasak Pasang iek saong Pacang caga jit ruak Mỹ brei pasang iek dữ liệu ka vaccine ka uranaih umo 5 thun di Pfizer saong Moderna saong tui kuhria meda ba tabiak panuac puac abih di harei 20/06. Meyah hu mbaoh tangin, dom bruk klauk jru pacang caga  brei peih ngak sa harei hadei di nan. Urak ini, umo meng 6 bilan tal 5 thun lac nyaom umo daok veik oh ka hu  klauk jru pacang caga Covid-19 di Mỹ./.

Urang lang: Ái Nghiêm - Hanipha- 10/6