Kapul Doanh nhân ranaih umo Việt Nam hu peih bruk jao giải thưởng Sao vàng đất Việt 2021

Bier harei ini (30/3), Nyaom roya kapul doanh nhân ranaih umo Việt Nam mbang ka 7, tukvak 2022-2025 hu peih tabiak di Hà Nội. Hu mbaok tame mbang Nyaom roya meda hu 800 doanh nhân ranaih umo hu angan je lambaok ka 11 ribau doanh nhân, dom urang dalam kapul di dalam taneh ia. bruk bahrau di tukvak tal lac brei ka rai ranaih par akaok kapul. Dom bruk ngak pamaong tal rai ranaih saong duah jalan ngak bahrau, mbiek drei tame dunya; pambuak gam haong dom tinh, ban peih praong viek kalup kapul peih bruk padang mbang ngui hadah krah. Dalam dom bruk di Nyaom roya, melam ini (30/3), Kapul Doanh nhân ranaih umo Việt Nam hu peih bruk jao giải thưởng Sao vàng đất Việt 2021, pok manyaom Top 10, Top 100 saong Top 200 – Pandap panda angan je di Việt Nam.

Melam 29/3, tại xã Ka Đơn, huyện Đơn Dương (t.Lâm Đồng) hu rah tabiak bruk peih mbaok harei pataom Ilamu, Thể thao bhum bhap bini bangsa takik tỉnh Lâm Đồng mbang ka 5 thun 2022. Ngan saong kadha "Âm vang cao nguyên", Harei pataom Ilamu, Thể thao bhum bhap bini bangsa takik tỉnh Lâm Đồng mbang ka 5 thun 2022 dui pachreih hu 300 nghệ nhân meng 12 huyện, ban sit dalam tỉnh mai pataom mbaok. Dalam 2 harei rah tabiak, hu rilo bruk ngak piah pathau khan bruk khik ramik, patagok yaom glaong inem krung ilamu cồng chiêng Tây nguyên; pakacah gauk peih ngak jayah Sarak Nyaom roya pakat negar mbang ka XIII di Đảng.

Tal akaok bilan 2-2022, TPHCM hu labaih 2.200 ranaih matui kayua jit ruak Covid-19, dalam nan 39 adei lahik amaik, ame, 78 adei lahik urang raong saong labaih 2.000 adei lahik ame, atau lahik amaik. Thun 2021, taphia di bruk padang ngak sarak sangka iek glang di Trung ương, TPHCM kham merat iek glang ranaih matui, ranaih njauk kan kandah di jit ruak Covid-19. Taong abih yaom jien meng xã hội hóa iek glang ka nyaom ranaih ini saong ranaih daok dalam labik bảo trợ xã hội, dom quận huyện hu rilo urang ngak nhập cư lac labaih 17 tỷ 3 rituh trieu đồng. Yau nan, yaok adei hu taduan tui kuhria meng 5-6 triệu đồng, daok dom ranaih matui gam amaik, ame hu daong meng 8-9 triệu đồng. Langiu di nan, rilo kapul, manuac urang sanya lac dang ka dom ranaih tal umo 18 thun. Dom kapul, kalup di TPHCM saong dom pakat quận jeng hu caga rami ramik kadung jien kanja, jak ba dom urang ngak pahla daong tame piah nao rivang, jak ba, pachreih saong sangka ka dom adei.

Tiến sĩ Bùi Lê Minh, urang dang akaok gah Công nghệ Sinh học, Viện Ilamu Công nghệ glaong, ĐH Nguyễn Tất Thành (TP.HCM) brei thau, meng puac thun 2021 tal urak ini, rilo urang njaom nCoV njauk aih craoh, pandik tung, taglaoh ta-ok,... Ini oh lac triệu chứng bahrau, jeng hu mboh di dom urang ruak njaom dom biến thể dahlau di SARS-CoV-2. Dalam tukvak urak ini, meyah mboh hu dom kadha di Covid-19, ye meda lac urang nan njaom Omicron. Min urang ruak jhui duh hatai rilo, kayua dom triệu chứng ini oh dui atah lavik harei, saong oh cang menyum jru.

Dalam labaih 1 bilan tapa, dom mbang hajan oh njauk bilan ngak khat lahik labaih 580 tấn sara di dom mblang ngak sara ka oh hu kuac mek di huyện Đông Hải, lac labik ngak sara praong di abih dalam tỉnh Bạc Liêu, dalam nan hu xã Điền Hải njauk khat lahik rilo di abih. Langiu di kan kandah kayua hajan oh njauk bilan, urang ngak sara di Bạc Liêu daok gaok kan kandah kayua dom sara di vụ dahlau daok kadaong labaih 3.000 tấn saong yaom sara urak ini daok di tanut bier di abih, meng 800-1000 đồng/kg, dalam tuk nan yaom xăng manyek haong dom yaom jien karei jeng tagok glaong.

Karja Thượng Hải (Trung Quốc) brei pacang veik 26 triệu rahra meng harei 27/3 hadei di tuk dut iek rilo menuac brei mboh sruh jit COVID-19 di ban ini lac praong. Yaom lac dom pabah lamnge di Thượng Hải saong mblang kapal haoh Phố Đông daok brei peih pabah mbang dalam tuk ban daok pacang veik, min dom urang peih radaih vil val Thượng Hải daok gaok kan kandah, oh nao mai hu piah pajeng pandap dalam ban. Bruk pajeng ba pandap nao saong mai meng dom pabah lamnge di ban Thượng Hải jeng yau nao mblang kapal haoh pakat dunya Phố Đông meda lac dang kandang.

Gilang pariak kanja Anh daok ba tabiak panuac kakei bhap bini di taneh ia ini salih dom blah jien ba-ar yaom 20 bảng, 50 bảng piah mek jien polymer bahrau. Tui adat, meng bilan 10, dom cửa hàng saong doanh nghiệp meda oh hu adat brei pablei salih meng jien ba-ar klak, yaom lac tuai jeng meda hu payua jien ba-ar tame tài khoản gilang pariak di drei. Gilang pariak kanja Anh brei thau, dom blah jien bahrau ngak meng polymer khang kajap jang saong kan piah ngak ja jang.

Danak dak padai brah pandap mbang dunya daok daong ka 138 triệu menuac eik lipa di labaih 80 taneh ia, dalam nan hu Êtiopia, Apganixtan, Nam Suđăng, Yemen, Nigeria, Xyri.... Min bruk taong gauk di Ucraina patuh tabiak ngak brei yaom jien blei padai brah pandap mbang tagok glaong saong tui kuhria di Gah Nông lương FAO, 13 triệu menuac di dunya meda laik tame bruk kurang pandap mbang menyum./.

Urang lang: Thu Thao – M. Phuong – 30/03