Bier harei kabroi (23/8), UBND TP.HCM hu harak payua tagok Thủ tướng Rajaei ka danak dak roh duah padang ngak Pabah lamnge pajeng ba Cần Giờ.  Tui harak, labik padang ngak pabah lamnge di xã Thạnh An, huyện Cần Giờ. Danak dak praong 7km tatua cảng saong 2km labik sà lan ngan haong taneh praong labaih 571ha. Pabah lamnge pajeng ba dunya Cần Giờ meda taduan hu gilai container praong abih di dunya urak ini lac 24.000 TEU, gilai pajeng ba trak meng 10.000 - 65.000 tấn. Abih tih phun jien buh tame tui kuhria jaik 129.000 tỷ đồng.

Sang bac Đại học Y dược TP.HCM bahrau brei thau điểm chuẩn hu pilih ruah tame bac iek tui điểm pakacah tamat THPT pambuak saong  chứng chỉ sap Anh dunya gam haong pakacah tốt nghiệp. Tui nan, điểm chuẩn glaong abih jeng daok lac gah Y đa khoa haong 27,34. Điểm chuẩn glaong ka 2 lac gah Răng- Hàm- Mặt haong điểm pilih ruah lac 26,96.  Điểm chuẩn dom gah di sang bac ini tui jalan pilih ruah điểm pakacah tốt nghiệp meng 19- 27,34 điểm, trun hasit duk haong thun blaoh. Dahlau di nan, Đại học Y khoa Phạm Ngọc Thạch jeng brei thau điểm chuẩn, gah Y khoa mek điểm chuẩn glaong abih lac 26,31.

Danak dak jalan nduac samar Biên Hòa - Vũng Tàu hu padang ngak meng bilan 6 meng blaoh, min bruk peih ngak biak suai damuai. Mbaok taneh di tỉnh Đồng Nai hu jao 6%, dalam tuk phun jien peih mbaok taneh tagok tapa yaom phun jien buh tame. Tui Mintri jalan mbak pajeng ba, meng bruk peih ngak biak suai damuai yau urak ini, danak dak tui kuhria lac oh ngak salah hu di puac thun 2025, ba tame nduac abih tih danak dak meng thun 2026 tui panuac pato tacei di Quốc hội, Rajaei. Tal urak ini, Đồng Nai bahrau jao hu labaih 6% mbaok taneh ka danak dak thành phần 2. Daok danak dak thành phần 1 ka oh hu jao mbaok taneh.

Tapa 3 thun peih bruk jak ba “Urang Việt Nam dahlau di abih brei pandar pandap Việt Nam”, tỉnh Bạc Liêu peih ngak hu 7 mang darak saong 23 mbang nyaom darak pasar ba “Pandap Việt mai palei pala”. Labaih 3.150 mbang doanh nghiệp dalam saong langiu tỉnh hu mbaok tame parang iek saong yaih khan pandap panda, dui pachreih hu labaih 122 mbang urang mai maong iek, blei pandap, jien mek tame hu meng pablei pandap lac labaih 100 tỷ đồng. Bruk jak ba hu daong palagaih ka dom labik ngak pandap hu jalan yaih khan pandap, yaih khan angan pandap, hu urang blei thau tal, abih di nyu lac urang blei daok di palei pala, bhum atah bayah.

Sở Ngak nong saong patagok palei pala tỉnh Bình Thuận brei thau, piah ngak salah dom harak gar peih ngak danak dak danao Ka Pét, tal urak ini, Sở haong jabat chuyên môn hu ngak salah bruk pasang iek, taong yaom gilac veik bruk glai saong payua tagok UBND tỉnh pasang iek. Danao Ka Pét di xã Mỹ Thạnh, huyện Hàm Thuận Nam, tỉnh Bình Thuận praong jaik 700ha, abih tih phun jien buh tame labaih  874 tỷ đồng, padang hu labaih 51 triệu m³ ia, tui kuhria hu peih ngak di thun 2024, ngak salah di thun 2025. Piah peih ngak danak dak, labaih 619ha glai di bhum ini meda hu peih ngak. Salih tame nan lac, bhum palei meda pala gilac veik labaih 1.800ha glai di dom labik karei dalam tỉnh.

Harei ini (24/8),  Nhật Bản brei tathuak ia njaom xạ hạt nhân hu langyah blaoh tabiak tasik. Hadei di tuk Nhật Bản brei thau ka bruk tahuak ia ini, Hải quan Ma Cao, Trung Quốc khan lac brei patagok pasang iek hải quan saong ngak catang bruk pakauk blei tame pandap mbang meng 10 quận di Nhật Bản. Karja Ma Cao ndom lac piah khik kajap salamat pandap mbang saong prein yava di rahra, Ma Cao pakauk blei tame dom janih pandap mbang daok that, pandap mbang hu asal meng athur, sara tasik saong rong biển meng 10 quận di Nhật Bản. Hải quan di đặc khu ini meda brei patagok pasang iek pandap blei tame saong menuac tame negar ini di dom pabah mbang negar.

Tui khau tin bahrau brei thau pambuak tal bruk jaleih tatua jalan pasei daok padang ngak di bang Mizoram pak Ấn Độ harei kabroi (23/8), dom urang metai tagok tal labaih 26 saong hu 2 urang njauk rambuac. Cảnh sát Ấn Độ brei thau lac hu 28 urang ngak kong hu mbaok di tatua tuk rahtabiak bala, min gah khau tin brei thau lac hu 40 urang ngak. Tatua jalan pasei jaleih nan , di danak dak jalan pasei bahrau, pambuak Bhairbi-Sairang kayua Công ty jalan pasei tapen negar Đông Bắc (NFR) peih ngak. Urak ini gah chức năng hu duah mboh 13 rup tau saong daok kham marat duah dom urang njauk bala daok veik.

Giáo sư Christina Pagel di Đại học London, urang dalam kapul Cố vấn Khoa học ka dom bruk samar drah (SAGE) di rajaei Anh hu panuac khan lac mbang jit praong Covid-19 meda tamuh tabiak di châu Âu di bilan 9 tal. Urak ini, dom menuac njauk Covid-19 di dunya daok tgaok khang meng bruk tamuh tabiak biến thể Eris (daok ieu lac EG.5), hu prein njaom mbak glaong saong lac sa dhar di BA.5 - biến thể phụ di Omicron. Gah Y tế dunya taong yaom EG.5 lac kapul biến thể “njauk caik hatai sangka”. Tui Giáo sư Pagel, meyah prein pacang di vaccine Covid-19 daok trun nao bo oh hu jalan pasang iek saong patagok dom mbang klauk veik jru, dom taneh ia châu Âu meda dang anak bruk mbuan gaok kan kandah jang meyah hu dom mbang jit bahrau./.