Tui Tổng cục Hải quan, bilan 7 thun ini, bruk pablei pandap kaya kan di Việt Nam tapa Trung Quốc hu jaik 4,6 tỉ USD, tui nan abih tih jien mek tame meng bruk pablei kaya kan tapa Trung Quốc 7 bilan akaok thun tagok tal 30,84 tỉ USD, tagok 2,4% dut saong tukvak ini thun dahlau. Urak ini, Việt Nam hu 8 kapol nyaom pandap pablei tapa Trung Quốc hu meng 1 tỉ USD tagok. Dalam nan, nyaom pandap hu pablei ralo abih lac mac vi tính -komputer, pandap điện tử saong dom linh kien dien thoai. Daok njam patam baoh karaoh hu angan dalam nyaom pandap pablei tabiak negar langiu “ tỉ USD”. Abih bilan 7, njam patam baoh karaoh di Viet Nam tapa Trung Quốc hu jaik 2 tỉ USD, tagok 128,5% dut saong tukvak ini thun dahlau.

Harei kabroi (22/8) rilo sang bac Đại học di TP.HCM brei thau tanut điểm chuẩn hu pilih ruah tame Đại học tui jalan pasang iek điểm pakacah tamat THPT. Sang bac Đại học Kinh tế - Luật (Đại học Quốc gia TP.HCM) brei thau điểm chuẩn tui jalan pasang iek điểm pakacah tamat THPT, glaong abih lac gah Thương mại điện tử haong 27,48 điểm. Daok sang bac Đại học Khoa học tự nhiên (Đại học Quốc gia TP.HCM), gah Ilamu Máy tính daok khik tanut điểm chuẩn glaong abih lac 28,05. Patui di nan lac gah Trí tuệ Nhân tạo hu điểm chuẩn 27.

Harei 22/8, gilai pajeng tuai rivang main Spectrum of the Seas di hãng Royal Caribbean Cruise Lines hu pataok tame Tân Cảng - Cái Mép, ban sit Phú Mỹ, Bà Rịa - Vũng Tàu, pajeng 4.000 tuai dunya, dalam 12 harei peih nao rivang ma-in dom taneh ia Chau A. Hadei di tuk pataok tame tapen gilai, labaih 2/3 tuai damuai nao tuor ma-in di Bà Rịa-Vũng Tàu, tour tasik Vũng Tàu, tour rivang ma-in bhum kraong ia gah Pei negar di Cái Bè-Tiền Giang saong tour rivang duah thau TP.HCM chreih chrai. 

Festival Bingu - Kiểng Sa Đéc hu peih tabiak meng harei 30/12/2023 tal harei 05/01/2024 di ban Sa Đéc, tỉnh Đồng Tháp. Ini lac tuk piah pok je bruk pala bingu, kiểng, patagok yaom kinh tế pambuak haong cakrok du lịch nông nghiệp saong danak dak OCOP di Đồng Tháp. Festival Bingu- Kiểng Sa Đéc mbang ka I thun 2023 ngan saong kadha: “hatai taneh – hatai bingu”. Festival Bingu - Kiểng Sa Đéc hu dom bruk ngak praong lac: parang tabiak, parang iek pandap bingu kiểng dalam taneh ia saong di dunya, pandap OCOP di dom huyện, ban dalam tỉnh Đồng Tháp; pok je urang pala bingu, kiểng Sa Đéc; ginum biai paglaong chuỗi giá trị gah pandap bingu, kiểng; pambuak bruk pablei salih dom bingu, kiểng.

Jabat Cảnh sát pasang iek, Kông an tỉnh Cà Mau birau brei panuac iew Viện Kiểm sát bhap bini tỉnh Cà Mau ba tabiak kaoh duis 3 urang jakar gah Y tế kayua ngak suan hukum pambuak tal bruk blei hoa chất, sinh phẩm saong padap duh ka bruk pacang caga jit COVID-19 di Công ty Việt Á. Tui nan, Jabat CSĐT ba tabiak 3 bị can nan lac: Đặng Hải Đăng, umo 57 thun, dahlau diah lac Yam ndoc CDC Cà Mau; Hồ Quang Nhu umo 35 thun, dahlau diah lac Phó Trưởng phòng Kế hoạch - Nghiệp vụ CDC Cà Mau saong Lê Ngọc Định, umo 54 thun, dahlau diah Pho akok Jabat Kế hoạch - Tài chính, Sở Y tế Cà Mau.

Quốc hội Thái Lan harei 22/8 hu peih mbang nyaom haong gauk di Hạ viện saong Thượng viện piah pilih ruah Thủ tướng bahrau. Meng hu 482/731 phiếu buh brei di Quốc hội, ong Srettha Thavisin di liên minh kayua đảng kayua taneh ia Thái Pue Thai pan akaok hu jeng Thủ tướng ka 30 di Thái Lan. Ong Srettha hu taong yaom lac urang hu jalan sahneng chính trị tự do min oh cực đoan. Yaom lac ilamu ngak chính trị oh rilo, min ong hu rilo ilamu pan akaok, khik ramik gah padang ngak Tập đoàn Sansiri jeng sa tập đoàn praong khang abih di Thái Lan dalam gah sang danaok taneh riya.

Mbang patuh rah tabiak di sa lubang mỏ dang di tỉnh Thiểm Tây, gah barak Trung Quốc di melam harei 21/8 ngak brei takik di nyu 11 urang metai. Labaih 90 urang di lubang dang, dalam nan hu 9 urang daok gar tavak dalam lubang saong oh mboh dreih yau daok diuk. Urak ini, dua urang hu ba tagok mbaok taneh min njuak rambuac trak, metai hadei tuk kham merat daong iek ruak min oh hu jneg. 11 urang njauk rambuac hajhol hu ba tame sang iek ruak. Mỏ Tân Thái hu hu duah mboh di thun 2009 saong ba tame kuac mek dang di thun 2020. Yaok thun mỏ ini brei mek 300.000 tấn dang.

Mintri Jien padai Ấn Độ bahrau khan lac meda kak je pablei tabiak negar langiu 40% ngan saong lasun piah pasang iek yaom saong khik kajap bruk pabak lasun di darak pasar dalam taneh ia. Mintri jien padai brei thau, yaom kak je lasun pablei tabiak negar langiu meda ngak ka yom lasun di taneh ia ini glaong jang duk haong Pakistan, Trung Quốc saong Ai Cập, tapa nan patrun patakik bruk pablei tabiak negar langiu saong ngak brei trun yaom dalam taneh ia. Kuhria meng bilan 7 tal ini, yaom lasun pablei di dom darak praong di Ấn Độ tagaok jaik 20%, lac 29 USD/tạ, dalam tuk daok hu hajan ngak ka urang huac lac lasun oh siam saong hu takik. Ấn Độ lac taneh ia pablei lasun tabiak negar langiu praong abih di dunya.