Di Labik dulich pakat negar Mũi Cà Mau, xã Đất Mũi, huyện Ngọc Hiển, Mban tacei jalan Bilan dam dara tỉnh Cà Mau birau peih ngak Bilan dam dara thun 2023 ngan haong kadha “Dam dara Cà Mau brei ngak dahlau bruk salih pandar so”. Hadei di tuk peih bruk, dom urang lambaok saong dom dam dara hu pala 3.000 phun đước di Khu dulich Mũi Cà Mau. Mbang ini, Tỉnh đoàn Cà Mau jak ba dom doanh nghiệp alin brei 10 radaih juah, 20 paok jien bac saong dom paok pandap ka baoh sang sarak karja, urang jakar đoàn, anek saih raidiuk kan kandah. Tỉnh đoàn Cà Mau saong dom đơn vị pambuak tal brei peih ngak rilo danak dak, bruk ngak dalam bilan dalam dara, kuhria abih tih jien buh tame labaih 7 tỷ đồng.

Urak ini abih tih tanut pablei lẻ pandap panda saong jien mek tame meng bruk blei pandar dalam bilan 2 di TPHCM trun dut saong bilan 1/2023. Makna lac kayua bilan 2, bruk pablei salih, ma-in sambai di rahra mboh trun, dui tui jien mek tame di bruk pablei lẻ pandap panda, mbang daok di labik jang yau du lịch lữ hành trun biak rilo. Tui dom urang pablei lẻ, doanh nghiệp di TPHCM, thun 2023, kinh tế Việt Nam tui kuhria jeng daok khik tani tanat bruk patagook siam, min tanut maraik gauk di dalam darak pasa pablei salih lẻ dak harei dak catang tagok jang ngan haong bruk hu mbaok tame saong peih praong bruk ngak di dom gah pablei lẻ dalam taneh ia saong dunya.

Mikva urang ngak nong di tỉnh BR-VT daok tame bilan yuak padai Đông Xuân thun 2022 -2023. Padai yauk saong yaom pablei di bilan Đông Xuân thun ini hu tagok, angaok mblang hamu mboh chreih chrai jang kayua bui sambai yuak hu rilo padai, pablei hu yaom. Urak ini, yaom padai glong meng 6.300-7.200 đồng/kg. Yaom padai yau urak ini, kuhria rah tapa yaok ha, urang ngak ong laba meng 30 -40 trieu dong sa ha. Bilan padai thun ini ngak hu lagaih, takik jit ruak, yuak hu rilo, yaom pablei hu tagok yau nan ye mikva urang ngak nong biak chreih chrai.

Bilan 3 daok lac bilan thu di ĐBSCL, min dom urang njauk ruak pandiak tabiak darah mboh tagok khang, hu urang metai. Di tỉnh Long An, meng akaok thun ini hu 561 urang ruak pandiak tabiak darah, tagok 5 mbang dut saong tukvak ini thun dahlau saong hu 1 urang metai. Di huyện Cái Bè, tỉnh Tiền Giang, yaom lac labik hu peih tabiak ngak rilo bruk pasang iek sruh jit, pacang cakak bruk njom mbak ruak pandiak tabiak darah, min jeng mboh dom urang ruak tagok glaong. Di ban Cần Thơ meng akaok thun tal urak ini hu 472 urang njauk ruak pandiak tabiak darah, tagok labaih 555% dut saong tukvak ini thun blaoh. Dom chuyên gia y tế kakei lac, jit ruak pandiak tabiak darah dalam thun ini meda tamuh tabiak biak trak damak, njauk caong hu bruk caga dahlau, pasang iek piah halain hatain pacang caga jit ruak dahlau di tuk tame bilan hajan.

Kong an huyen Phú Riềng, tỉnh Bình Phước daok duah thau bruk tavak sre yaok pluh ty dong di xã Bù Nho saong peih ngak dom jalan piah khik tani tanat bruk haduh hatai di manuac sia, khik siam an ninh trat tu. Dahlau di nan, jabat kong an hu taduan rilo harak gar di rilo bhap bini pathau diuk pasang muk Bùi Thị Kim Yến (umo 32 thun) daok di palei Tân Phước, xã Bù Nho “ Pandar angan je di drei piah blah drap ar” ngan hong jien jaik 60 tỷ đồng. Tui kadha pathau ye bhap bini hu payua jien ka diuk pasang muk Yến piah blei taneh min tuk duah tau ye taneh nan hu urang karei dang angan blaoh. Langiu di nan, rilo bhap bini daok pataom jien ka diuk pasang muk Yến mesre mek jien laba. Urak ini diuk pasang muk Yến klak nao truh labik daok.

New Zealand daok gaok bruk lac harei hadei kurang urang ngak biak rilo. Harak pathau khan bahrau hu ba tabiak di New Zealand brei mboh lac, rahra di taneh ia ini daok taha nao saong tal akaok dom thun 2030, kapul urang ngak di taneh ia ini meda takik veik. Tui kuhria, tal thun 2048 New Zealand meda kurang labaih 250 ribau urang ngak. Anak bruk ini, pathau khan hu ieu rajaei New Zealand padang ngak sarak nhập cư tani tanat saong suai lavik. Gam haong nan, njauk pachreih urang kumei saong urang praong thun hu mbaok tame nyaom ngak bruk piah trun manieng kan kandah di bruk kurang urang ngak.

Tổng thống Nga Vladimir Putin hu ba tangin kateik tame tanut brei peih radaih pui “Gavang vin praong” di dom radaih pui ala taneh di Moscow. Atah 70km, “Gavang vin praong” di Moscow hu jeng jalan radaih pui peih ala taneh atah abih di dunya, tapa mbaok jalan radaih so 10 di Bắc Kinh, Trung Quốc. Jalan radaih pui ngam nan hu padang ngak dalam 11 thun, meng puac thun 2011 saong ngak brei salah di thun 2022 hoang 31 labik radaih padeih, dalam nan hu 24 labik ga pajeng.

Rajaei Mỹ brei thau sa jalan ngak an ninh mạng bahrau. Jalan ngak piah pato tacei sarak dalam harei hadei, ieu kakei peih ngak adat biak catang jang ngan haong dom bruk an ninh mạng hu blaoh di dom gah saong ngak pasiam bruk pambuak gauk di gah rajaei saong bhum tư nhân. Jalan ngak hu khan brei thau hadei di tuk rahtabiak rilo bruk taong tame mạng praong rah tabiak dalam tukvak tapa. Dom bruk taong tame meng phần mềm dok jien, dalam nan hu dom kol tội phạm mạng meblah mek quyen pasang iek hệ thống, ieu ndok biyar jien laoh. Dalam jalan ngak bahrau ini, hu ba Trung Quốc saong Nga tame angan dom gah ngak jhak tal an ninh mạng tantu cambaih abih ngan haong Mỹ./.