Daok di pabah mbang gah Brak di tỉnh Bình Dương, Bến Cát hu taneh praong jaik 206 km² saong hu labaih 364.000  bhap  bini. Meng dom siam lagaih di taneh riya saong jalan mbak nao mai, Bến Cát  pachreih hu khang dom urang dalam saong langiu negar buh jien tame nga mbang, hu jeng sa dalam dom bhum cak rok patagok kinh te - xã hội sami samar. Yau nan, mbiah tal ini, Bình Dương hu 5 ban lac: Thủ Dầu Một, Thuận An, Dĩ An, Tân Uyên, Bến Cát. Ini lac tỉnh hu rilo ban abih di negar drei.

Phun njam baok daok theik tame bak dom kraong, ribaong di bhum Đồng Tháp Mười dalam huyện Tân Phước, tỉnh Tiền Giang. Bruk njauk ndem mayai nan lac dom jalan ngak piah sraong mek njam baok ka oh mboh lagaih. Tuk njam baok dak harei dak tame bak, kraong ribaong oh nao mai hu, urang nong  pala baoh manaih njauk urang mai blei kateik yaom, hu trun yaom meng 500 tal labaih 1.000 đồng/kg kayua oh pajeng hu meng jalan ia njauk nao meng jalan haluk tagok jien sahui.

Piah pasiam bruk gliut jaleih taneh, tani tanat raidiuk bhap bini, tỉnh Bến Tre daok peih ngak 2 danak dak ar pacang glut jaleih praong tapen kraong, tapen tasik, nan lac Danak dak Kè pacang glut jaleih ar kraong Giao Hòa, huyện Châu Thành saong  Danak dak Pacang ia mbang tame, gliut jaleih ar tasik huyện Ba Tri. Dalam nan phun jien piah caga di kadung jien Trung ương thun 2023 hu daong 300 tỷ đồng. Urak ini, tỉnh Bến Tre daok sangka brei buh jien tame ngak dom danak dak pacang ia mbak caga piah ia taba;  pambuak haong dom mentri, dom gah di Trung ương jhul pasamar bruk peih ngak dom danak dak, pacang sir, takik glut jaleih, pacang ia mbak, caga ia taba.  

Bến phà Châu Giang tapa kraong Hậu pambuak ban Châu Đốc saong ban sit Tân Châu, tỉnh An Giang jaik brei padeih nduac di harei 5/5 anak tal tuk tatua Châu Đốc brei radaih nduac. Tatua Châu Đốc hu makna praong, daong pambuak jalan mbak nao mai di ban Châu Đốc, dom huyen, dom bhum palei dalam tỉnh An Giang haong ban sit pulao kaoh Tân Châu. Tatua hu  daong dui katut panak veik tukvak nao mai di dua gah kraong Hậu meng ban Châu Đốc tapa ban sit Tân Châu saong gilac veik tok daok 5 minit dut saong 30 minit tuk nao phà.

Le hoi kraong ia TPHCM mbang II peih ngak dalam 10 harei, kuhria meng harei 31/5 tal harei 9/6 anak tal. Dom bruk ngak dalam Le hoi oh lac peih ngak di dom labik tapen kraong Sài Gòn atau tapen pataok gilai angaok kraong Nhiêu Lộc - Thị Nghè bo daok  hu peih  praong, sumu gauk di ralo labik  di TPHCM, pambuak haong Adit baoh kayau “ Angaok ar ala gilai” di tapen Bình Đông (Quận 8)…Le hoi thun ini daok hu peih ngak rilo bruk pambuak dulich di TPHCM saong dom bhum Đông Nam Bộ saong Bhum taneran kraong Cửu Long.

Mỹ, Hàn Quốc saong Nhật Bản daok jhul khang bruk padang ngak sa kapul urang ilamo rilo taneh ia bahrau piah tani tanat bruk peih ngak dom harak adat taong phat Triều Tiên. Bruk ngak ini hu ba tabiak hadei di tuk Nga oh njauk gauk ka bruk brei patagok veik tukvak yaok thun di kapul urang roh duah ilamo Liên hợp quốc. kapul ini hu pasang iek bruk peih ngak dom jalan taong phat Triều Tiên pambuak tal danak dak hạt nhân saong tên lửa di Triều Tiên dalam 15 thun tapa. Dalam tuk nan, Trung Quốc buh phieu mbong.

Harak pathau khan Bruk dan so dunya thun 2024 di Quỷ Dân số LHQ brei thau Ấn Độ urak ini dang akaok dunya ka dan so kuhria mboh labaih 1,44 tỷ urang; hadei di nan lac Trung Quốc ngan haong 1,425 tỷ urang. Dalam mbang camereip yaok kuhria  bhap bini di thun 2011, bhap bini Ấn Độ tuk nan hu labaih 1,21 tỷ bhap bini. Urak ini hu labaih 7% bhap bini Ấn Độ umo labaih 65 thun; dalam nan umo taha kuhria rah tapa di urang likei taneh ia ini lac 71thun, di kumei lac 74 thun. Ngan haong bruk nan, Ấn Độ hu iek yau taneh ia hu bhap bini umo ranaih rilo abih di dunya.

Dalam thun ini, Liên minh châu Âu sanya lac meda buh tabiak 3,5 tỷ euro (samu 3,71 tỷ USD) piah khik ka tasik praong saong jhul tagok bruk khang kajap tapa rilo jalan sahneng ngak bahrau. Bilan blaoh, jabat tui iek bruk DDKH Copernicus di EU brei thau ka nhiet do di tasik praong tagok tal tanut glaong abih dalam bilan 2 thun ini. Bruk taong mek biak rilo saong njom nerak katak jeng lac bruk kanjak jhak tal tasik praong./.