Kuhria tal harei ini (31/1),  tỉnh Bình Dương hu 88% dom doanh nghiệp dalam labik ngak kong ngak bruk gilac veik hadei di mbang padeih Tet Nguyen dan. Dom urang ngak mai ngak gilac jeng meblah 86% dalam abih tih 1,2 triệu urang ngak dalam tỉnh.  Nao ngak bruk hadei di tukvak padeih Tết, urang ngak hu po doanh nghiệp trun tal sang xuong sua rivang, pachreih ba saong lì xì meng 100.000 tal 500.000 đồng sa urang. Dalam dom harei akaok thun ini, rilo doanh nghiệp hu pilih riah labaih 10.000 urang ngak piah pabak ka dom urang ngak oh mai ngak veik saong peih praong sang xưởng.

Daok di tỉnh Đồng Nai, jaik abih dom doanh nghiệp jeng hu ngak bruk veik, di rilo Cty, urang ngak nao ngak veik jaik ginup abih, daong ka doanh nghiệp tani tanat bruk ngak meng di akaok thun. Tui Liên đoàn Lao động tỉnh Đồng Nai, dalam tỉnh hu jaik 1.600 doanh nghiệp hu padang Công đoàn, hu labaih 633.000 urang ngak. Urak ini hu labaih 1.300 doanh nghiệp ngak bruk veik saong jaik 520.000 urang ngak mai ngak veik. Ini lac bruk biak siam, daong ka doanh nghiệp oh klaih klaoh bruk ngak, pabak ginup pandap jao ka gah pabuak bruk blei.

Tỉnh Ninh Thuận daok pataom prein tame khik ramik, cak rok patagok  gen phun jru kan duah pambuak haong bruk khik ramik parilo sinh học saong alam môi trường sinh thái. Dalam nan, ba tabiak jalan ngak tal thun 2025 meda khik ramik saong peih ngak khang kajap 82 janih gen phun jru kan duah, angan je di tỉnh; cak rok patagok 60 phun jru ngan haong mblang pala praong piah pabak ka bruk iek ruak, taong ruak meng phun jru meng kan di mikva bangsa Cam daok di xã Xuân Hải, huyện Ninh Hải. langiu di nan, Ninh Thuận hu padang bhum pala phun jru hu meng 1 tal 2 chuỗi pambuak gauk roh duah, raong pala, ngak tabak dom jru kan duah, pala rilo piah pabak ka darak pasa, ngak njauk tui adat, tanut chuan dalam bruk pala saong pataom paik phun jru di Gah Y tế dunya.

Urang ngak sara di mblang sara An Ngãi (huyện Long Điền) haong urang ngak sara di xã Long Sơn (TP Vũng Tàu) daok kuac mek sara camereip dalam bilan sara thun 2022-2023. Urak ini yaom sara haluk daok hu urang blei salih mai blei haong yaom meng 2.000-2.300 đồng sa kg,sara tauk bạt yaom meng 3.000-3.200 đồng sa kg, glaong jang 2 mbang duk haong yaom sara thun bloh. Bilan sara thun ini dalam tỉnh Bà Rịa Vũng Tàu hu jaik 570ha taneh ngak sara, takik jang 130ha duk haong bilan sara thun bloh.

Yaom baoh panat Thái biak aval di tỉnh Tiền Giang daok tagok khang. Urak ini panat Thái janih 1 hu yaom 28.000-30.000 đồng/kg, janih 2 yaom 22.000-24.000 đồng/kg. Yaom ini glaong jang dua mbang dut saong tukvak dahlau di Tết. Tỉnh Tiền Giang, urak ini hu labaih 13.000ha panat Thái biak aval ngan haong sản lượng labaih 182.000 tấn baoh pabak ka darak pasa dalam saong langiu tỉnh. Panat Thái biak aval hu maong lac phun pala piah tabiak truh kan kathaot ka mikva di puk palei, kayua nyu mbuan pala, ba mai năng suất glaong saong jien mek tame glaong.

 Akaok Mintri jien padai Mỹ hu panuac lac, Mỹ daok dang anak bruk srau kadau sraiy biak trak damak meyah gah ngak adat hukum oh tagaok tanut pacang tukvak mesraiy, saong ndom lac, taneh ia ini meda dang anak bruk suy thoái kinh tế. Dahlau di nan, gah ngak adat hukum brei yah klaak atau brei padeih pandar tanut pacang veik ka yaom jien brei mesraiy piah rajaei hu mesraiy pok jien bahrau. Tui Mintri Jien padai Mỹ, meng bruk pacah sraiy ngan saong nền kinh tế Mỹ saong dunya meda ba tal sa bruk srau kadau jien padai.

 Gah Y tế Pakistan brei thau, dom urang metai dalam mbang taong bom pametai rup eng di harei 29/1 di sa sang magik Islam di ban Peshawar  tagok tal 83 urang saong labaih 150 urang njauk rambuac. Hu rilo rup tau hu ba tame sang iek ruak dalam melam 30/1 hadei di tuk hu ba tabiak meng labik jaleih kateik hadei di mbang patuh bom. Kapul cứu hộ 1122 jeng daok kham marat duah, min mboh lac oh duah hu urang halei daok diuk.

Gah Y tế dunya (WHO) tabiak panuac ieu dunya buh jien rilo jang ka bruk pacang veik dom ruak nhiệt đới daok njauk var klaak, ngak ka labaih 1 tỷ 650 triệu menuac di dom taneh ia takik cakrok di abih, njauk taong ruak dalam thun 2021. Ini lac dom ruak bhian randap di bhum nhiệt đới yau ye ruak ndih, khlong, gla, laka, ula jhak kaik saong ruak meta… Dom ruak ini bhian mboh di dom labik kurang ia hacih, labik oh sa-at saong takik hu iek glang prein yava di gah y tế. Tui WHO, dom ruak ini bhian hu klaak tapa tuk oh hu sangka tal labik tal dhua, saong hu taduan jien daong biak takik meng dom kadung jien./.