Peih ngak Danak dak salih pandar so saong ba kong nghe thong tin tame pandar di Danak dak pakat negar patagok kinh te - xa hoi bhum urang bangsa takik  saong bhum ceik, vaktu 2022-2025, tỉnh Bình Phước  hu ba tabiak bruk kham merat daong ka urang bangsa takik hu thau khaw tin ka ilamo kong nghe saong yaih khan pandap ngak tabiak di bhum palei. Tapa salih pandar so, taong abih urang hu angan je, bhap bini urang bangsa takik hu thau ginup khaw tin gah y te, pato megru, ilamo kong nghe, darak pasar; khaw tin an ninh, salamat piah khik tani tanat  raidiuk, ngak mbang cakrok patagok kinh te – xa hoi. Dak harei dak ba dom rija roya, adat cambat di dom bangsa takik yaih khan tal bhap bini dalam saong langiu taneh ia.  

Tapa pasang iek, tỉnh Bạc Liêu urak ini daok hu 1.643 baoh sang kan kathaot, jaik si kan kathaot, daok dalam baoh sang taik tahak, njauk hu padang ngak. Kayua jien padai di tỉnh oh hu rilo, Tỉnh ủy, UBND tỉnh biak caong khin dom jabat, doanh nghiệp, kapul nyaom, menuac urang rik daong labaih 82 tỷ đồng piah padang ngak 1.643 baoh sang ka dom sang kan kathaot, jaik si kan kathaot. Gam haong bruk ieu dom kapul nyaom ba tangin tame daong sang kan kathaot, Bạc Liêu jeng daok kham merat tal puac thun 2025, baoh sang kan kathaot trun daok ala 1%. Dalam nan, dom sang kan kathaot dalam bhum bhap bini bangsa takik yaok thun trun 1%.

UB bhap bini tỉnh Đồng Nai birau tabiak mbaok Kapol Durian. Kapol Durian tỉnh Đồng Nai hu harak gar, hu con dấu saong hu tai khoan ta-eng, eng drei kuhria caga phun jien, labik ngak bruk saong radaih pandap, mac jamraih ngak bruk. Urak ini, durian lac sa dalam dom phun hu pala ralo di Đồng Nai, hu pein khang gah pablei tabiak negar langiu, ba mai kien laba glong. Bruk padang Kapol durian tỉnh Đồng Nai lac biak njauk hu, meda lac pambuak doanh nghiep, HTX, urang ngak nong dalam kapol nyaom  dom chuoi pambuak gauk; takik meriak gauk, pablei salih oh njauk yaom, ngak tayah bruk pambuak gauk ngak mbang.

Meng akaok bilan 8 tal ini, dom kapul khik ramik darak pasar TPHCM hu pasang iek, langyah 24 bruk ngak suan gah pandap panda kaya mbang. Daok ahar, kẹo, ahar Trung thu hu mek khik jaik 16 rabau baoh ahar, yaom labaih 150 triệu đồng saong taong phạt jaik 220 triệu đồng. Cục Khik ramik darak pasar TP Hồ Chí Minh hu panuac kakei, urang blei tuk blei ahar Trung thu njauk blei di dom cửa hàng, labik hu angan je, hu thau cambaih asal di nyu. Tuk blei angaok mạng, njauk ieu gah pablei brei thau cambaih ka labik ngak, labik pablei salih. Oh mbang ahar Trung thu oh thau cambaih meng halei mai, oh thau labik ngak, oh hu angan je.

Di Dak Lak, bruk jit ruak di taphon athur raong rah tabiak sraw kadau, abih di nyu nan lac dom sruh jit ruak tả pabui chau Phi, ruak tamuh baoh di kalik hu mboh di rilo palei. Urak ini, rilo palei jit ruak daok oh ka tapa 21 harei. Anak bruk srau kadau di jit ruak, tỉnh hu buh tabiak jaik 29 tỷ đồng piah dom bhum palei peih bruk pacang caga jit ruak di taphon athur raong. Dalam nan, abih meteh phun jien buh tame piah blei dom janih vaccine caga ruak. Daok veik lac piah ka dom bruk ngak: pasram patia, pathau khan, blei jru pametai anek ruak, daong urang klauk jru caga ruak.  

Dalam mbang langyah harei 5/9, ong Hunter Biden, anek likei di Tổng thống Mỹ Joe Biden, hu taduan duas ngan haong 9 cáo buộc dauk kak je. Hadei di tuk oh mek hu bruk njauk gauk haong công tố viên di Tòa án Liên bang Los Angeles, ong Hunter Biden meda dang anak bruk njauk guk tal 17 thun saong jien phạt meda tagok tal 1 triệu USD. Langiu di bruk lac dauk kak je dalam rilo thun, ong Hunter Biden daok njauk cáo buộc lac blei saong ngak po phao, jeng yau pandar ma túy.  

Hạ viện Thái Lan brei tapa hukum kadung jien karja  3,75 ribau tỷ baht (sumu 111 tỷ USD) ka thun jien padai 2025. Hukum ini brei pandar dalam thun jien padai meng bilan 10 thun 2024. Hukum jien ndo brei tagok 4,2% bruk cai pandar bruk di rajaei dut saong thun jien padai yau urak ini, phun jien nan brei adat ka Thủ tướng birau patagok bruk pandar jien karja ngak brei jhul pakhang bruk ngak mbang kinh te birau veik. Thu tuong birau sanya meda hu jalan daong bruk ngak kinh te taneh ia tabiak truh kan kandah, srau kadau saong  khan brei thau cambaic laic sarak di rajaei dalam quoc hoi di adit anak tal.

Enam drei lamen nduac tabiak truh mblang bein pakat negar Kruger di Nam Phi harei 4/9 saong dom menuac ngak di pak ini daok glaih glar duah jalan ba dom drei lamen praong ini mai gilac veik. Urang brei panuac di dom mblang bein negar Nam Phi, khan lac dom drei lamen nduac tabiak truh mblang bein Kruger jaik taphia negar Mozambique, tapa sa baoh kraong kayua ia di kraong bhian trun biar di tukvak ini dalam thun. Anak bruk kan kandah nan, mblang bein Kruger hu panuac ieu gah ngak adat hukum tame daong./.