Bruk pilih ruah dai hoc chinh quy thun 2024, Thứ trưởng Mintri Pato magru ong Hoàng Minh Sơn brei thau, tamat tukvak tut angan hatai caong, blah web daong ka bruk pilih ruah di Mintri hu abih tih labaih 733 ribau anek saih hu tame hatai caong tut angan pilih ruah, samu 68,5% dut saong dom anek saih tut angan hu mbaok tame mbang pakacah tamat THPT. Bruk ini brei mboh hatai caong bac taa di pakat dai hoc di anek saih tagok glaong. Dom gah hu rilo anek saih tut angan tame pilih ruah hu gah kinh doanh quản lý, ky thuat kong nghe, abih di nyu nan lac gah ilamo pato magru hu anek saih tut angan tame biak glaong, patui di nan lac gah nhân văn saong prein yava.

Dom danak dak halan hatian thun 2024 di Kapul dam dara TP Hồ Chí Minh dui pachreih hu 611.209 mbang dam dara hu mbaok tame, dalam nan hu rilo dam dara dom taneh ia langiu urak ini daok di TPHCM, dam dara halan hatian di Malaysia, dam dara Việt Nam daok di negar langiu. Dalam dom danak dak halan hatian daok patagok hu siam lagaih, kein laba tuk daong hu ka rilo menuac kan kandah, abih di nyu lac 16 tỉnh bhum Tây Nguyên, bhum tapen tasik Nam Trung bộ, Đông Nam Bộ, bhum taneran kraong Cửu Long, xã pulao Thạnh An (huyện Cần Giờ, TP Hồ Chí Minh), huyện pulao Phú Quý (tỉnh Bình Thuận) saong di taneh ia Cộng hòa Dân chủ bhap bini Lào.

UBND tỉnh Bình Thuận bahrau ieu kakei dom jabat saong UBND dom huyện peih ngak dom bruk hu makna piah peih ngak siam lagaih jalan ngak di Mban Thường vụ Tỉnh ủy ka bruk pambuak gauk haong dom xã saong puk palei pablak tame bhum mikva bangsa takik. Dalam nan brei thau jalan ngak di bruk pambuak gauk rilo meng lac piah daong saong jak ba dom urang jakar, cong chuc, vien chuc, rahra pak ini pambuak gauk patagok dom prein khang piah yam tagok ngak kaya mada. Tapa nan, peih ngak siam veik bruk  padang talei jumpataom gauk dalam bangsa, bruk ngak bangsa saong bruk jak ba dalam bhum bangsa takik.

Meng akaok thun tal ini, gah ngak nong tỉnh Hậu Giang mek hu rilo jak jeng praong. Abih di nyu lac bilan padai Đông Xuân thun ini, urang ngak nong laba hu rilo jang 27% duk haong thun blaoh. Gah ngak nông hu ngak siam bruk salih janih phun pala, athur raong tui jalan paglaong yaom kinh tế saong lagaih haong langik tasik, taneh riya di yaok labik yau ye: padai  chất lượng glaong, phun mbang baoh, njam hacih,... kak haong padang ngak palei pala bahrau, cakrok bruk ngak mbang pala drak saong khik pacang alam langik tasik. Meng nan bo bruk cakrok kinh tế (GRDP) bhum I (ngak nong) hu jaik 3,8%, glaong jang duk haong bruk ba tabiak lac 3,5%.

Di Mbang pakacah “Danak dak padang mbang ngui siam lagaih” dalam anek saih, sinh vien di Sang bac Đại học Cần Thơ (ĐHCT) peih praong thun 2024 bahrau hu peih tabiak. Danak dak “aw pacang asal pajaih” di Thạch Hoàng Anh, bangsa Khmer mek hu jai Nhì. “Aw pacang asal pajaih” pandar kong nghe aik suai thong minh ngak jeng 2 tal khik caga ka asal pajaih. Tuk drak tame taneh, hu ginup ia pathah, asal khak njuk dhal dhal tame gah dalam, hadei di nan meng ralai tame saong njom tapa tal ka  dua tame labik gha phun atau asal pajaih. Tuk nan, phun meng hu pabak janih dinh duong, nan ye phun njuk ginup khak bo oh njauk jru mek. Pasak pato pakai roh duah saong langyah kinh te, Sang bac ĐH Cần thơ meda daong ka saai Thạch Hoàng Anh ngak salah dom adat hukum piah hu ba pandap tabiak darak pasa dalam tukvak anak tal.

Hàn Quốc meda pabak 3 triệu đô la Mỹ piah daong 4 taneh ia châu Phi gaok kan kandah kayua pandiak bhang khang. Dalam abih tih pok jien daong, Zimbabwe saong Zambia yaok taneh ia hu taduan mek 1 triệu đô la Mỹ,  Malawi saong Namibia, yaok taneh ia hu taduan mek 500 rabau đô la Mỹ. Bruk daong hu brei tapa danak dak padai brah pandap mbang dunya.

Di mangaok darak pasa ngoại hối Tokyo harei 5/8 brei mboh, yaom jien Yên hu tuk tagok tal tanut 141 yên salih 1 đô la Mỹ. Ini lac mbang camriep dalam 7 bilan tapa, yaom di jien Yên bahrau tagok glaong di tanut ini. Rilo urang ilamu jia lac, jien Yên meda tagok tal labaih 140 yên salih 1 đô la Mỹ dalam thun ini, saong meda lac daok tagok glaong jang veik. Bruk pasiam ini hu taong yaom lac nao cagar veik dut saong tukvak di mateh akaok thun ini, tuk jien Yên trun yaom 12%, jeng lac jien lahik yaom khang abih dalam nyaom jien G10.

Dom anek naih oh hu sang danaok daok tagok rilo di Australia. Dalam thun jien padai 2022-2023, taneh ia ini hu jaik 76 rabau anek naih oh hu sang daok, tagok 3,2% duk haong thun dahlau di nan. Pathau khan jeng brei mboh, yaom lac hu duah bruk daong di dom gah min jeng daok hu tal 25 rabau anek naih oh hu sang danaok, oh hu labik daok. Hu rilo makna ba tal bruk nan di Australia yau ye dom sang oh ngak njauk bruk di drei, anek naih njauk kateik greik, rapeik rapai atau njauk neh rabha kayua lac lakei atau lac kumei./.