Danak dak “Pok takai adei tal sang bac” 

Page ini, di Sang ngak bruk di Rajaei, Thủ tướng Phạm Minh Chính dang kaok var ginum biai Rajaei ka bruk padang ngak hukum bilan 8 thun 2022 piah pasang iek 4 danak dak hu makna praong dahlau di tuk pok tagok duh ka Mbang nyaom ka 4 QH mbang XV, nan lac: Hukum Taneh riya (pasiam veik); Hukum Đấu thầu (pasiam veik); Hukum HTX (pasiam veik); Hukum Yaom kaom (pasiam veik). Di mbang nyaom Thủ tướng hu brei thau cambaic, ini lac dom hukum biak njauk ngak dalam tukvak yau urak ini piah langyah dom kan kandah, daok tavak tave cakak bruk patagok, rik tame jhul pakhang bruk pasiam samar saong patagok khang kajap bruk kinh tế - xã hội  hadei di jit ruak praong saong anak dom kan kandah meng gah langiu kayua dom bruk rah tabiak samar, sraw kadau, kan thau dahlau angaok dunya. 

Piah daong  ka anek saih kan kathaot hu nao bac, dalam 2 harei tapa, Bộ chỉ huy Bộ đội biên phòng tỉnh Sóc Trăng pambuak haong Kapul pachreih bac tỉnh hu alin hadiah 200 pok jien bac, yaok pok yaom 1 triệu đồng saong Tập đoàn Viễn thông Quân đội dhar Viettel Sóc Trăng hu alin hadaih 2.000 baoh siphau dalam danak dak “Pok takai adei tal sang bac” brei ka dom anek saih kan kathaot pachreih bac saong anek bhik di urang jakar dom Đồn, Hải đội 2 Biên phòng, hu raidiuk kan kandah daok di bhum biên giới tasik huyện Trần Đề, Cù Lao Dung haong ban sit Vĩnh Châu. 

Di tuk tame thun bac birau, Công ty cổ phần Đầu tư Xây dựng, Thiết bị saong Công nghệ Hoàng Hà, labik ngak bruk di Hà Nội birau alin 200 paok pandap, kuhria tui jien labaih 110 trieu đồng ka anek saih bangsa Raglai di huyen Bác Ái, tỉnh Ninh Thuận. Yaok paok pandap yaom 500.000 đồng saong 5 baoh siphau. Tui ong Hồ Xuân Ninh, Akok Ủy ban bhap bini huyện Bác Ái, raidiuk mikva Raglai daok rilo kan kandah, dom thun jiak ini, rilo kapol, urang tuk halei jeng pambuak saong huyen hu daong jien, tapuk, siphau, pandap bac da-a, var huak jala pandiak…rik daong pachreih ba mikva urang bangsa Raglai ba anek bik nao bac.

Mikva pala darang di xã pulao Tam Hiệp, huyện Bình Đại, tỉnh Bến Tre daok chreih chrai kayua darang pala njauk, pablei hu yaom. Urak ini darang di bein tui janih yaom meng 30 tal 50 rabau đồng 1kg. Daok darang tapa harei, po bein bluh thu pablei “cơm nhãn” yaom 100 rabau đồng sa kg. Dalam xã Tam Hiệp hu labaih 550 ha bein darang, meblah 90% taneh ngak nong di xã.

Mban Tacei jalan pacang  caga tham nhũng, tiêu cực tỉnh Bà Rịa-Vũng Tàu njauk gauk ba tabiak kaoh tui hukum 4 bruk tham nhũng, tieu cực daok langyah dalam tỉnh tame pasang iek. Nan lac bruk tham ô drap ar rah tabiak di Công ty Cổ phần Bọc ống Dầu khí; bruk kurang pasang iek ba tal khat lahik trak bruk jak tak glai di ceik Thị Vải, ban sit  Phú Mỹ; bruk urang dahlau diah ngak Akok Jabat Tài nguyên Môi trường huyện Côn Đảo pambak tame bruk ngak, quyền di drei tame dalam tuk ngak bruk saong bruk urang dahlau diah ngak Kế toán trưởng UBND xã Hòa Hội, huyện Xuyên Mộc tham ô drap ar karja.

Philippines tabiak panuac peih bruk mesruh abih gah haong bruk “lạm dụng tình dục” uranaih online tuk bruk ini tagok samar dalam jit praong COVID-19. Tui taong yaom di Kapul Công lý dunya (IJM) hu jabat di negar Anh, Philippines hu jeng labik “khai thác tình dục” uranaih online praong abih hu thau tal di mangaok dunya. Kadung jien Uranaih Liên hợp quốc brei thau, dom bruk kateik greik tình dục uranaih di Philipin tagok 280% di thun 2022.

Dom urang metai kayua COVID-19  di harei 23/8 di Nhật Bản tagok glong abih ngan haong 343 urang. Dalam bruk kham merat ngak brei trun meneing bruk kateik trak gah hành chính ka dom sang iek ruak tuk urang njom ruak gilac, thống đốc dom tỉnh di Nhật Bản hu pachreih karja brei takik iew pathau khan yaok harei ka dom mbang urang birau njom ruak, kadha praong di abih lac daong taong ruak ka dom urang daok jaik. Tui kuhria, samar di abih lac dalam harei ini, Rajaei Nhật Bản meda ba tabiak dom jalan ngak pambuak tal bruk ramik pasiam dom jalan pacang COVID-19.

Tui kuhria mboh di Pasak pasang iek saong pacang caga jit ruak Mỹ (CDC), umo thun urang diuk di dunya di taong abih 50 bang saong Đặc khu Columbia dalam thun 2020 jeng trun duk haong thun 2019, rilo meng lac kayua Covid-19 saong kayua menyum jru rilo jang tanut brei menyum. Pathau khan di  CDC Mỹ, ba tabiak tuk akaok thun brei mboh COVID-19 lac makna ngak brei metai glaong ka 3 dalam thun 2020 ngan haong labaih 350 urang metai./.

Urang lang: Bhumi & M. Phuong – 24/08