Kapol urang jakar ngak bruk di  Bộ Tư lệnh Quân khu 7 birau nao iek labik padang ngak sang bac, sang uranaih jaik taphia labik daok bhap bini tapen negar di tỉnh Bình Phước saong Long An. Di Bình Phước, tui kuhria dahlau meda padang ngak sang bac, sang uranaih di xã Thanh Hòa, huyện Bù Đốp di taneh praong jaik 700m2, kuhria abih tih labaih 5 tỷ đồng. Daok di Long An meda padang ngak Sang bac Mau giao di  xã Tân Hiệp, huyện Thạnh Hóa ngan haong taneh praong 3.500m2, kuhria tui jien labaih 9 tỷ đồng. Bruk buh jien tame padang ngak sang bac, sang uranaih di dom labik daok di bhap bini jaik taphia negar nan lac bruk khin hu di mikva labik ini. Tapa nan pabak ka bruk bac da-a, ma-in di dom kamuan, anek saih, daong dom amaik ame sahanang hatai ngak mbang, lac labik pambak tame khang kajap piah daong ka dom gah ngak bruk di bhum tapen negar.

Di mbang ndom biai nao mai di urang ngak praong pan akaok haong urang ngak nong tỉnh Đồng Nai rah tabiak tuk mesup ini, ong Võ Văn Phi - Phaok akaok UBND tỉnh Đồng Nai brei thau: thun 2022, gah ngak nong di tỉnh jeng tagok hu 3,8% (glaong jang kuhria rah tapa dalam taneh ia lac 3,3%). Min kan kandah di gah ngak nong lac yaom pandap tamo piah ngak tagok glaong, ngak brei trun laba. Langiu di nan, dom kaya nong yau ye: ralow pabui, kayau ngak pandap jeng gaok kan kandah dalam bruk pablei tabiak. Yaom lac hu pambuak gauk min oh catang, bruk ngak oh praong, chất lượng oh samu gauk, angan je oh hu rilo, yaom takik meriak gauk hu. 

Peih ngak Danak dak patagok parilo urang jakar, cong chuc, vien chuc bangsa takik dalam tukvak birau, tỉnh Ninh Thuận peih rilo tal bac sap Cam brei ka urang jakar, cong chuc, vien chuc daok ngak bruk di dom bhum palei hu rilo urang Cam daok. Meng hu yau nan, tukvak tapa, bruk pathau khan dom jalan tacei pato di Đảng, sarak  hukum di Karja tal bhap bini  hu paglong, rik daong peih ngak siam bruk patagok kinh te - xa hoi, khik kajap an ninh, quoc phong di dom puk palei dalam bhum urang bangsa Cam Ninh Thuan.

Anak bruk rah tabiak srau kadau di ruak kayua virus Marburg di dom taneh ia Châu Phi, gah y tế TPHCM hu ba tabiak dom jalan pacang caga piah samar mboh, taong ruak chip tuk hu menuac njauk ruak kayua virus ini. Sang iek ruak Chợ Rẫy, labik puac abih meda hu prein taduan dom menuac ruak kayua virus Marburg hu brei peih bruk pasang iek, samar mboh saong pacang caga njom mbak ruak kayua virus Marburg. Urang y tế tuk mboh menuac ruak halei medil lac njauk ruak Marburg ye brei menuac ruak nan daok karei chip, brei pacang khik rup piah pacang caga njom mbak, samar pasang iek, taong yaom ka ruak njaom mbak saong pasang iek nhiễm khuẩn piah taong ruak ka urang ruak.

Tui kuhria mboh dahlau meng harei 26 tal 27/3 langik meda pandiak catang di Ban raya Ho Chi Minh haong Nam Bộ saong duai atah tal abih bilan 4. Tui rayo kuhria mboh dahlau bruk langik tasik  di bhum Nam Bộ: pandiak khang gam tathak ngak brei uh ang, kan daok, langik hu hajan meng kreh bilan 4 nao. Kayua pandiak gam độ ẩm dalam yawa langik trun biar, mbuan hu khuah patuh saong khuah di labik daok di bhap bini. Langiu di nan, pandiak daok meda ngak lahik ia dalam rup, abih prein, đột quỵ kayua pandiak dalam rup haong gah langiu oh sumu gauk tuk taom gaok nhiet do glong.

Di Indonesia – taneh ia hu menuac sia tui Islam praong abih dunya, bilan eik Ramadan thun 2023 di taneh ia ini, lac meng harei ini (23/3). Dalam bilan eik Ramadan, yaok ratuh triệu urang Islam di taneh ia ini oh mbang, oh menyum, oh njuk pakao, oh brei hagait tame rup meng tuk ia harei tagok mbiah tal tuk ia harei tame. Piah khik caga prein yava saong piah ngak tui hukum agama, Indonesia brei adat urang jakar, menuac ngak di dom jabat rajaei ngak bruk 6 mon yaok harei saong meda tabiak truh labik ngak tuk mon 2 biar harei dalam luac bilan eik Ramadan.

Nyaom biai Ia Lien hop quoc thun 2023 hu peih tabiak di harei 22/3 di labik sang ngak bruk di LHQ. Sa dalam dom thaok binguk ngak brei dom urang lambaok caik hatai tal dalam nyaom biai lac thaok binguk dom cim hạc ngak meng ba-ar saong jeng lac ba pachreih ka asar kadha di harei ia thun ini. Dom drei cim  hạc ba-ar nan lac hu dom anek saih bac grauk labik di dunya payua mai meng dahlau di tuk nyaom biai hu peih pakak. Yaok drei cim hạc ba-ar lac sa panuac di dom uranaih iew dom taneh ia brei ngak piah langyah bruk sraw kadau ia daok njauk ngak brei samar chip  di dunya urak ini.  

Hàn Quốc meda peih sa mbang klauk brei saoh vaccine caga COVID-19 ka bhap bini dalam quý IV thun ini. Brei panuac di mbang nyaom haong UB pacang caga bala saong khik ramik salamat pakat negar Hàn Quốc pambuak tal jit praong COVID-19, Akaok Mintri Y tế saong Phúc lợi Hàn Quốc ndom lac, piah meda khik ramik bruk caga jit hu tani tanat saong jhul samar bruk pasiam veik raidiuk yaok harei, bruk khik caga dom nyaom menuac mbuan njauk njaom COVID-19 lac “praong jang tuk halei karei”./.