Phó Thủ tướng Lê Minh Khái hu mboh tangin brei buh tabiak oh mek jien labaih 3.537 tấn brah meng kadung khik piah negar ka 5 tỉnh lac: Tuyên Quang, Nghệ An, Quảng Bình, Đắk Nông, Trà Vinh piah daong ka rahra gaok kan kandah dalam tuk Tet Quý Mão. Dalam nan tỉnh Trà Vinh hu pabak brei rilo abih lac labaih 1.563 tấn brah. Phó Thủ tướng ieu kakei Ủy ban bhap bini 5 tỉnh taduan bruk suan njauk di dom pathau khan saong peih bruk daong samar drah, njauk manuac urang, njauk tui adat.

Tỉnh ủy Cà Mau bahrau peih bruk taom mbaok pahadar 93 thun harei padang Đảng Cộng sản Việt Nam (3-2-1930 – 3-2-2023). Tapa nan, akaok negar hu alin hadiah Huân chương Lao động hạng Nhất, Nhì, Ba brei klau urang di tỉnh. Dalam mbang taom mbaok, ong Nguyễn Tiến Hải, Bí thư Tỉnh ủy Cà Mau brei thau, dalam tukvak kan kandah kayua jit praong COVID-19, Cà Mau jeng ngak hu dua bruk haong gauk, lac gam pacang caga hu jit, gam patagok kinh tế, khik kajap an sinh xã hội, oh caik ka urang halei njauk klaak veik gah likuk. Thun 2022 nao tapa haong biak rilo kan kandah, min Tỉnh ủy Cà Mau jeng ngak hu 18/19 bruk tui Sarak ba tabiak.

Uan harei Tet Nguyen dan Quý Mão 2023, huyện Long Mỹ, tỉnh Hậu Giang peih bruk taom mbaok saong mbang Tết haong urang kan kathaot, mikva bangsa takik gaok kan kandah. Di mbang taom mbaok, urang par akaok huyện Long Mỹ hu jao alin 337 paok pandap tal dom baoh sang kan kathaot, yaok paok hu yaom 500.000 đồng, dalam nan hu 134 baoh sang urang bangsa Khmer kan kathaot. Gam haong nan, urang par akaok huyện hu mbang Tết haong mikba kan kathaot, rivang, brei mboh hatai caong dom siam makre di abih di thun bahrau.

Sở Lao động - Thương binh saong Xã hội tỉnh Trà Vinh bahrau jao brei baoh sang Jum pataom ka sang kathaot, urang taha sang jaik kathaot di huyện Trà Cú; alin hadiah 10 pok pandap Tết brei ka sang sarak karja, sang buh prein ka taneh ia, 40 pok pandap Tết ka sang kathaot meng jien di kadung jien "Daong ka urang kathaot". Tapa nan, huyện Trà Cú, jeng hu ieu pataom rilo prein yava, jien padai piah daong ka urang kathaot, jaik kathaot, haong yaom daong takik di abih lac 500.000 đồng sa baoh sang. Urak ini, huyện Trà Cú jeng daok hu 2.000 sang kathaot saong 3.000 sang jaik kathaot.

Labaih 500 urang ngak gaok kan kandah di Bình Dương bahrau taduan hu pandap Tết hu makna meng danak dak “gam saong gauk ngak jeng Tết” kayua doanh nghiệp, Tổng Liên đoàn Lao động Việt Nam saong kapul dam dara CS Hồ Chí Minh pakat negar peih ngak. Yaok paok pandap alin ka urang ngak hu yaom 700.000 đồng, dalam nan hu 300.000 jien mbaok saong pandap panda pandar yaok harei. Dalam danak dak ini daok hu dom bruk ngak chreih chrai piah urang ngak ma-in Xuân, raok Tết yau dom gian hàng pandap mbang, kadha ma-in bhap bini di harei Tết meng kan Việt Nam. Di pak ini daok hu rilo gian hàng pablei pandap trun yaom ka urang ngak piah mbang Tết.

Rajaei Lativa hu tabiak panuac ieu pachreih bhap bini di dom labik bhum kreh negar taneh ia ini samar panduan nao labik siam mekre salamat dalam tuk taneh ia ini daok njauk ia dauk ia sua khang di abih kuhria dalam labaih 4 pluh thun tapa. Jalan ia nduac di kraong Daugava – lac baoh kraong praong abih di Latvia  njauk pacang veik meneing meng dom khối băng seik mai meng Belarus ngak ka ia patau la-an sraiy tame sang danaok, labik daok di bhap bini. Piah pacang bruk ini, dom kapul dom gah brei pok, beik paglaong ar pacang praong bahrau hu ngak atah di ini jaik 10 thun di mangaok kraong Daugava, dom gah bol bala jeng hu ba mai daong bhap bini panduan nao labik salamat

Dom urang jakar Jamaica bahrau cap mek hu rilo cocaine yaom tal labaih 50 triệu USD. Ini lac mbang cap mek ma túy praong ka 3 di dom urang jakar Jamaica dalam 4 bilan tapa. Dom urang jakar ndom lac, taneh ia kaoh pulao Caribe ini, lac labik pataom mai - pajeng nao, oh lac labik puac di dom lô pandap  ba tal metai menuac ini. Meng dom thun 1980, taneh ia kaoh pulao hu jaik 3 triệu menuac ini hu tamuh tagok yau sa labik pataom -pajeng ma túy  praong,  rilo meng  Nam Mỹ tal Mỹ.

Rajaei Honduras hu sarak patabiak bruk samar drah ka prein yava taneh ia dalam 90 harei, kayua jit cúm menuk ada tamuh tabiak. Jalan ngak ini hu ba tabiak hadei di tuk urang jakar mboh lac ruak kum menuk ada daok njaom mbak di dom janih menuk ada. Rajaei taneh ia ini hu tacei pato jabat Dịch vụ taneh ia ka prein yava saong salamat pandap mbang kaya nong pandar ngak dom jalan hacih sa-at piah pacang cakak ruak njaom mbak tapa dom janih cim raong  saong cim glai. Gam haong nan, hu panuac ieu Mintri ngak nong blei dom pandap saong ngak dom bruk njauk ngak piah pacang cakak bruk njaom mbak di jit ruak./.