Dalam negar hu buh rilo jien ndua pren yava ka urang kathaot 

Brei panuac di var peih bruk jak ba “Abih gauk dalam negar ba tangin tame daong ka urang kathaot” thun 2022 rah tabiak melam 17/10 di Ha Noi, Thủ tướng Rajaei Phạm Minh Chính hu panuac ieu dom mentri, dom gah, jabat, palei patui bruk peih ngak sumu gauk, siam lagaih dom jalan tacei ba, sarak ka bruk patrun kathaot; daong urang kathaot meng bruk ngak cambaic laic, lagaih. Tamat danak dak Mban peih bruk taduan hu bruk sangka di 167 jabat, đơn vị, Kapol nyaom, Tổng công ty, dom D.N, doanh nhân, dom kapol agama, urang Viet Nam dalam saong langiu negar, dom urang ngak pahala hu rik daong saong tut angan rik jien tame Kadung jien “Daong urang kathaot” haong yaom jien labaih 1.177 tỷ đồng.

Nyaom biai mbang ka 4, Quốc hội mbang 15 meda hu peih tabiak di mesup harei  20/10 song tamat di beir harei  15/11. Di nyaom biai ni , Quốc hội kuhria brei tapa  7 danak dak hukum, 3 dự thảo sarak. Quốc hội jeng brei panuac ka  7 danka dak hukum, dalam nan njuak caik hatai lac danak dak hukum taneh riya (pasiam veik). Pasang iek dom pathau khan ka tong yaom bruk peih ngak  jalan  patagok kinh tế - xã hội, kadung jien karja, bruk đầu tư công phun jien kadung jien karja. Peih bruk tangi sua song javap jalei  di dom urang Quốc hội. Quốc hội pasang iek kadha “Bruk peih ngak sarak, hukum ka patak pataom, pacang palai pajoa tuk vak 2016-2021”.

Mban Khik iek Danak dak buh jien tame padang ngak jalan mbak tỉnh Bình Dương birau pambuak bruk saong dom gah hu peih bruk da-a 300 baoh sang bhap bini di phường Bình Thắng, Ban Dĩ An mai hu mbaok ginum biai piah thau ka bruk padang ngak jalan Vành đai 3 Ban raya HCM tapa tỉnh Bình Dương. Dahlau di nan, 800 baoh sang bhap bini tavak tame danak dak di Ban Thuận An jeng hu da-a mai ginum biai. Ralo mikva urang njauk hatai daong bruk peih ngak danak dak saong caong khin daong brei palagaih dalam bruk bayar jien taneh, daong brei labik daok piah bhap bini hu sahanang hatai samar jao brei taneh peih ngak danak dak.

Yaom lac dok tame bilan paik baoh min yaom kruac aik di  Bến Tre hu urang pablei salih mai blei tagok khang. Urak ni, kruac aik ba ar hu yaom meng  20.000-23.000 đồng/sa kg, kruac aik oh asar, kruac aik bông tím hu yaom meng 13.000-15.000 đồng/sa kg, tagok meng  4-5 mbang dut song dahlau deih, dong ka po bein hu laba. Bến Tre hu labaih 2.000ha kruac aik, tuk vak tapa, gah  chức năng tỉnh dong palagaih ka po bein pala kruac aik tui dom jalan ilamu kỹ thuật dong ka phun kruac aik pacang hu ia njom mbak song pala pablah dalam bein li –u,  hu kein laba glong.

Pambuak tal bruk sa urang jakar công an lac hu taduan jien piah ngak samar căn cước công dân ka bhap bini di quận Gò Vấp, TP.HCM di akaok bilan 5 meng blaoh, Jabat cảnh sát  pasang iek Công an quận Gò Vấp hu ba tabiak kaok tui hukum piah langyah duis mbang jien saong pambuak talei mbang jien. Dahlau di nan, di puac bilan 6 thun 2022, Công an Ban raya HCM brei urang jakar nan padeih bruk piah pasang iek, langyah, duah thau cambaic laic, pasang iek kỷ luật tui bruk ba tabiak di gah cong an.

Negar Prang  daok dang anak  bruk  đình công di urang ngak dalam gah pajeng ba di grauk labik dalam taneh ia dalam harei ni (18/10) dalam tuk rajaei negar ni song dom kapul nyaom oh ka njauk gauk dalam dom mbang ginum biai ka jien bilan piah pambuak veik bruk ngak di dom gliang menyek. Dahlau di nan, dom mbang  đình công dalam gah năng lượng Prang dui atah jiak 3 adit tapa,ngak ka  janih nhiên liệu negar ni dok kurang trak. Bruk ni, batabiak tavak tavaiy prong  ngan song Tổng thống Emmanuel Macron meng di tuk  ong hu pilih ruah pok ngak veik di bilan 5 meng bloh.

Tui Danak dak Pandap mbang dunya kuhria mboh dahlau lac jaik 19 trieu bhap bini Afghanistan daok dang anak bruk kurang pandap mbang. Bruk lahik bruk ngak di tabung glong saong dom kan kandah gah kinh te lac bruk praong abih ba tal kurang pandap mbang di taneh ia Nam Á ini.  Urak ini, bruk mek jien tame yaok harei  di bhap bini taneh ia ini labaih 102 afghani - sumu 1,18 USD sa harei. Dalam tuk nan, yaom kaom dom janih pandap mbang tagok gam gam kuhria meng akok thun, ba tal raidiuk bhap  bini dak harei dak kan kandah jang.

Hãng jru tavoa Moderna mek hu thỏa thuận pabak  janih  vắc-xin pacang Covid-19 bahrau hu patagok ka Liên minh dunya Vắc xin song klauk jru piah dong ka dom taneh ia kan kathaot samar hu pandar janih vắc-xin ni.Meng thỏa thuận ni, Moderna meda pabak ka dom taneh ia pambuak bruk 100 triệu mbang vắc-xin phiên bản bahrau ngan song yaom jien bier di abih  meng di thun 2023./.

Urang lang: Ái Nghiêm -Hanipha- 18/10