Brei panuac di var peih pakak Nyaom roya Kapul Dam dara CSHCM pakat negar mbang 12, vaktu 2022 -2027 daok peih ngak di Ha Noi, Tổng Bí thư Nguyễn Phú Trọng caong khin, dom pakat Kapol Dam dara  brei salih birau saong paglong jang bruk ngak, asar kadha hu lagaih, jalan ngak bruk di Đoàn saong dom kapol nyaom dam dara, urang ranaih Viet Nam. Ini lac bruk ngak hu makna praong piah paglong bruk ngak di Đoàn, pabak sumu bruk ngak dalam tukvak birau, rik tame dak padang Đảng saong jalan chính trị, pakhang bruk jum pataom taong abih bhap bini saong khik caga chế độ XHCN. Dalam nan,  mek bruk caong khin njauk brei tui hukum, lagaih di dam dara lac  bruk praong. Abih di nyu lac, tacei pato ka  dam dara  bac megru saong eng drei bac megru luac rai, kham merat yam tagok ngak po ilamu saong cong nghệ birau.  

Tỉnh Hậu Giang bahrau hu sarak daong dui pachreih menuac ngak, menuac brei nao ngak bruk di labik karei atau labik atah saong salih gauk ngak di dalam tỉnh. Tui nan, urang jakar, công chức, viên chức ngak praong dang akaok, khik ramik di dom jabat, đơn vị trung ương brei mai ngak bruk di dom jabat, đơn vị dalam hệ thống chính trị tui panuac caong hu daong 150 triệu đồng sa urang, kumei hu rilo jang 20 triệu đồng. Urang mai ngak bruk di tỉnh ini daok hu daong jien pah sang 5 triệu đồng sa bilan, tukvak daong oh tapa 12 bilan.

Pasak Pasang iek ruak kik Ban raya HCM brei thau, urang njom ruak pandiak tabiak dalam adit tapa trun 14,7% dut saong kuhria rah tapa dalam 4 adit dahlau, yau nan min daok dang di tanut glong dut saong tukvak ini dom thun dahlau. Kuhria meng akok thun tal urak ini, ban Raya hu 78.561 mbang urang njom ruak, tagok jaik 7 mbang dut saong tukvak ini thun 2021 saong 29 urang metai. Urak ini hu labaih 75% dom urang metai kayua ruak pandiak tabiak darah lac urang umo praong. Hu dom urang tame sang  iek ruak tuk ruak trak nan ye mbuan ba tal metai lahik.

Xã Phước Tỉnh (Long Điền, Bà Rịa - Vũng Tàu) bahrau peih bruk brei ka urang taong ikan mbaoh tangin tame harak sanya taong cap kaya ikan oh lih tame bhum tasik taneh ia langiu; oh pandar pandap taong cap ba tal palai pajoa yau ye điện, jru pakauk, jru patuh... piah taong cap kaya ikan. Dom urang taong ikan jeng hu sanya khik ramik bruk ngak di dom pandap jamriak pasang iek jalan nao di kapal ikan dalam tukvak daok ngak bruk mangaok tasik, oh lih tame bhum tasik taneh ia langiu, oh taong cap kaya ikan suan hukum…

Hadei di sa thun brei padeih kayua jit ruak COVID-19, “Harei pataom Du lịch - Melam gom hadah mekre Ninh Kiều, Cần Thơ” mbang V - thun 2022 meda hu peih ngak veik  meng harei 5 tal 7/1/2023( lac meng harei 14 tal 16 bilan 12 saka ia bulan).Harei pataom  nan lac sa dalam dom bruk ngak  ka dulich di quận Ninh Kiều saong Ban Cần Thơ, piah patagok ilamu meng kan di gah dulich  mekre karei di quận, lac Du lich MICE ( lac bruk dulich pambuak saong nyaom biai, ginum biai, pok meyaom, bruk praong) saong dulich kraong ia; yaih khan ka thaot binguk “ Du lich  đô thị  bhum kraong ribong” saong bhap bini Ninh Kiều tui tanut di urang Cần Thơ “ Hadah krah- Sami samar – Anit ranam – Siam hatai - Thanh lịch”.

Meng 224 phiếu pachreih tui saong 201 phiếu cagar veik, Hạ viện Mỹ hu brei tapa hukum pabak kadung jien ngak bruk ka rajaei liên bang tal harei 23/12. Hukum ini brei hu Thượng viện brei tapa dahlau di tuk hu Tổng thống Joe Biden mbaoh tangin tame. Hukum ini piah daong dom nghị sỹ 2 đảng hu rilo tukvak jang piah ginum biai njauk gauk ka kadung jien karja brei ka binah daok veik di thun jien padai 2023 hu peih tabiak meng bilan 10.

Tui kuhria hu 100.000 y tá, điều dưỡng di 76 sang iek ruak saong pasak y tế di Anh meda hu mbaok tame bruk đình công praong pakat negar dalam harei 15/12, kayua  dom bruk oh njauk hatai ka jien bilan haong rajaei dalam tuk daok trak damah ka bruk ngak rilo kateik tagok kayua tapa prein dalam thun ini.  Bruk lạm phát glong jang 10%, min jien bilan bahrau tagok 4%  ba tal dom bruk oh njauk gauk catang di dom gah cong doan urang ngak saong urang pandar manuac ngak bruk di Anh.

Bol bala Peru hu ba mai angaok dom jalan phố piah khik caga  saong pacang veik dom bruk trun jalan bạo lực hadei di tuk Tổng thống Pedro Castillo njauk jaleih rai di adit dahlau. Hu takik di abih 6 urang metai dalam dom mbang taong gauk haong cảnh sát. Urang trun jalan tame am cuh dom jabat ngak bruk di rajaei saong meblah mek dom labik khí ga tự nhiên. Dom mblang kapal haoh di rilo ban praong brei kreik pabah mbang. Bruk srau kadau chính trị di Peru tamuh tabiak hadei di tuk Tổng thống taneh ia ini duah jalan giải tán quốc hội harei 07/12 piah plaih sa bruk buh phiếu kaoh duas./.