UB bhap bini TPHCM birau hu harak brei peih ngak, ba pandar suai lavik, khang kajap drap ar hu meng langik tasik, khik caga tasik saong kaoh pulao  tal thun 2030, pamong tal thun 2050 di TPHCM. Tui nan, meng ini tal thun 2030, TPHCM brei cak rok patagok dulich saong jit vu tasik; kinh te tapen tasik, pajeng ba jalan tasik; patagok labik tapen tasik; raong pala saong chap mek kaya ikan dalam ia; ngak năng lượng meng tasik, năng lượng tai tao saong dom gah kinh te tasik birau; paglong raidiuk saong jalan ngak mbang di bhap bini. Mbiah tal thun 2030, huyen Cần Giờ hu jeng ban padeih padei saong dulich sinh thai asar siam, hu prein meriak gauk di pakat bhum.

Huyện Xuân Lộc, tỉnh Đồng Nai ba tabiak jalan ngak lac kham marat tal tukvak 2026-2030, hu taong abih dom xa khik hu kajap angan palei pala bahrau paglaong, palei pala bahrau kieu mau tui Paok asal kadha tukvak 2026-2030. Abih di nyu nan lac, kham marat dalam huyen hu 7 xa mek hu angan palei pala bahrau thông minh, dalam nan yaok xa hu takik di nyu 2 palei thông minh tui asal kadha di tinh. Pambuak haong padang ngak xa palei pala bahrau thông minh lac pataom tame cak rok patagok bruk ngak piah oh padeih paglaong jien mek tame ka rahra daok pak bhum palei. Jalan ba tabiak lac kham marat tal thun 2030, jien mek tame yaok tui akaok manuac hu 120 triệu đồng.

Meng harei ini, Gilang pariak TMCP Ngoại thương Viet Nam (Vietcombank) ba tabiak bruk Tut angan blei ameh hala SJC tapa online angaok website di Vietcombank piah langyah bruk urang caong khin blei dak tui talei di dom labik pablei ameh hala SJC di gilang priak ini. Hadei di tuk tut angan blei ameh SJC tapa online, tuai njauk nao tal labik drei tut angan blei tui tukvak pagon blaoh. Meyah , nao te  suai jang tukvak pagon 30 minit  oh mboh urang mai blei, Vietcombank brei klak tapa piah pablei ka urang tut angan patui di nan.

Adit Ilamo-Du lịch huyện Châu Thành, tỉnh Bến Tre bahrau tamat blaoh haong rilo bruk bui sambai, chreih chrai. Dalam adit ini dui pachreih hu  labaih 96.000 mbang tui mai rivang iek. Ini lac tuk piah ka huyen mayaih khan dom bruk du lich, dui pachreih dak harei dak rilo tuai mai rivang iek, padeih padai; gam haong nan, hu panuac ieu urang ngak mbang mai pak ini piah gam haong huyen padang ngak, patagok du lich jeng sa gah kinh te praong.

Meng akaok bilan hajan mbiah tal ini, di bhum taneran kraong Cuu Long rah tabiak gam gam bruk glut jaleih taneh. Abih di nyu lac, bruk nan daok rah tabiak trak damak di tỉnh Vĩnh Long. Dalam harei 6/6 meng blaoh angaok kraong Măng Thít labik tapa xã Tân Long Hội, rah tabiak glut jaleih labaih 38 met, ngak khut dua baoh sang saong jalan nao mai dalam palei. Harei hadei di nan, jeng di jalan kraong nan, labik tapa xã Tân An Luông glut jaleih taneh  atah labaih 60m, mbang tame dalam 6 m, ngak brei 2 baoh sang bhap bini, ar pacang saong dom drap ar di 4 baoh sang bhap bini njauk ia ba theik. Glut jaleih trak rah tabiak tuk birau tame akaok bilan hajan  ngak ka bhap bini biak haduh hatai.

Đại hội đồng Liên hợp quốc hu brei tapa meng bruk njauk gauk ka Du thao Sarak kayua Việt Nam ba tabiak likau mek harei 11/6 yaok thun ngak Harei dunya Ma-in sambai, lac tuk piah pok mayaom dom siam mekre di bruk ma-in sambai. Ma-in sambai lac bruk oh kurang hu di anek manuac di taong abih dom umo thun saong biak hu makna ngan haong bruk cak rok patagok abih gah di uranaih. Min, bruk ini ka oh hu caik hatai biak biai anak dom jalan nao di xa hoi. Kayua yau nan ye, bruk ba tabiak ini di Việt Nam taduan hu bruk pachreih tui di taong abih dom taneh ia dalam Liên hợp quốc.

Meng bilan 1 mbiah tal bilan 5 meng blaoh di Campuchia hu 58 mbang jakala klak, ngak brei 33 urang matai saong 28 urang njauk rambuac, yaok pluh  drei athur metai saong 14 baoh sang khut tayah. Dalam nan, Siem Reap lac tỉnh hu rilo urang metai abih kayua jakala klak. Tui Mentri Tai nguyen saong Khi tuong Campuchia, bruk BĐKH kayua taneh pandiak tagok  jeng lac sa dalam dom jalan ngak brei patagok parilo dom mbang hajan hangin khang, jakla klak, kayua pandiak glong mbuan ba tal langik jhak.

Dalam 3 bilan tapa di Ấn Độ hu takik di nyu 159 urang metai medil lac kayua pandiak, taeng di bang Odisha, hu tal 41 urang metai. Dom bhum  gah barak Ấn Độ daok gaok langik pandiak biak khang meng di kreih bilan 5 haong nhiet do tui kuhria dalam 45 - 50oC, hu dom labik daok glaih glar haong bruk kurang ia hacih. Tui Jabat Kuhria mboh dahlau bruk langik tasik negar Ấn Độ, ini lac mbang pandiak atah abih kayua nyu dui atah gam gam dalam 24 harei. Ấn Độ saong dom bhum pak châu Á daok rah tapa sa bilan pandiak biak khang oh ka bhian mboh, sa bruk bo dom urang ilamo ndom lac, dak harei dak trak damak jang kayua biến đổi khí hậu./.